ROMA 3

1Niyan ano bala ang kinalabaw sang Judio? Ukon ano bala ang kapuslanan sang circuncision? 2Madamu sa tagsa ka bagay. Nahauna sa tanan, gintugyanan ang mga Judio sang mga pinamolong sang Dios. 3Ano bala kon ang iban walay pagtoo? Magapakawalay pulus bala ang ila pagkakulang sing pagtoo sang pagkatutum sang Dios? 4Malayo ina! Pakamatooron ang Dios bisan ang tagsa ka tawo butigon, subong sang nasulat na,

“Agud nga pakamatarungon ka sa imo mga polong,

kag magdaug kon ikaw paghukman.”#Sal. 51:4.

5Apang kon ang aton pagkadimatarung nagapakilala sang pagkamatarung sang Dios, ano bala ang aton isiling? Dimatarung bala ang Dios nga nagapaduaw sa aton sing kasingkal? (Nagahambal ako sing tawohanon.) 6Malayo ina! Kay niyan paano bala ang paghukom sang Dios sang kalibutan? 7Apang kon paagi sa akon butig, ang kamatooran sang Dios nagabugana nga sa iya himaya, ngaa bala ginatagudilian pa ako subong nga makasasala? 8Kag ngaa bala indi paghimoon ang malaut agud mag-abut ang maayo?—subong nga ginasumbong sing binutig sang mga tawo nga kami nagasiling. Ang pagtagudili sa ila matarung.

Walay Sin-o nga Matarung

9Niyan ano bala? Maayo pa bala kita nga mga Judio sa ila? Indi, bisan sa ano nga bagay; kay ginsumbung ta na nga ang tanan nga tawo, ang mga Judio kag mga Griego, sa idalum sang gahum sang sala, 10subong sang nasulat na:

“Walay bisan sin-o nga matarung, wala, bisan isa;

11walay bisan sin-o nga nagahangup, walay bisan sin-o nga nagapangita sa Dios.

12Sila tanan naglipas, nanginwalay pulus sila sing tingub;

walay bisan sin-o nga nagahimo sing maayo, bisan isa lamang.”#Sal. 14:1-3; 53:1-3.

13“Ang ila mga totonlan lulubngan nga bukas,

sa ila mga dila nagagamit sila sing limbong.”#Sal. 5:9.

“Ang dalit sang mga man-ug yara sa idalum sang ila mga bibig.”#Sal. 140:3.

14“Ang ila baba puno sang pagpakamalaut kag kapaitan.”#Sal. 10:7.

15“Ang ila mga tiil madagmit sa pagpaagay sing dugo,

16kalaglagan kag kamusmusan yara sa ila mga banas,

17kag ang dalan sang paghidait wala nila makilala.”#Isa. 59:7-8.

18“Walay kahadluk sa Dios sa atubangan sang ila mga mata.”#Sal. 36:1.

19Karon aton nahibaloan nga ang bisan ano nga ginasiling sang kasogoan ginapamolong sa mga yara sa idalum sang kasogoan, agud nga matakpan ang tagsa ka baba, kag ang bug-os nga kalibutan masakup sa paghukom sang Dios. 20Bangud nga paagi sa mga buhat sang kasogoan walay unud nga pagpakamatarungon sa atubangan niya#Sal. 143:2; Gal. 2:16. kay paagi sa kasogoan nagaabut ang pagkilala sang sala.

Ang Pagkamatarung paagi sa Pagtoo

21Apang karon luwas sa kasogoan ang pagkamatarung sang Dios napahayag, bisan ginasaksihan sang kasogoan kag sang mga manalagna, 22ang pagkamatarung sang Dios paagi sa pagtoo kay Jesu-Cristo#Gal. 2:16. sa tanan nga nagatoo. Kay walay ginkalainan; 23sanglit ang tanan nagpakasala kag nawad-an sang himaya sang Dios, 24sila ginpakamatarung sa walay bayad paagi sa iya bugay, sa pagtubus nga yara kay Cristo Jesus, 25nga ginpahayag sang Dios nga katumbasan paagi sa iya dugo, nga batonon sa pagtoo. Ini sa pagpakita sang pagkamatarung sang Dios, bangud sang diosnon nga pagpaumud ginpaligad niya ang una nga mga sala; 26ini sa pagpamatuud sang iya pagkamatarung sa karon nga dag-on nga ginapakamatarung niya ang may pagtoo kay Jesus.

27Niyan diin bala ang aton pagpabugal? Ginsikway ini. Sa ano bala nga kasogoan? Sa kasogoan sang mga buhat? Indi, kondi sa kasogoan sang pagtoo. 28Kay ginaisip ta nga ang tawo ginapakamatarung paagi sa pagtoo luwas sa mga buhat sang kasogoan. 29Ukon ang Dios ila lamang bala sang Judio? Indi bala Dios sang mga Gentil man? Hoo, sang mga Gentil man, 30sanglit ang Dios isa; kag magapakamatarung sia sang circuncidado bangud sang ila pagtoo kag sang dicircuncidado bangud sang ila pagtoo. 31Niyan ginapakawalay pulus ta bala ang kasogoan paagi sa pagtoo? Malayo ina! Hinonoo, ginapalig-on naton ang kasogoan.

Currently Selected:

ROMA 3: ABHIL82

Highlight

Copy