Arumi 7

Ajeso ávugulwa kulaa Shariyani

1Mwi enehu mumanyao Shariya, mukale kʼamumanya mwimwi kukala, Shariya yitawala mutʼu achikala u moyo tu bahi? 2Nahuhwaleni mufano wa muche yehwalwa. Shariya yinaamba, muche achihwalwa, niamanye yiye mulumewe hata maisha, ela mulume achifa, yo shariya yinamuvugula. 3Ndo muche yehwalwa, atoroswapho ni mulume munjine na mulumewe mwenye ucheri moyo, ukala unazinga. Ela yiye mulumewe achifa, shariya yinamuvugula, na kʼatarwa unazinga ahwalwapho kahiri. 4Ndo dza mwimwi enehu a chijeso namwi. Mwimwi mwavugulwa kulaa Shariyani kuchirira cho chifo cha Jeso Kʼirisito. Gariphohendeka gago, muchipata munjine, ariye ni yiye Jeso Kʼirisito yefufulwa ni Mulungu kulaa kuzimu, kwa hata humuhendereni Mulungu madzo maphuphu. 5Siswi phokala hucheri kusagala chimwiri, Shariya yahuhenda hukaze kutuwa tʼamaa mbii zokala hunazo, na malairiroge ni chifo. 6Ela vino hwavugulwa kulaa Shariyani, mana, yo Shariya yokala yidzihufunga, hunga dza kwamba hwayiferera hata vivi hunamuhikirahikira Mulungu na njira mbiphya ya kulongozwa ni yiye Rohowe. Ela tsʼi chihiyo njira ya pʼindi, ambapho hwakala hulongozwa ni Shariya yohendaandikwa.

Ario tsʼini za Shariya ni agayi

7 # Kul 20:17; Kʼumb 5:21 Ndo hwambedze sambi? Vino bee, hwambe Shariya ni dambi? Ngʼo! Vivyo tsʼivyo kamare, hata itsʼiphokala, ndiyonihenda nimanye dambi nini. Mimi tsʼingamanyire kukala, kulavira matso cha musena ni dambi, kalapho Shariya kʼayingaambire, “Utsʼitamani cha munzio.” 8Ela dambi yokala yi mwangu ndani, yahumira lagizo riro, na yichinihenda nihende tʼamaa mbii zosi. Maana, dambi kʼayihenda kazi kuchikala kʼakuna shariya. 9Mimi phokala tsʼimanya ga Shariya, nákala ni muzima chiroho. Ela niriphokudzamanya riratʼu lagizo ra Mulungu, dambi yichizuka, 10na phapho nichifa chiroho. Ndo riro lagizo rokala nirinipʼe uzima, mino raniulaga chiroho. 11#Mwa 3:13Maana, dambi yokala yi mwangu ndani, yahumira lagizo riro yichinilemba, na yichiniulaga chiroho kuchirira lagizo riro. 12Ndo enehu a chijeso, Shariya na malagizoge, bee gálaviwa ni Mulungu mwenye, na chila lagizo ni ra haki, na ni idzo.

13Ndo vino vikale vinaimanisha, chino chitʼu chidzo ndichonirehera chifo? Ngʼo! Vivyo tsʼivyo kamare, hata chonirehera chifo ni dambi kuchirira riro lagizo idzo, kwa hata dambi yimanywe lwazu kukala, ni mbii muno yenye. 14Na tsʼivyo kwakukala, hunamanya kukala, Shariya yi chiroho, ela nichikala tsʼini za Shariya, nicheri mugulwa muhumiki wa dambi. 15#Agal 5:17Mimi nidzamba vivyo kwakukala, gaga nigahendago bee, tsʼigamanya, na gago nigahenzago nihende, tsʼigo nihendago, hata nihenda godzigamena. 16Na nihendapho gotsʼigahenza, vivyo vinaonyesa kukala, ninakubali Shariya ni mbidzo. 17Ndo gago tsʼigahenda mimi mwenye kuhenza, ela gahendwa ni yo dambi yiriyo mwangu ndani. 18Mimi ninamanya mumo mwangu ndani, yaani ndani ya chiratʼu chinivuhacho nihende dambi, kʼamuna idzo. Maana, kuhenza kuhenda madzo ninahenza kamare, ela ninashindwa. 19Mimi ninahenza nihende madzo, ela gago tsʼigo nihendago hata nihenda mai gotsʼigahenza. 20Ndo nihendapho gotsʼigahenza, gago ganaonyesa kukala, tsʼimi nigahendaye, hata gahendwa ni yo dambi yiriyo mwangu ndani. 21Ndo mimi ninaona nina shariya ya kukala, nichamba ninahenza nihende madzo, mai ndigo galairirago. 22Ko kwangu ndani, kunahamirwa ni Shariya yolaviwa ni Mulungu. 23Ela vilungo vya mwiri wangu, vinalongozwa ni shariya yinjine ya dambi, yiriyo yinapingana na yo Shariya yihamirayo moyo wangu. Ndo yiyo shariya ya dambi yilongozayo vilungo vya mwiri wangu, yidzinihenda mufungwawe. 24-25Ndo mimi asena bee ni vivi: mimi mwenye mwiri, bee nihikirahikira Shariya ya Mulungu na moyo wangu tu. Ela chiratʼu chinivuhacho kuhenda dambi, chinanihenda nihikirehikire yo shariya ya dambi. Aa! Heka hata ni mugayi vino mino? Ni ani yendanitivya kulaa mazagazi gano garigo gananiulaga? Naalikwe Mulungu, anitivyaye kuchirira Bwana wehu Jeso Kʼirisito!

Currently Selected:

Arumi 7: CHIDUR

Highlight

Copy

Compare