Arumi 6

Dambi kʼayihutawala kahiri

1Ndo hwambedze sambi? Hwenderere kuhenda dambi kwa Mulungu akaze kuhwonera mbazi muno? 2Ngʼo! Vivyo navitsʼikale kamare! Siswi kʼahufungwa ni dambi kahiri. Kwa vivyo, hundaendereradze kusagala mazagazi ga kuhenda dambi? 3Hebu mukale kʼamumanya mwimwi kukala, siswi hosi huriphobatizwa, hwakala chitʼu chimwenga na Jeso Kʼirisito, na yiye ariphofa, siswi naswi hwakala dza kwamba hudzefa phamwenga naye? 4#Akol 2:12Hʼa bee manyani kukala, siswi hwafa, na hwazikwa phamwenga na Jeso kuchirira kuko kubatizwa, kwa hata husagale mazagazi maphya dza yiye Jeso Kʼirisito arivyofufulwa ni Mulungu kulaa kuzimu na widimiwe wa kwangalaza.

5Ndo kwahivira siswi hwafa phamwenga na Jeso, hakika hundakala na mazagazi maphya vivyo dza vyofufulwa yiye. 6Na hunamanya kukala, viratʼu vyehu vyokala huchisagala phokala kʼahudzangwe kokoka, vyaulagwa ukati Jeso Kʼirisito ariphokotwʼa misumari musalabani. Gago gáhendeka, kwa hata Mulungu alavye nguvu cho chehu chokala chichihuvuha huhende dambi, na phapho hukale kʼahu agulwa ahumiki a dambi kahiri. 7Maana, mutʼu afapho, nikukala tsare na dambi. 8Ndo kwakukala, siswi hunga dza kwamba hwafa phamwenga na Jeso Kʼirisito, hunakuluphira kukala, hundasagala phamwenga naye vivyo. 9Jeso Kʼirisito wafufuka kulaa kuzimu. Ndo vivi hunamanya kukala, kʼandafa kahiri, kwakukala, chifo kʼachimwidima kahiri. 10Maana, Jeso Kʼirisito ariphofa, wawulaga o utawala wa dambi, na vivyo vinatosha tsʼiku zosi, na vivi yiye unasagala mazagazi ga kumuhamira Mulungu tu. 11Mwimwi namwi munahenzwa mudzone dza kwamba mwafa na muchivugulwa kulaa dambini, na vivi munasagala mazagazi ga kumuhamira Mulungu tu, kuchirira Jeso Kʼirisito.

12Ajeso asena, dambi nayitsʼitawale kahiri mwenu mazagazini, na phapho kʼamundakala chimwiri. 13Na mutsʼikubali hata chilungo chimwenga cha miiri yenu chihende mai, yaani dambi. Itsʼiphokala, mwimwi dzilavireni tsetsetse kumuhikirahikira Mulungu dza atʼu ofufulwa ni Mulungu kulaa kuzimu. Na vilavyeni vilungo vyenu vyosi kwa Mulungu, kwa muvihumire kuhenda ga haki. 14Mwimwi kʼamutawalwa ni dambi kahiri, kwakukala, kʼamu tsʼini za shariya, mu tsʼini ya mbazi za Mulungu.

Ajeso niakale agulwa ahumiki a Mulungu

15Ndo hwambedze sambi? Vino bee, huhende dambi kwa kʼahu tsʼini za shariya, hu tsʼini ya mbazi za Mulungu? Ngʼo! Vivyo navitsʼikale kamare! 16Mukale kʼamumanya mwimwi kukala, umutsagulaye kumogopha, ndiye akalaye mubomuo? Bee, tsagulani kutawalwa ni dambi, elako mumanye, malairiroge ni chifo. Hebu mutsagule kumogopha Mulungu, kuriko malairiroge ni kukala na haki. 17Mwimwi ko mulaako mwakala mu agulwa ahumiki a dambi. Ela vino naalikwe Mulungu, kwakukala, mwawogopha na moyo wenu wosi o ujeri wa mafunzo gofunzwa. 18Na naalikwe Mulungu, kwakukala, mwalaviwa ugulwani uhumiki wa dambi, muchiikwa agulwa ahumiki a Mulungu kwa muhende ga haki. 19Mimi ninahumira mufano uo kwakukala, unaeleweka maruru. Mwimwi phokala kʼamudzangwe kumumanya Bwana wenu Jeso, mwadzilavya kukala agulwa ahumiki a dambi, na muchenderera kuhenda mai gosi. Ndo vivi munahenzwa mudzilavye mukale agulwa ahumiki a Mulungu muhende ga haki, kwa hata mukaze kukala atʼue atakatifu jeri.

20Mwimwi phokala mu agulwa ahumiki a dambi, mwakala mu tsare kutsʼahenda ga haki. 21Ukati uo, mwimwi mwahenda mai hata vivi gachihadzwa munagwirwa ni haya. Ndo swali rangu ni, gámufaidisha na utʼu wani gogahenda? Ujeri ni kwamba, kʼagana faida yoyosi, hata malairiroge ni chifo tu bahi. 22Ela vino Mulungu wamulavya ugulwani uhumiki wa dambi, achimuhenda agulwae ahumiki. Ndo vivi muna faida ya kukala, mu atʼue atakatifu jeri, na malairiroge ni uzima uphya wa kare na kare. 23Mutʼu achihenda dambi, unaphokera mushahara wa dambi, urio ni chifo. Ela Mulungu, siswi atʼue unahunosa uzima uphya wa kare na kare kuchirira Bwana wehu Jeso Kʼirisito.

Currently Selected:

Arumi 6: CHIDUR

Highlight

Copy

Compare