1 Chroniques 20
20
Joowaab jáń ki fōō Raaba tiŋki
(Kpèè 2 Sami 11.1, 12.26-31)
1Dibindi tú an bàn̄ ŋyunti ŋun bibɔtiibi nyēē ki cáà kujaauee, ní Joowaab līntì Isirayeel janjaliibi nyɔkɔpu ki cūtìi nāaǹ Amɔn yab tiŋki kɔkɔ. U nìn bíi bɔ́ntí kí já nì bi-tiŋyil Raaba kí fōō-kì. Ama Daafiidi úǹ nìn gbíntì Jeerusaleem tiŋkin.
Joowaab nìn jáń ki fōō Raaba tiŋki ki nāaǹ-kì. 2Míǹ boonee ní Daafiidi cíkitì sindaariya beefuuliiki kin nìn cíkí Amɔn yab waal Miilkɔm#20.2 Miilkɔm: kpèè 2 Sami 12.30. yil puee. U nìn dáań ki ká yii ki-nyiŋfiŋu nìn jítiǹ kiiloobi mmuŋku nì saalaa pu. Ditaŋkpamɔntiil diba nìn náká ki-pu, ní bi cúú ki nákatì ki dūu nákáǹ Daafiidi beefuuliiki pu. Daafiidi nìn gíti yōoǹ tigaajawan tikpil kitiŋ gbantin. 3Daafiidi nìn cúú kitiŋee nib ki cūnnì ki tɔ́ atuun ŋin pɔ̄ɔ̄yee poon: bi nìn sèekì idɔ, ki kpítí ataŋkpee ní ki gàatī isufi. Míǹ ní Daafiidi ŋá Amɔn yab timmu mun kíǹee kɔkɔ poon. Boonee ní u fātìi nín gítí Jeerusaleem tiŋkin, u nì u-janjaliibi kɔkɔ.
Isirayeel yab nì Fiiliistii yab jaaku
(Kpèè 2 Sami 10.6-19)
4Míǹ boonee kujaau kubɔ nyáń Isirayeel yab nì Fiiliistii yab kansikin Geeseer#20.4 Geeseer : kpèè 2 Sami 5.25. tiŋkin. An jaaku poon ní Siibkayi un sá Usa tiŋkinee kūū Siipayi un sá Reefa naantiiu ubɔee. Bi nìn dū Fiiliistii yab ki ŋá bi-taapu. 5Kujaau kubɔ mun nìn gíti nyáń Isirayeel yab nì Fiiliistii yab kansikin ní Yayiir jipɔɔn kūū Gooliyaati un sá Gaati tiŋkinee naal Laamii. Laamii kpaŋki kin u nìn ŋúb́ee dɔŋu nìn gbìfì kii nsataludɔee ní#20.5 Gooliyaati : kpèè 1 Sami 17.4-7. - Gaati : kpèè 1 Sami 5.8.. 6Kujaau kubɔ mun dāa gíti nyáń Gaati tiŋkin. Ku-poonee unaaciin ubɔ nìn bí ki cáá ŋŋambiyaamu muluu kuŋaŋfaau kamaa pu nì ntaŋambiyaamu muluu kutafaau kamaa mun pu. U-ŋambiyaamu nì u-taŋambiyaamu kɔkɔ nìn nyáń mmuŋku nì munaa dee. U mun nìn sá Arafa maaliŋun ní. 7U nìn sīī Isirayeel yab. Niinee Sama jipɔɔn Joonatan, Daafiidi wee kūū-u.
8Daafiidi nì u-janjaliibi di nìn kūū Fiiliistii yab janjaliibi gbanti. Bi nìn sá Gaati tiŋkin Arafa dicaŋkun ní.
Currently Selected:
1 Chroniques 20: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.
