1 Chroniques 16

1Daafiidi nìn gāā tanti bí dū Unimbɔti dakaau kí síiń poon. Bi nìn cáá dakaayee ki síiǹ tantee kansikin. Míǹ boonee ní Daafiidi ŋá bisaraawɔkaabi nì mpèé saraabi ki tīī Unimbɔti. 2U ŋá saraabi gbanti ki dóòyee ní ki mēē ki bīiǹ samaa pu ti-Dindaan yindi pu. 3Boonee ní u yākatì tijin ki tīī Isirayeel yab kɔkɔ. Uninjaaa, unimpuɔɔɔ, báà ŋma nìn fōō kpɔnɔ ubɔ nì daati subiliŋ kalaau nì fiinyi subikuliŋ kalaau#16.3 Kpèè 2 Sami 6.19..

Leefii yab gāā ilan ki pàkā ti-Dindaan

(Kpèè Ilan 105.1-15, 96, 106.1,47-48)

4Daafiidi nìn dū Leefii yab bin bí ditundin ŋyunti gbantee biba ki síiǹ ti-Dindaan Dakaau nyɔkɔpu bí gāā ilan kí pàkà ti-Dindaan Isirayeel Nimbɔtiu, kí jāam̀-u ní kí nyɔ̄ŋkì u-yindi. 5Asaafi di nìn kpòotī-bi ní Seekariyawuu tútúǹ-u. Yeeyiyeel nì Seemiiramooti nì Yeekiyeel nì Maatitiyawuu nì Eeliyaab nì Beenayawuu nì Oobeedi-Eedoom nì Yeeyiyeel bɔ̀ɔ́ tibati nì saŋgub ní Asaafi cákafí cancakantib. 6Bisaraaŋaliibi Beenayawuu nì Yasiyeel di nìn yú Unimbɔti Dakaau nyɔkɔpu ki búǹ akantán kaa gbèentí. 7Ŋwiin gbanti sá mpeekaa ŋun Daafiidi tīī Asaafi nì u-nabiyaamu ditundi bí nīn gà ilan ki nyɔ́ŋkí ti-Dindaanee.

8Nlan ŋun bi nìn gāāyee sèé:

Ní nyɔ̄ŋkìmaan ti-Dindaan kí yòon̄ u-yindi yilpu,

ní yàntīmaan anibul kɔkɔ

ń gbìl̄ atuŋkpaan ŋin u ŋáaǹee pu.

9Ní gāāmaan ilan kí pàkà-u, ní bɔ̀ɔ̀maan tibɔɔkaal kí nyɔ̄ŋkì-u.

Ní māafìmaan atuŋkpaan ŋin kɔkɔ u túńee.

10Ní nīn fàal̀maan u-circir yindi pu,

nín̄ bímaan mmɔnni, nimbi bin nyàab̀ ti-Dindaanee.

11Nyàab̀maan ti-Dindaan nì u-pɔŋŋu,

pée nyàab̀maan kí wāl̀ u-nimbiin.

12Ní téetímaan maamaacib bin kɔkɔ u ŋée,

nì atulim nì ibɔsoon in nyáń u-nyɔkɔnee pu.

13Nimbi u-tɔntɔnliibi Isirayeel naantiibi,

nimbi Jaakɔb naantiibi,

nimbi bin u lútèe, téetímaan.

14Úǹ di sá ti-Dindaan Unimbɔti,

úǹ di sá duulinya kɔkɔ bɔsoonliu.

15Ní taa pée súntí u-poondi pu dalba dalba,

tibɔti tin u sòon̄ ki tīī anaantitɔntɔkɔ kutuku puee.

16Dipoondi gbanti ní u pōoǹ Abraam,

díǹ dibaantiil ní u pūtì ki pōoǹ Isaaki.

17Dipoondi gbanti

ní u dūu kpántì mara ki tīī Jaakɔb,

talku poondi din u pōoǹ Isirayeel,

18ki lī yii: «M làá dū Kanaan tiŋki kí tīī-si,

án nīn sá si nì a-naantiibi fakal»#16.18 B. 16-18: kpèè Diny 12.7, 26.3, 28.13..

19Ti-naanjab kaa nìn náaǹ báà fiii,

bi nìn pée sá binicambi bikaaŋkaabi

yéè ní kitiŋ nee pu.

20Bi nìn kàal̀ atimbunni ní ki kpántí,

ní kí kàl̄ dibeel diban kí póotí din kíǹ.

21Ama Unimbɔti kaa kíí báà unil ń sàaǹ-bi.

Bi-puee, Unimbɔti dáaĺ bibɔtiibi tafal ki lī yii:

22«Ní taa gbēē bin m lútèe,

kí taa ŋá m-bɔnaatiliibi tikpitil tiba.»#16.22 B. 21-22: kpèè Diny 20.3-7.

23Duulinya kɔkɔ nib, gāāmaan ilan

kí pàkà ti-Dindaan.

Ŋwiin kamaayee, ní nīn báakí

ki lì yii úǹ di sá Ufiil.

24Māafìmaan atimbun kɔkɔ nib u-nyooti,

kí māafìmaan duulinya kɔkɔn u-maamaaci tuuŋŋi.

25Di sá yii ti-Dindaan di sá ukpaan

ní ki máaǹ inyɔŋki.

U sá kuwambiiu ní ki jítiǹ awaa kɔkɔ.

26Anibul ŋin kíǹee waaŋi kaa bí tiban,

ama ní ti-Dindaan di náań yilpu.

27U-nimbiin ní tikpaandi nì dibeel bí,

mpɔn nì mmɔn gbí u-kɔŋkooŋŋun.

28Ntimu kɔkɔ nibuliŋ,

dāá tīīmaan ti-Dindaan tinyool,

ní bāakìmaan u-nyooti nì u-pɔŋŋu.

29Dāá nyɔ̄ŋkìmaan u-yiŋkpaandi.

Cáaḿmaan ni-saraabi u-nimbiin.

Bòom̄maan taapu ti-Dindaan nimbiin,

ŋyunti ŋun u yaa lēē u-ba ki dàkēe.

30Duulinyan kɔkɔ nib,

ni-wunti ń nīn gbáà kpàkpakpa u-nimbiin!

Tiŋman kitiŋ bá ki pɔ̄ɔ̄,

ní kì kpá kí lábití kí cìb̄.

31Kutagbɔŋu, nín̄ fàal̀,

kitiŋ, nín̄ bí dipɔɔpindin!

Lìmaan atimbun kɔkɔ nib cee yii:

«Ti-Dindaan di sá ubɔti!»

32Tiŋku ń nīn wòoǹ

ki kpáaǹ tin kɔkɔ bí u-poonee!

Tisati ń nīn fàal̀

ki kpáaǹ tin kɔkɔ bí ti-poonee!

33Kubambaŋŋun sufii ń nīn gbáà

iwiliili ti-Dindaan nimbiin,

di sá yii u dòoń kí sòoǹ duulinya bɔti.

34Tí nyɔ̄ŋkì ti-Dindaan, di sá yii u ŋān̄,

ní u-neeŋkpaandi bí ki cá jaanjaan#16.34 Kpèè 2 Kroo 5.13, Eesi 3.11, Ilan 100.5, 118.1,29, 136.1, Yeer 33.11.!

35Ní lìmaan yii:

«Unimbɔti ti-Fiiliu, fīī-ti,

kóoǹ-ti kí kpāfì,

ní kí fīī-ti kí nyāntí atimbun ŋin kíǹee ŋaan.

A-yindi sá circir yindi ní.

Niinee ti làá ŋmā kí tùkù-si yii si nì ditundi,

ní án nīn mɔ̄ǹ-ti tí nyɔ̄ŋkì-si.»

36Ní jāam̀maan ti-Dindaan Isirayeel Nimbɔtiu,

kí nīn cá abin abin.

Ní samaa kɔkɔ kíí yii «Ameeni! Nyɔ̄ŋkìmaan ti-Dindaan!»

37Boonee ní Daafiidi tīī Asaafi nì u-nabiyaamu mara yii bí gbíntí ti-Dindaan Poondi Dakaau cee. Niin ní bi làá nīn bí ki tūǹ bi-tundi baabadal kí nóó nì ŋwiin kamaa koobil nín sá puee. 38Daafiidi nìn lēē Oobeedi-Eedoom nì u-nabiyaamu binib imuŋku ita nì binii bí nīn cí ti-Dindaan dakaau, kí kūtì Yeedutun jipɔɔn Oobeedi-Eedoom nì Koosa. 39Daafiidi nìn dū ti-Dindaan circir kɔŋkooŋŋu ŋun bí Gabawɔn tiŋkinee tundi ki ŋúbiǹ usaraaŋakpil Sadooki nì u-nabiyaamu#16.39 Kpèè 1 Bib 3.4.. 40Niin ní bi làá nīn ŋáań kutaafaau nì kujoou bisaraawɔkaabi. Bíǹ di làá nīn ŋáań tin kɔkɔ ŋmàn̄ ki kā marab bin ti-Dindaan nìn dūu tīī Isirayeelee gbɔŋku poon. 41Binib bin nìn kútì bi-puee di sá Eeman nì Yeedutun nì bin bi nìn pée lēē bí nīn gà ilan ki nyɔ́ŋkí ti-Dindaanee. Di sá yii u-ŋanti bí ní ki cá jaanjaan. 42Eeman nì Yeedutun di nìn kpèé akantán nì cancakantib nì tiwan tin kɔkɔ bi nìn cáa bɔ̀ɔ́ ki gà ilanee. Yeedutun dicaŋkun yab di nìn cí kipunyɔkɔ. 43Míǹ boonee ní báà ŋma nín kùǹ, ní Daafiidi mun nín gítí kí cùú màntì u-dicaŋku yab pu#16.43 Kpèè 2 Sami 6.19-20..

Currently Selected:

1 Chroniques 16: BASSARDC

Highlight

Copy

Compare