ROMA 2

Ang Matarung nga Paghukom sang Dios

1Busa wala ka sing balibad, O tawo, bisan sin-o ka nga nagahukom; kay sa paghuhom mo sa isa ginatagudilian mo ang imo kaugalingon,#Mat. 7:1; Luc. 6:37. kay ikaw nga nagahukom nagahimo sang amo nga mga butang. 2Aton nahibaloan nga ang paghukom sang Dios sono sa kamatooran batok sa mga nagahimo sang amo nga mga butang. 3Nagaisip ka bala, O tawo, nga nagahukom sa mga nagahimo sang amo nga mga butang apang ikaw nagahimo sang amo, nga makapalagyo ka sang paghukom sang Dios? 4Ukon ginatamay mo bala ang kamanggaran sang iya pagkalolo kag pagpaumud kag pagpailub? Wala ka bala makahibalo nga ang pagkalolo sang Dios nagatuytuy sa imo sa paghinulsul? 5Apang sa imo katig-a kag dimahinulsulon nga tagiposoon nagatipon ka sing kasingkal sa imo kaugalingon sa adlaw sang kasingkal kon ipahayag ang matarung nga paghukom sang Dios. 6Kay sia magahatag sa tagsa ka tawo sono sa iya mga buhat:#Sal. 62:12. 7sa ila nga paagi sa pagpailub sa maayong mga buhat nagapangita sing himaya kag dungug kag pagkadimadinulunton, magahatag sia sing kabuhing walay katapusan; 8apang sa mga mabinahinbahinon kag wala nagatuman sang kamatooran, kondi nagatuman sang pagkadimatarung, may kasingkal kag kaalipungut. 9May kangitngitan kag kasakit sa tagsa ka kalag nga nagabuhat sing malaut, sa Judio sing una kag sa Griego man, 10apang himaya kag dungug kag paghidait sa tagsatagsa nga nagabuhat sing maayo, sa Judio sing una kag sa Griego man. 11Kay ang Dios walay ginapasulabi sa mga tawo.#Deut. 10:17.

12Ang tanan nga nakasala sa walay kasogoan magakawala man sa walay kasogoan, kag ang tanan nga nakasala sa idalum sang kasogoan hukman paagi sa kasogoan. 13Kay indi ang mga nagapamati sang kasogoan amo ang matarung sa atubangan sang Dios, kondi ang mga nagatuman sang kasogoan pakamatarungon. 14Kon ang mga Gentil nga walay kasogoan nagahimo sa kinaugali sang ginakinahanglan sang kasogoan, sila kasogoan sa ila kaugalingon, bisan pa sila walay kasogoan. 15Nagapahayag sila nga ang ginakinahanglan sang kasogoan nasulat sa ila mga tagiposoon, samtang ang ila mga kaisipan man nagasaksi sini kag ang ila mga panghunahuna magasumbung ukon ayhan magaapin sa ila 16sa sadtong adlaw nga ang Dios magahukom sang mga tinago sang mga tawo paagi kay Jesu-Cristo, sono sa akon maayong balita.

Ang mga Judio kag ang Kasogoan

17Apang kon ikaw ginatawag nga Judio kag nagasalig sa kasogoan kag nagapabugal sang imo kaangtanan sa Dios 18kag nakakilala sang iya kabubut-on kag nagasugut sa mga labing maayo, bangud nga naton-an ikaw gikan sa kasogoan, 19kag kon nagasalig nga ikaw manugtuytuy sang mga bulag, kapawa sang mga yara sa kadudulman, 20manugbadlong sang buangbuang, manunudlo sang kabataan, nga sa kasogoan may dagway sang ihibalo kag kamatooran— 21niyan ikaw nga nagatudlo sa iban, wala ka bala nagatudlo sa imo kaugalingon? Ikaw nga nagawali nga ang tawo dili magpangawat, nagapangawat ka bala? 22Ikaw nga nagasiling nga ang tawo dili magpanglahi, nagapanglahi ka bala? Ikaw nga nagakangil-ad sa mga diosdios, nagapangawat ka bala sa mga templo? 23Ikaw nga nagapabugal sa kasogoan, ginapakahuy-an mo bala ang Dios paagi sa imo paglapas sang kasogoan? 24Kay, “Ang ngalan sang Dios ginapasipalahan bangud sa inyo sa tunga sang mga Gentil,”#Isa. 52:5. subong sang nasulat na.

25Ang circuncision matuud may kapuslanan kon ikaw nagatuman sang kasogoan; apang kon ikaw nagalapas sang kasogoan, ang imo circuncision nangindicircuncision. 26Gani, kon ang wala macircuncidar nagabantay sang mga pagsolondan sang kasogoan, indi bala ang iya dicircuncision maisip nga circuncision? 27Niyan ang wala macircuncidar nga sa kinaugali apang nagatuman sang kasogoan magatagudili sa imo nga may nasulat nga kasogoan kag circuncision apang nagalapas sang kasogoan. 28Kay indi sia matuud nga Judio nga amo sa gowa lamang, ukon matuud nga circuncision nga amo sa gowa kag sa unud. 29Sia Judio kon sa sulud amo sia, kag ang matuud nga circuncision amo ang sa tagiposoon, ang sa espiritu kag indi sa letra. Ang pagdayaw sa iya indi gikan sa mga tawo kondi sa Dios.

Currently Selected:

ROMA 2: ABHIL82

Highlight

Copy