Arumi 16
16
Pʼaulo unaalamusa ajeso anjine a Rumi
1Enehu a chijeso, mimi ninahenza nimumanyise ndugu yehu wa chijeso wa chiche Fibi. Yiye unahikirahikira kanisa ririro mudzi wa Kʼenikireya. 2Ndo yiye achifika kuko kwenu, muphokereni kwa dzina ra Bwana, kwakukala, vivyo ndivyo ajeso ahenzwavyo aphokerane. Na chisha, achihenza wavizi wowosi kulaa kwenu, mwavizeni kwakukala, yiye mwenye mwiri bee, mimi udziniaviza, na udzaaviza hata anjine anji.
3 #
Mahe 18:2
Kuko nilamusirani ndugu zangu a chijeso, Pʼirisila na mulumewe Akula. Ao hunahenda kazi mwenga ya kumuhikirahikira Jeso Kʼirisito, 4na ákala razi hata kufa kwa dzulu yangu. Mimi ninaalavira mumvera muno ao, na hata o atʼu a makabila manjine osi ario ni ajeso nao, anaalavira mumvera muno vivyo. 5Nilamusirani hata o ajeso avoyao kwao mudzini. Nilamusirani musena wangu Epʼaineto nimuhenzaye muno. Yiye ndiyekala mutʼu wa kwanza kumukuluphira Jeso Kʼirisito ko jimbo ra Asiya. 6Nilamusirani Maryamu, ariye uhenda kazi na chadi kwa dzulu yenu. 7Nilamusirani Ayahudi asena, Andironiko na Junia, ario hwakala jela hosini. Ao a kati ya o ahumwa a Jeso amanyikanao muno, na mimi ninaokoka, ao ákala adzokoka kare.
8Nilamusirani Amupiliyato. Yiye ni mwenehu wa chijeso nimuhenzaye. 9Nilamusirani Uribano na Sitaku. Uribano hunahenda kazi mwenga ya kumuhikirahikira Jeso Kʼirisito, na Sitaku ni musena wangu nimuhenzaye. 10Nilamusirani Apele, ariye unamanyikana kukala, unamukuluphira Jeso Kʼirisito jeri, na nilamusirani vivyo adamungwa a Arisitobulo. 11Nilamusirani Muyahudi musena Herodiyona, na adamungwa a Narikisi ario ni ajeso.
12Nilamusirani ndugu zangu a chijeso a chiche, Tʼirufena, Tʼirufosa na Pʼerisi nimuhenzaye. Tʼirufena na Tʼirufosa anamuhikirahikira Bwana na chadi, na Pʼerisi wamuhikirahikira Bwana na chadi muno. 13#Mar 15:21Nilamusirani Rufo na ameye. Rufo ni mutʼu yetsagulwa amuhikirehikire Bwana, na yiye ameye ni muchetʼu yedzikala achinihenderatʼo hata dza kwamba ni mwanawe mwenye. 14Nilamusirani Asunikirito, Filegoni, Herime, Pʼatiroba, Herima, na o ndugu zehu a chijeso osi ario phamwenga na ao. 15Nilamusirani Filologo na Juliya, Nerea na nduguye wa chiche, Olimupa na o ndugu zehu osi a chijeso ario phamwenga na ao.
16Ajeso osi kuku anamulamusa, na mwimwi namwi lamusanani kwa kupigana busu takatifu.
Pʼaulo unaambira ajeso a Rumi
17Enehu a chijeso, mwimwi ninamukalata kukala, mudzimanyirire na ao atʼu arehao mugavikano, na kwayaza ajeso kwa kupinga gago mafunzo gofunzwa mwimwi. Atʼu ao mutsʼigwirikane nao, kwakukala, 18kʼaamuhikirahikira Bwana wehu Jeso Kʼirisito, hata o ahenda gago gaahamirago ao enye tu. Atʼu ao anagomba maneno madzo na kulika-lika atʼu otsʼiyuga kulemba. 19Ela mino mwimwi munanihamira, kwakukala, munamogopha Bwana jeri hata gago ganamanywa ni chila mutʼu. Ndo ninamuvoyera mukale na hekima ya kuhenda madzo maphuphu, na mwenderere kutsʼahenda mai kamare. 20Na phapho Mulungu ariye ndiye ahuhendaye hukale na reriye, undamupinduwa Shetani sambi na amwike tsʼini zenu, konyesa urimwa. Bwana wehu Jeso Kʼirisito naenderere kumuhatsʼa.
21 #
Mahe 16:1
Tʼimoti, muhendikazi wa Bwana musena, unamulamusa. Ano Lukiyo, Jasoni na Sosipatiro, ario ni Ayahudi asena, anamulamusa vivyo nao.
22Mimi Tʼeritiyo yedzigwirwa ni Pʼaulo nimwandikire yiyi baruwaye, ninamulamusa nami kwa dzina ra Bwana.
23 #
Mahe 19:29; 1 Akor 1:14;
2 Tʼim 4:20
Gayo, ariye mimi Pʼaulo nikala kwakwe, na chisha ajeso avoya phapha phakwe vivyo, unamulamusa. Erasito, ariye ndiye mwiki wa pʼesa za uu mudzi unamulamusa. Ndugu yehu wa chijeso Kwarito unalamusa vivyo naye.#16:23 Nakala zinjine zinaonjeza fungu ra 24 dza: 24 Bwana wehu Jeso Kʼirisito naamuhatsʼe mosi. Amina.
Pʼaulo unamarigiza na kumulika Mulungu
25Enehu a chijeso, siswi nahumulikeni Mulungu, kwakukala, yiye ndiye aidimaye kumuhenda mwenderere kugwiririra kuluphiro renu kinyi. Gago ndigo gangu godzikala nichigagomba mumo mwangu kusumurirani Nguma Mbidzo. Yiyi Nguma Mbidzo yi dzulu ya Jeso Kʼirisito, na ndio udzumbe okala kʼaumanywa kulaa kare na kare. 26Ela vivi, Mulungu waungʼazira siswi kwa kumuhuma Jeso Kʼirisito. Na hata Maandiko ga agomvi a Mulungu gáusema chimbere, na vivi niusumurirwe kwa atʼu a viryomo vyosi, dza Mulungu ariyeko hata kare na kare arivyolagiza, kwa hata ao atʼu amukuluphire Jeso na kuno anamogopha.
27Ndo nahumulikeni hata kare na kare yiye Mulungu, kwakukala, yiye ndiye Mulungu wa jeri hicheye tu, mwenye hekima yosi. Siswi nahumulikeni hata kare na kare, kwa gohuhendera kuchirira Jeso Kʼirisito! Amina.
Currently Selected:
Arumi 16: CHIDUR
Highlight
Copy
Compare
Share
Want to have your highlights saved across all your devices? Sign up or sign in
