1 Chroniques 15

Daafiidi bɔ́ntì kí gíiǹ Unimbɔti dakaau Jeerusaleem

1Daafiidi máń u-ba adiin laakin bi yíì yii Daafiidi Tiŋkee, ní ki bɔ́ntì mpaan ŋubɔ ki cóoǹ tanti bí cáań Unimbɔti dakaau kí síiń poon. 2U dóòyee ní ki bí yii: «Leefii yab baba di cáá nsan kí túń Unimbɔti dakaau. Di sá yii bíǹ ní ti-Dindaan lēē yii bí nīn tūntí dakaa gbanti, kí nīn kpèé-u kí nīn cáa cá jaanjaan.» 3Niinee ní Daafiidi yíiń Isirayeel yab kɔkɔ ki kpáfì Jeerusaleem tiŋkin bí yòon̄ní Unimbɔti dakaau kí cùnnì laakin u bɔ́ntì kí yóoń-uee. 4U kpáfì Aarɔn naantiibi bisaraaŋaliibi nì Leefii yab mun. 5Keeyaati maaliŋunee, Uriyeel di nìn sá ukpil u nì u-nabiyaamu binib dilaataal nì mmuŋku. 6Meerarii maaliŋunee, Asaaya di sá ukpil, u nì u-nabiyaamu binib alaataa ali nì binib mmuŋku. 7Geersɔm maaliŋunee, Jooweel di sá ukpil u nì u-nabiyaamu binib dilaataal nì binib mmuŋku nì saalaa. 8Eeliisafan maaliŋunee, Seemaya di sá ukpil, u nì u-nabiyaamu binib alaataa ali. 9Eebrɔn maaliŋunee, Eeliyeel di sá ukpil u nì u-nabiyaamu binib imuŋku inaa. 10Usiyeel maaliŋunee, Amiinadaab di sá ukpil, u nì u-nabiyaamu binib dilaataal nì binib saalaa nì bili.

11Daafiidi yíiń bisaraaŋakpilib Sadooki nì Abiyataar, nì Leefii yab Uriyeel nì Asaaya nì Jooweel nì Seemaya nì Eeliyeel nì Amiinadaab u-cee. 12Bi kpáfèe ní u bí-bi yii: «Nimbi di sá Leefii yab kpilib ki nóó nì ni nín pēē pēē mmaal puee. Ni nì ni-nabiyaamu ń bɔ́ntí ni-ba kí nīn bí circir, ní kí cùú yòon̄ní ti-Dindaan, Isirayeel Nimbɔtiu dakaau kí cáań laakin ní m bɔ́ntì kí yóoń-uee. 13Mpeekaamee, ni nín kaa nìn bí puee di nìn yāntì ti-Dindaan ti-Nimbɔtiu nìn fōō mbum ti-pu. Di sá yii taa nìn kpēē dakaayee kii an nín máaǹ puee.»

14Ní bisaraaŋaliibi nì Leefii yab bɔ́ntì ki ŋá bi-ba circir kí cùú yòon̄ní ti-Dindaan Isirayeel Nimbɔtiu dakaau. 15Niinee Leefii yab dū idɔ ki bɔ́ Unimbɔti dakaau buŋyin ki yōoǹ ki būkuǹ ki nóó nì ti-Dindaan nín nìn tùkū Mooyiisi bí ŋá puee#15.15 Leefii yab: kpèè Dikà 4.1-15. - idɔ: kpèè Disa 25.13-14.. 16Daafiidi nìn tùkū Leefii yab kpilib yii bí lēē bi-dicaŋŋi yab poon bilaŋgaaliibi bí nīn gà ilan ki bɔ̀ɔ́ tibati nì saŋgub nì cancakantib, kí nīn fàal̀ nì dipɔɔpindi. 17Leefii yab nìn lēē Jooweel jipɔɔn Eeman, nì u-nabiki Asaafi, Beereekiya jipɔɔn. Meerarii maaliŋunee, bi nìn lēē Kusayawuu jipɔɔn Eetan. 18Bin bi nìn lēē ki kútì bi-pu bi bí bi-taapuee di sá Seekariyawuu nì Beeni nì Yaasiyeel nì Seemiiramooti nì Yeeyiyeel nì Unii nì Eeliyaab nì Beenayawuu nì Maseeyawuu nì Mataatiyawuu nì Eeliifileewuu nì Miikineeyawuu nì bipunyɔɔciitiliibi Oobeedi-Eedoom nì Yeeyiyeel. 19Bilaŋgaakpilib Eeman nì Asaafi nì Eetan di nìn bɔ̀ɔ́ tasa kúti cancakantib bin siim pɔ̄ɔ̄yee. 20Seekariya nì Asiyeel nì Seemiiramooti nì Yeeyeel nì Unii nì Eeliyaab nì Maseeyawuu nì Beenayawuu di nìn bɔ̀ɔ́ tibati tin siim sá kineewaai siimee. 21Mataatiyawuu nì Eeliifileewuu nì Miikineeyawuu nì Oobeedi-Eedoom nì Yeeyiyeel nì Asaasiyawuu di nìn bɔ̀ɔ́ saŋgub bin sá nneen ŋun nyìm̀ee siim bi cáa kífí ilanee. 22Keenaniyawuu un sá Leefii yab kpiliuee ní bi nìn dū dakaa túntam tundi ki ŋúbiǹ, kun puee u nìn baasii nyí ditundi gbanti tiŋan ní. 23Beereekiya nì Eelkana di nìn sá Unimbɔti dakaau punyɔkɔciitiliibi, 24bi nì Oobeedi-Eedoom nì Jeeya. Bisaraaŋaliibi Seebaniya nì Joosafaati nì Neetaneeyeel nì Amasaayi nì Seekariyawuu nì Beenayawuu nì Eeliyeeseer di nìn búǹ akantán ki līī Unimbɔti dakaau nyɔkɔpu.

Bi cáań ti-Dindaan dakaau Jeerusaleem

(Kpèè 2 Sami 6.12-19)

25Daafiidi nì Isirayeel tindaŋkpilib nì bijanjakpilib nìn nín cá kí yòon̄ní ti-Dindaan dakaau Oobeedi-Eedoom dumpu. Bi-kɔkɔ nìn bí mmɔŋkpaan poon. 26Unimbɔti nìn wúń Leefii yab bin nìn tú Dakaayee pu. Niinee ní bi kūū inajaa iluli nì ipijaa iluli ki ŋá Unimbɔti saraa. 27Daafiidi nìn pēē iŋaabu in bí fálfalee bɔkutifɔkɔl. Leefii yab bin kɔkɔ nìn tú dakaayee nì bilaŋgaaliibi nì Keenaniyawuu un nìn sá bin tú dakaayee kpiliuee nìn pēē tiwambaantiil kii ubɔtee ní. Daafiidi nìn gíti dū bisaraaŋaliibi satab bin bi dū ŋŋaabu ŋun bí fálfal ki ŋáĺee ki páaǹ. 28Isirayeel yab kɔkɔ nìn cáá ti-Dindaan Poondi dakaau ki cūnnì Jeerusaleem tiŋkin ki gbáà iwiliili, ki búǹ iyin nì akantán, ki cákafí cancakantib ní ki bɔ̀ɔ́ tibati nì saŋgub an tùm̀ dàii. 29Ŋyunti ŋun ní bi cáá ti-Dindaan Poondi dakaau ki bàn̄ <Daafiidi Tiŋkinee>, Saayuul bisal Miikaal gbóoń tɔkɔla ki kpēē ní ki ká Ubɔti Daafiidi bí ki ŋōō nì dipɔɔpindi. Niinee ní u kpēē ki sīŋkiǹ-u u-pɔbilin.

Currently Selected:

1 Chroniques 15: BASSARDC

Highlight

Copy

Compare