ROMA 15

1Kita nga mabakud dapat magdala sang mga kaluyahon sang mga maluya, kag dili magpahamuut sa aton kaugalingon; 2ang tagsa sa aton magpahamuut sa iya isigkatawo sa maayo, sa pagpalig-on sa iya. 3Kay si Cristo wala magpahamuut sa iya kaugalingon; kondi, sono sa nasulat na, “Ang mga pasipala sang mga nagpasipala sa imo nagtupa sa akon.”#Sal. 69:9. 4Kay ang bisan ano nga nasulat sadto anay ginsulat sa pagtudlo sa aton, agud nga paagi sa pagkalig-on kag pagpabakud sang mga kasulatan may paglaum kita. 5Ang Dios sang pagkalig-on kag pagkabakud magtugut sa inyo nga mangin-isa kamo sing hunahuna sa isa kag isa, sono kay Cristo Jesus, 6agud nga sa tingub mahimaya ninyo sa isa ka tingug ang Dios kag Amay sang aton Ginoong Jesu-Cristo.

Ang Maayong Balita sa mga Gentil

7Busa magbinatonay kamo, subong nga si Cristo man nagbaton sa inyo, nga sa himaya sang Dios. 8Kay nagasiling ako sa inyo nga si Cristo nahimo nga alagad sa nacircuncidar sa pagpakita sang pagkamaminatud-on sang Dios, agud nga mapamatud-an niya ang mga saad sa mga patriarca, 9kag agud nga ang mga Gentil maghimaya sa Dios tungud sang iya kalooy. Subong sang nasulat na,

“Busa magadayaw ako sa imo sa tunga sang mga Gentil,

kag magaamba sa imo ngalan”,#2 Sam. 22:50; Sal. 18:49.

10kag liwat ginasiling,

“Magkalipay, kamo nga mga Gentil, kaupud sang iya katawohan”;#Deut. 32:43.

11kag liwat,

“Dayawa ang Ginoo, tanan nga Gentil,

kag magdayaw ang tanan nga katawohan sa iya”;#Sal. 117:1.

12kag liwat si Isaias nagsiling,

“Magalutaw ang gamut ni Jese,

sia nga nagatindug sa paggahum sa mga Gentil;

sa iya ang mga Gentil magalaum.”#Isa. 11:10.

13Kabay ang Dios sang paglaum magpuno sa inyo sing bug-os nga kalipay kag paghidait sa pagtoo, agud nga magbugana kamo sa paglaum sa gahum sang Espiritu Santo.

14Ako contento nahanungud sa inyo, mga kauturan, nga kamo gid napun-an sang pagkaayo, napun-an sang bug-os nga ihibalo, kag sarang sa paglinaygayay. 15Apang nagasulat ako sa inyo sing masidla pa sa iban nga bahin sa pagpahanumdum sa inyo, bangud sang bugay nga ginhatag sa akon sang Dios 16nga mangin-alagad ako ni Jesu-Cristo sa mga Gentil sa sinacerdote nga panghikot sang maayong balita sang Dios, agud nga ang paghalad sang mga Gentil manginkalahamut-an, nga ginpakabalaan sang Espiritu Santo. 17Niyan sa kay Cristo Jesus may akon ako nga pagpabugal sang akon buluhaton nahanungud sa Dios. 18Kay indi ako magpangahas sa paghambal sang bisan ano luwas sadto nga nahimo ni Cristo paagi sa akon nga sa pagpatuman sang mga Gentil, paagi sa polong kag buhat, 19sa gahum sang mga tanda kag kalatingalahan, sa gahum sang Espiritu Santo, sa bagay nga kutub sa Jerusalem kag sa palibut tubtub sa Ilirico nawali ko sing bug-os ang maayong balita ni Cristo, 20sa amo ginahimo ko nga akon katuyoan ang pagwali sang maayong balita, indi sa diin si Cristo nahingadlan na, agud nga indi ako magtukud sa ibabaw sang sadsaran sang iban, 21apang subong sang nasulat na,

“Sila nga wala maabuti sang maayong balita nahanungud sa iya makakita,

kag ang mga wala makabati makahangup.”#Isa. 52:15.

Si Pablo Nagabuko sa Pagduaw sa Roma

22Amo ini ang kabangdanan nga sa masunsun nasablagan ako sa pagkara sa inyo.#Roma 1:13. 23Apang karon, sanglit nga wala na ako sing duug nga pangabudlayan sa sining kadutaan, kag sanglit nga nagahandum ako sa pagkara sa inyo sa sining madamu nga tuig, 24nagalaum ako sa pagpakigkita sa inyo sa akon pag-agi pakadto sa España, kag pagpatigayonon ako ninyo sa akon pagpakadto didto, kon nakapangalipay na ako sing malip-ot kaupud ninyo. 25Apang karon, nagapakadto ako sa Jerusalem nga nagadala sing bulig sa mga balaan. 26Kay nahamut-an sang Macedonia kag Acaya ang pag-amut tungud sa mga imol sa mga balaan sa Jerusalem;#1 Cor. 16:1-4. 27nahamut-an nila ang paghimo sini, kag sila sa pagkamatuud may utang sa ila, kay kon ang mga Gentil nangin-umalambit sang mga kabulahanan nila nga espirituhanon, dapat man sila mag-alagad sa ila sa mga kabulahanan nga lawasnon.#1 Cor. 9:11. 28Busa kon matapus ko ini, kag mahatag sa ila ang natipon, magaagi ako dira sa inyo pa España; 29kag nahibaloan ko nga kon magkara ako sa inyo magakara ako sa kabug-osan sang pagpakamaayo ni Cristo.

30Ginapakilooy ko sa inyo, mga kauturan, bangud sa aton Ginoong Jesu-Cristo kag bangud sa gugma sang Espiritu, nga magpanikasug kamo sing tingub kaupud nakon sa inyo mga pangamuyo sa Dios tungud sa akon, 31agud nga maluwas ako sa mga dimatinoohon sa Judea, kag ang akon pagpanghikot tungud sa Jerusalem mahamut-an sa mga balaan, 32agud nga magakara ako sa inyo sa kalipay paagi sa kabubut-on sang Dios kag makapahuway kaupud ninyo. 33Ang Dios sang paghidait manginkaupud ninyo nga tanan. Kabay pa.

Currently Selected:

ROMA 15: ABHIL82

Highlight

Copy