HOSEA, 4
4
O LE MATAUPU IV.
O le toasa o le Atua i e agasala.
1Le fanauga a Isaraelu e, ia outou faalogologo mai i le afioga a Ieova; auā o loo ia Ieova le finauga ma e o nonofo i le nuu; auā e leai se faamaoni, e leai se alofa, e leai foi se na te iloa le Atua i le nuu. 2O loo o tauto, ma tala pepelo, ma fasioti tagata, ma gaoi, ma mulilua, ua latou faasaua lava, ua fepaia‘i toto. 3O le mea lea e faanoanoa ai le nuu, e tauāu ina vaivai o i latou uma o e nonofo ai; atoa ma manu vaefa, ma manu felelei, e mavae atu foi lava o i‘a o le sami. 4A e aua ne‘i i ai se tagata e finau atu, ma aoai atu i se tasi tagata; auā o lou nuu ua pei o e fefinauai ma le ositaulaga. 5O lea e te paū ai i le ao, e pauu foi le perofeta faatasi ma oe i le po; ou te fasioti foi lou tinā. 6Ua faaumatia lo‘u nuu ina ua leai se poto; o oe foi na e tetee atu i le poto, o le mea lea ou te tetee atu ai ia te oe, e le fai oe ma ositaulaga ia te au; ua e faagalogalo le tulafono a lou Atua, o a‘u foi, ou te faagalogalo i lau fanau. 7E pei ona faatoateleina o i latou, ua faapea ona agasala mai o i latou ia te au; ou te liliu i le mā lo latou mamalu. 8Ua latou aai le agasala a lo‘u nuu, ma ua latou naunau i lo latou leaga. 9E oo ina gatusa lava o le nuu ma le ositaulaga; ou te taui atu foi ia te i latou a latou amio, ou te taui foi ia te i latou a latou mea ua fai. 10Auā latou te aai, a e le maoona; e faitaaga i latou, a e le faatoateleina; auā ua le toe usiusitai i latou ia Ieova. 11O le faitaaga, ma le uaina, ma le uaina fou e aveeseina ai le loto. 12O lo‘u nuu ua latou fesili i lo latou laau; ua faasino mai ai lo latou tootoo ia te i latou; auā o le fia faitaaga ua faaseseina ai i latou, ma ua latou o ese nai lo latou Atua e faitaaga ai. 13Ua latou faitaulaga i tumutumu o mauga, ma faamu mea manogi i mea maupuepue, ma lalo ifo o aluna, ma lipeno, ma tapeneto, auā ua lelei lo latou paolo; o le mea lea e faitaaga ai o outou afafine, e mulilulua foi a outou avā. 14Ou te le faasalaina o outou afafine pe a latou faitaaga, ma a outou avā pe a latou mulilulua; auā o i latou lava ua latou o ese faatasi ma fafine faitaaga, ua latou faitaulaga faatasi ma fafine talitane; o le nuu foi ua le mafaufau e pauu i latou.
15Isaraelu e, e ui ina e faitaaga, a e aua ne‘i agasala Iuta; aua tou te o mai i Kilikala, aua tou te o ae i Petavene, aua foi tou te tauto, O loo soifua Ieova. 16Auā e faapei ona vaogata o se povi fafine taanoa, ua faapea ona vaogata o Isaraelu; a e fagaina i latou i nei ona po e Ieova e faapei o se tamai mamoe i le mea lautele. 17Ua pipii Efaraima i tupua; ina tuu ai pea ia ia te ia. 18A uma lo latou inuga‘ava, ua matuā faitaaga i latou; ua loto atu o latou alii i mea e masiasi ai. 19Ua saisaitia o ia e le matagi i ona apaau, e masiasi foi i latou ona o a latou taulaga.
Currently Selected:
HOSEA, 4: SOV
Highlight
Share
Copy
Want to have your highlights saved across all your devices? Sign up or sign in
Samoan Edited Old Version © Bible Society of the South Pacific, 2017.
