HOSEA, 5
5
O LE MATAUPU V.
O le toasa o le Atua i tagata uma o Isaraelu.
1Le au ositaulaga e, faalogologo mai ia i lenei mea. Le aiga o Isaraelu e, ina faalogologo mai ia. Le aiga o le tupu e, ina liliu mai ia o outou fofoga, auā ua faasalaina outou, ua avea outou ma matāsele i Mesepa, ma upega ua folasia i Tapora. 2Ua faateleina le fasi e i latou ua liliu ese, a o a‘u, ou te aoai atu ia te i latou uma. 3O a‘u ua ou iloa Efaraima, o Isaraelu foi ua le lilo lava ia ia te au; auā, Efaraima e, ua e faitaaga nei, ua leaga Isaraelu. 4Latou te le sauniuni a latou galuega ina ia latou liliu mai i lo latou Atua; auā o i totonu ia te i latou le fia faitaaga, latou te le iloa Ieova. 5Ua molimau le faamaualuga o Isaraelu i o latou luma, e pauu Isaraelu ma Efaraima i a latou agasala; e paū foi Iuta faatasi ma i latou. 6Latou te o atu ma a latou mamoe ma a latou povi e sailiili atu ai ia Ieova; a e latou te le maua; ua afio ese o ia ia te i latou. 7Ua pepelo i latou ia Ieova; auā ua fanau e i latou a latou tama ese; o le a ‘aina nei i latou, atoa ma o latou tofi i le masina e tasi.
8Ia outou ilia le sofao i Kipea, ma le pu i Rama; ia outou alalaga i Petavene; Peniamina e, o loo mulimuli atu o ia ia te oe. 9E faatafunaina Efaraima i ona po o le aoaiga; ua ou faailoaina atu i itu aiga o Isaraelu, o le upu moni lava. 10O alii o Iuta sa faapei o tagata e sii le tuaoi i latou; ou te liligi atu lo‘u ita faapei o le vai ia te i latou. 11Ua faasauaina Efaraima, ua lomia i le faamasinoga; auā ua usiusitai o ia ma lona loto i le poloaiga. 12O a‘u foi e pei o se mogamoga i Efaraima; e pei o se mea e pala foi i le aiga o Iuta. 13Na iloa e Efaraima lona ma‘i, na iloa foi e Iuta lona manua, ona alu lea o Efaraima i Asuria, na alu lana feau ia Iarepa le tupu; a ua le mafai lava ia te ia ona faamalolo ia te outou, pe faamafuina o outou manua. 14Auā e avea a‘u e pei o se leona ia Efaraima, e pei o se leona taanoa foi i le aiga o Iuta; o a‘u lava ou te saeia ma alu ese, ou te aveesea, e leai foi se na te laveaiina. 15Ou te alu, ou te toe foi lava i le mea ou te nofo ai, seia faasalaina lava i latou, ma latou saili ia te au; latou te vave saili ia te au pe a puapuagatia i latou.
Currently Selected:
HOSEA, 5: SOV
Highlight
Share
Copy
Want to have your highlights saved across all your devices? Sign up or sign in
Samoan Edited Old Version © Bible Society of the South Pacific, 2017.
