ROMA 14

Ang mga Maluya sa Pagtoo

1Batona ninyo ang tawong maluya sa pagtoo, apang indi sa pagpinuyas sa mga painoino. 2Ang isa nagatoo nga makakaon sia sang bisan anong butang, samtang ang maluyang tawo nagakaon sing mga utan lamang. 3Ang nagakaon indi magtamay sa wala nagakaon, kag ang wala nagakaon indi maghukom sa nagakaon; kay nabaton sia sang Dios. 4Sin-o ka bala nga nagahukom sang alagad sang isa? Sa iya kaugalingon nga agalon nagatindug ukon nagakapukan sia. Kag patindugon sia, kay ang Ginoo may gahum sa pagpatindug sa iya.

5Ang isa ka tawo nagakabig sang isa ka adlaw nga labaw sa isa, samtang ang isa nagakabig sing alangay sang tanan nga adlaw. Ang tagsa ka tawo maglig-on sing bug-os sa iya kaugalingon nga hunahuna. 6Ang nagapakamahal sang adlaw, nagapakamahal sini sa Ginoo. Ang nagakaon man, nagakaon sa kadungganan sang Ginoo, kay nagapasalamat sia sa Dios; samtang ang wala nagakaon, wala nagakaon sa kadungganan sang Ginoo kag nagapasalamat sa Dios.#Col. 2:16. 7Walay bisan sin-o sa aton nga nagakabuhi sa iya kaugalingon, kag walay bisan sin-o nga nagakapatay sa iya kaugalingon. 8Kon kita nagakabuhi, nagakabuhi kita sa Ginoo, kag kon kita nagakamatay, nagakamatay kita sa Ginoo; gani niyan, bisan kita nagakabuhi ukon nagakamatay, iya kita sang Ginoo. 9Kay sa sining katuyoan napatay si Cristo kag nabuhi liwat, agud nga mangin-Ginoo sia sang mga patay kag sang mga buhi.

10Ngaa bala nagahukom ka sa imo utud? Ukon ikaw, ngaa bala nagatamay ka sang imo utud? Kay tanan kita magaatubang sa lingkoran nga hukmanan sang Dios;#2 Cor. 5:10. 11kay nasulat na,

“Sa nagakabuhi ako, nagasiling ang Ginoo, magapilo ang tagsa ka tuhud sa akon,

kag ang tagsa ka dila magadayaw#14:11 Ukon magatu-ad. sa Dios.”#Isa. 45:23.

12Gani ang tagsatagsa sa aton magahatag sing husay sang iya kaugalingon sa Dios.

13Niyan indi na kita maghinukmanay, kondi magtapat kita nga indi gid magbutang sing kasandaran ukon kasablagan sa dalanon sang iya utud. 14Nakahibalo ako kag natalupangdan sa kay Ginoong Jesus nga walay bisan anong butang nga dimatinlo sa iya kaugalingon; kondi dimatinlo ini sa kay sin-o nga nagahunahuna nga ini dimatinlo. 15Kon bangud sang imo ginakaon ang imo utud ginasub-an, wala ka na nagagawi sa gugma. Dili mo paglaglagon bangud sa imo ginakaon sia nga tungud sa iya napatay si Cristo. 16Gani dili pag-ipahimalaut ang inyo maayo. 17Kay ang ginharian sang Dios indi pagkaon kag pag-inum kondi pagkamatarung kag paghidait kag kalipay sa Espiritu Santo; 18ang nagaalagad sing subong kay Cristo kalahamut-an sa Dios kag ginapakamaayo sang mga tawo. 19Niyan sondon ta ang nagahimo nga sa paghidait kag sa pagpalig-on sa isa kag isa. 20Dili paglaglaga, tungud sa pagkaon, ang buhat sang Dios. Ang tanan nga butang matuud matinlo, apang malaut sa tawo nga nagapasandad bangud sa iya ginakaon; 21maayo nga indi magkaon sing unud ukon mag-inum sing alak ukon maghimo sing bisan ano nga nagapasandad sa imo utud [ukon nagapasaklaw ukon nagapaluya]. 22Ang pagtoo nga yara sa imo, tipigi sa tunga sang imo kaugalingon kag sang Dios; malipayon ang wala nagahukom sa iya kaugalingon sa sina nga iya ginapakamaayo. 23Apang ang nagaduhaduha ginatagudilian, kon magkaon sia, bangud nga nagakaon sia nga indi gikan sa pagtoo; kay ang bisan ano nga indi gikan sa pagtoo sala.

Currently Selected:

ROMA 14: ABHIL82

Highlight

Copy