1 Chroniques 19

Bi kpēē Daafiidi kàliŋkpilib fám

(Kpèè 2 Sami 10.1-5)

1Ŋyunti ŋubɔ boonee ní Amɔn yab bɔtiu Naasi kpíì ní u-jipɔɔn fōō u-yil ki kāl̀ dibeel. 2Niinee Daafiidi bí yii: «M làá ŋá Naasi jipɔɔn Anuun tiŋan kii u-baa nín nìn ŋá man tiŋan puee.» Daafiidi nìn lēē binib ki tú bí cù kí sɔ̀ŋkì Anuun pɔbil u-baa nín kpíìyee pu. Ní Daafiidi tɔntɔnliibi bin u lēē ki túee dūu bàn̄ Amɔn yab tiŋkin. 3Ama ní Amɔn yab yidambi bí Anuun yii: «A dàkafī yii Daafiidi nín là kí tīī a-baa tinyool kí sɔ̀ŋkì a-pɔbil puee ní u túnní binib a-ceeee? Waa túnní u-nib bí dāan̄ kí yìiǹ kí cɔ̄ŋkì kí béé kitiŋ filiŋfeetii níii?» 4Niinee ní Anuun yāntì bi cúú Daafiidi kàliŋkpilib ki kōol̀ bi-nyimpuliŋ, ki cátì bi-bɔkutiŋ ki ŋmāntiǹ bi-kpiliŋ ní ki jìn̄-bi. 5Ní bi cūtìi máafì Daafiidi binibee bɔti. U nìn lēē binib ki tú bi cūtìi túŋkì-bi nsanni kun puee bi nìn kɔ́ǹ-bi icoo tikpil. Ubɔti nìn tú bi tùkū-bi yii: «Ní gbíntí Jeeriikoo tiŋkin ni-nyimpuliŋ ń fàtīí nyā. Míǹ boonee ní nín gítiń doo nee.»

Daafiidi jáń nì Amɔn yab nì Siirii yab

(Kpèè 2 Sami 6–19)

6Anuun nì Amɔn yab ká yii Daafiidi kaa làá dū tin bí ŋée kí pɔ̄-bi. Niinee ní bi nyàab̄ animbil kúti tɔɔnib mmuŋku nì saalaa ki tú bi cūnnì ki tīī Aram yab bin kóò amɔɔ ali kansikinee nì bin kóò Maaka nì Sooba timmunee janjaliibi, bí dāá já kujaau kí tīī-bi kí kpáaǹ bi-janjatɔrɔkub nì bi-tanjakaliibi. 7Bi nìn ŋúń ki ká janjatɔrɔkub kutukub mmuŋku nì saalaa nì bili, ní ki tīī Maaka bɔtiu nì u-janjaliibi animbil. Bíǹ nìn dɔ́miń ki ŋātì bi-janjanaapaal Meedeeba#19.7 Meedeeba : kpèè Yees 15.2. tiŋki caŋin. Amɔn yab mun nìn nyánní bi-timmun ki dɔ́miń ki kpáfì kí já kujaau.

8Daafiidi nín gbìl̄ mimmee, ní u dū ujanjakpil Joowaab nì bijanjaliibi bin sá bibaatandambee ki tú. 9Amɔn yab nìn cūtì ki yúl̀ mpɔn pu bi-tiŋyil punyɔkɔki nyɔkɔpu kí já kujaau. Ama bibɔtiibi bin nìn dɔ́miń kí tūtuǹ-bee bíǹ nìn yúl̀ tisatin laaba. 10Joowaab ká yii kujaau làá nīn bí u-nyɔkɔpu nì u-boon pú. Di sá ní u lēē Isirayeel janjaliibi bimɔntiibi ki yāntì bi yúl̀ mpɔn pu ki bíitiǹ Aram yab. 11U nìn dū u-janjaliibi bin kíǹee ki ŋúbíǹ u-naal Abisayi ní ki yāntì bi yúl̀ mpɔn pu ki bíitiǹ Amɔn yab. 12Joowaab tùkū u-nabiki yii: «Siirii yab yaa bíi pɔ́ɔkíǹ-mee, á dāá tíkiń-mi. M yaa tí ká yii Amɔn yab bíi pɔ́ɔkíǹ-see, ma mun làá dāan̄ kí tíkiń-si. 13Dàkà dibaatandi, tí dàkà dibaatandi kí fīī ti-nibul nì ti-Nimbɔtiu timmu. Ti-Dindaan ń ŋá min u lèe.» 14Niinee Joowaab nì u-janjaliibi nín cá kí já nì Siirii yab, ní bíǹ sáǹ-bi. 15Amɔn yab nín ká yii Siirii yab sáǹee, ní bi mun sáǹ Abisayi, ki kɔ́ kitiŋin. Niinee ní Joowaab nín gítí Jeerusaleem tiŋkin.

16Siirii yab nín ká yii Isirayeel yab pɔ́ɔkiǹ-bee, ní bi tú binib bí cùú yíiń Siirii yab janjaliibi bin kóò Eefiraati mɔɔl lapu púee. Adadeeseer janjakpiliu Soobaaki di nìn līī bi-nyɔkɔpu. 17Ní bi tùkū Daafiidi an bɔti, ní u kóoǹ Isirayeel yab janjaliibi kɔkɔ ki kpáfì, ní bi nín cá ki dūtì Jɔɔdan buŋŋu ki cūtìi yúl̀ ŋkɔnjaloon pu. Siirii yab nìn yúl̀ mpɔ̀n pu ki tātìi gbāaǹ dikɔ̀ndi pu kí já nì Daafiidi. 18Ama Isirayeel yab nìn jáń ki pɔ́ɔkiǹ-bi, ní bi sáǹ. Daafiidi yab nìn kūū itaamu in dátí janjatɔrɔkubee kutukub biluli, ní ki kūū bijanjaliibi bin còom̄ ataa puee binib kutukub imuŋku ili. Bi nìn kūū Siirii yab janjakpiliu Soobaaki. 19Bibɔtiibi bin kɔkɔ nìn bí Adadeeseer taapuee nìn ká yii Isirayeel yab jáń ki pɔ́ɔkiǹ-bi. Niinee ní bi nì Daafiidi sòon̄ ki gbìlīǹ tɔb ŋgbansɔŋfi ń nīn bí bi-kansikin. Bi nìn kíǹ ki bí u-taapu ní. Kí yòon̄ ŋyunti gbantee, Siirii yab kíǹ ki fàŋkí kí jòò Amɔn yab.

Currently Selected:

1 Chroniques 19: BASSARDC

Highlight

Copy

Compare