1 Chroniques 18

Daafiidi nín jáń ki pɔ́ɔkiǹ atimbun ŋiŋyee

(Kpèè 2 Sami 8.1-14)

1Míǹ boonee Daafiidi jáń ki pɔ́ɔkiǹ Fiiliistii yab ki dū-bi ki ŋá u-taapu. U nìn fōō Gaati tiŋki nì ntimbilimu mun bí ki-taapuee. 2U nìn jáń ki pɔ́ɔkiǹ Moowaab yab mun ní bi kpántì u-yumbui ki kíǹ ki pà lampoo ki tìì-u. 3U nìn jáń ki pɔ́ɔkiǹ Adadeeseer. Siirii tiŋki Sooba kin bí Amaati watil púee bɔtiu dee. Ŋyunti gbantee, Adadeeseer nìn bíi mɔ̀ kí wàan̄ u-beel kí tin cáá sāā Eefiraati mɔɔl ní. 4Daafiidi nìn fōō u-cee janjatɔrɔkub kutuku ní ki cúú u-janjaliibi bitanjakaliibi binib kutukub biluli nì u-janjaliibi bin còom̄ kitiŋee binib kutukub mmuŋku. Daafiidi nìn lēē itaamu dilaataal ki síiǹ úǹ u-ba ní ki gāā ki kpātì in kíǹee tabilɔnti. 5Aram yab bin sá Damaasi tiŋkinee nìn dɔ́miń kí tūtuǹ Adadeeseer, Sooba bɔtiu. Daafiidi nìn jáń ki pɔ́ɔkiǹ bi mun, ki kūū Aram yab gbanti kansikin binib kutukub mmuŋku nì bili. 6Daafiidi nìn kāaǹ gɔminab Damaasi tiŋki pu. Aram yab nìn kíǹ ki bí Daafiidi taapu ní ki pà lampoo ki tìì-u. Laakin kamaa Daafiidi yaa nìn cūtèe, ti-Dindaan nìn tìì-u dijajil ní. 7Daafiidi nìn kóoǹ Adadeeseer janjaliibi gbampɔɔŋi ŋin sá sindaariyee ki cáa cūnnì Jeerusaleem tiŋkin. 8U nìn yōoǹ tasa kúti mun tikpil tikpil Tiibaati nì Kuuni timmu mun nìn bí Adadeeseer beelinee. An kúti ní Saloomɔn dāa dūu mɔ́ɔ́ kusɔŋkpaaŋŋu dikuŋkundi ki síiǹ kunimbɔtidiin nì ki-jaantalkub, ní ki mɔ́ɔ́ ku-sambiliŋ ŋin kɔkɔ bi nìn dū tasa kúti ki mɔ́ɔ́yee.

9Amaati bɔtiu Toowu gbìl̄ yii Daafiidi jáń ki pɔ́ɔkiǹ Sooba bɔtiu Adadeeseer janjaliibi kɔkɔ. 10U nìn dū u-jipɔɔn Adooram ki tú yii ú cùú jāam̀ ubɔti Daafiidi. Adooram nìn jáam̀ ubɔti ki pàkā-u, kun puee u nìn jáń ki pɔ́ɔkiǹ Adadeeseer. Di sá yii Toowu nì Adadeeseer nìn jáà ní. Adooram nìn kpáàa tú sindaariya nì animbil kúti nì tasa kúti wanti ki cáań ki pú Daafiidi. 11Ubɔti Daafiidi nìn dū an wanti gbanti kɔkɔ ki sú ti-Dindaan, kii u nín nìn dū animbil nì sindaariya un u nìn fōoń Eedoom yab nì Moowaab yab nì Amɔn yab nì Fiiliistii yab nì Amaleeki yab cee ki sú puee. 12Seeruya jipɔɔn Abiisayi nìn jáń ki pɔ́ɔkiǹ Eedoom yab Ŋyaam tantakalin. U nìn kūū bi-kansikin binib kutukub saalku nì bita#18.12 Ŋyaam tantakalin: kpèè 2 Sami 8.13, Ilan 60.2.. 13Daafiidi nìn kāaǹ gɔminab Eedoom tiŋki pu ní ki dū ki-nib ki ŋá u-taapu. Laakin kamaa Daafiidi yaa nìn cūtèe, ti-Dindaan nìn tìì-u dijajil ní.

Daafiidi kàlimbi yiŋŋi

(Kpèè 2 Sami 8.15-18)

14Daafiidi nìn jíń dibeel Isirayeel tiŋki kɔkɔ pu ní. U nìn cáá ibaamɔn ní ki sòoǹ u-nibul kɔkɔ bɔti kaa pɔ̀ gandi. 15Seeruya jipɔɔn Joowaab di nìn sá bijanjaliibi kpiliu ukpaan. Ayiiluudi jipɔɔn Yoosafaati di nìn sá ubɔti taapu yɔu. 16Ayiituub jipɔɔn Sadooki nì Abiyataar jipɔɔn Abimeeleeki di nìn sá bisaraaŋaliibi. Safeesa di nìn sá ugbaŋŋmal. 17Yooyadaa jipɔɔn Beenayawuu di nìn kpèé Keereeti yab nì Peeleeti yab bin cí ubɔtee. Ubɔti Daafiidi u-ba jipɔmbi di sá u-kàliŋkpilib bin nìn pée bí ki kɔ́ĺ-uee.

Currently Selected:

1 Chroniques 18: BASSARDC

Highlight

Copy

Compare