ROMA 16

Kaugalingon nga mga Pag-abiabi

1Ginapakilala ko sa inyo ang aton utud nga babayi nga si Febe, nga diaconisa sang iglesia sa Cencreas, 2nga batonon ninyo sia sa Ginoo nga nagakaigo sa mga balaan, kag nga inyo sia buligan sa bisan ano nga may kinahanglan sia sa inyo, kay sia gid mabinuligon sa madamu kag sa akon kaugalingon man.

3Abiabiha ninyo si Priscila kag si Aquila,#Binu. 18:2. nga akon mga masigkamanugpangabudlay kay Cristo Jesus, 4nga tungud sa akon kabuhi ginpakatalagman nila ang ila kaugalingon nga kabuhi, kag indi lamang ako ang nagapasalamat sa ila kondi man ang tanan nga iglesia sang mga Gentil; 5abiabiha man ang iglesia nga yara sa ila balay. Abiabiha ang akon hinigugma nga si Epeneto, nga amo ang nahauna nga pinaliso sa Asia kay Cristo. 6Abiabiha si Maria, nga nagpangabudlay sing madamu sa inyo. 7Abiabiha si Andronico kag si Junia, nga akon mga himata kag mga masigkabinilanggo ko; bantug sila nga mga tawo sa mga pinadala, nga sila man kay Cristo una sa akon. 8Abiabiha si Amplias, nga hinigugma ko sa Ginoo. 9Abiabiha si Urbano, nga aton masigkamanugpangabudlay kay Cristo, kag ang akon hinigugma nga si Staquis. 10Abiabiha si Apeles, nga kalahamut-an kay Cristo. Abiabiha ang mga sa panimalay ni Aristobulo. 11Abiabiha si Herodion nga akon himata. Abiabiha ang mga sa panimalay ni Narciso, nga yara sa Ginoo. 12Abiabiha si Trifena kag si Trifosa, nga nagapangabudlay sa Ginoo. Abiabiha ang hinigugma nga si Persida, nga nagpangabudlay sing daku sa Ginoo. 13Abiabiha si Rufo#Mar. 15:21. nga pinili sa Ginoo, kag ang iya iloy kag akon. 14Abiabiha si Asincrito, si Flegonte, si Hermes, si Patrobas, si Hermas, kag ang mga kauturan nga kaupud nila. 15Abiabiha si Filologo, si Julia, si Nereo kag ang iya utud nga babayi, kag si Olimpas, kag ang tanan nga balaan nga kaupud nila. 16Mag-abiabihay kamo nga may balaan nga haluk. Nagaabiabi sa inyo ang tanan nga iglesia ni Cristo.

17Ginapakilooy ko sa inyo, mga kauturan, tanda-i ninyo ang mga ginakabangdanan sang pagbinahinbahin kag mga kabudlayan, batok sa pagtolon-an nga inyo naton-an; magpahilayo kamo sa ila. 18Kay ang mga subong wala nagaalagad sa aton Ginoong Cristo, kondi sa ila tiyan, kag paagi sa ila matanlas kag matahum nga hambal ginalimbongan nila ang mga tagiposoon sang mga bunayag. 19Kay ang inyo pagkamatinumanon naglapnag sa tanan nga tawo, gani nagakalipay ako sa inyo, kag buut ko nga magmaalam kamo sa maayo kag magwalay daya sa malaut; 20niyan ang Dios sang paghidait magdugmok sa madali kay Satanas sa idalum sang inyo mga tiil. Ang bugay sang aton Ginoong Jesu-Cristo manginkaupud ninyo.

21Nagaabiabi sa inyo si Timoteo,#Binu. 16:1. nga akon masigkamanugpangabudlay: amo man si Lucio kag si Jason kag si Sosipater, nga akon mga himata.

22Ako si Tercio, nga nagasulat sining sulat, nagaabiabi sa inyo sa Ginoo.

23Nagaabiabi sa inyo si Gayo,#Binu. 19:29; 1 Cor. 1:14. nga akon tagbalay kag sang bug-os nga iglesia. Nagaabiabi sa inyo si Erasto,#2 Tim. 4:20. nga tulugyanan sang cuarta sang banwa, kag ang utud nga si Cuarto. [24Ang bugay sang aton Ginoong Jesu-Cristo manginkaupud ninyong tanan. Kabay pa.]

Kahingapsan nga Pagdayaw sa Dios

25Karon sa iya nga sarang sa pagpalig-on sa inyo sono sa akon maayong balita kag sa pagwali nahanungud kay Jesu-Cristo, sono sa bugna sang tinago nga gintipigan sing hipus sa malawig nga mga katuigan 26apang karon ginapahayag kag paagi sa mga kasulatan sang mga manalagna, sono sa sogo sang Dios nga walay katapusan, ginpakilala sa tanan nga kapungsuran nga sa pagtuman sang pagtoo— 27sa Dios lamang nga maalam paagi kay Jesu-Cristo, sa iya ang himaya sa gihapon! Kabay pa.

Currently Selected:

ROMA 16: ABHIL82

Highlight

Copy