ROMA 12

Ang Pagpakilooy nga Magpahanungud

1Busa ginapakilooy ko sa inyo, mga kauturan, bangud sang mga kalooy sang Dios, sa pagdolot sang inyo mga lawas subong nga halad nga buhi, balaan kag kalahamut-an sa Dios, nga amo ang inyo espirituhanon nga pagsimba. 2Dili kamo magpauyon sa sining kalibutan kondi magbalhin kamo paagi sa pagbag-o sang inyo painoino, agud nga inyo matilawan kon ano ang maayo kag kalahamut-an kag himpit nga kabubut-on sang Dios.

Ang Paggamit sang mga Hiyas nga Espirituhanon

3Kay paagi sa bugay nga ginhatag sa akon nagasiling ako sa tagsa ka tawo nga yara sa inyo nga dili maghunahuna sang iya kaugalingon sing mataas pa sa dapat niya paghunahunaon, kondi maghunahuna sing but-anan, sono sa talaksan sang pagtoo nga ginbahin sang Dios sa tagsa ka tawo. 4Kay subong nga may madamu kita nga bahin sa isa ka lawas, kag ang tanan nga bahin indi isa lamang sing hilikuton, 5amo man kita, bisan madamu, isa ka lawas kay Cristo,#1 Cor. 12:12. kag ang tagsatagsa kabahin sang isa kag isa. 6Sa may mga hiyas kita nga nagakatuhaytuhay sono sa bugay nga ginhatag sa aton, gamiton naton sila:#1 Cor. 12:4-11. kon sa pagpanagna, sono sa talaksan sang aton pagtoo; 7kon sa pag-alagad, sa aton pag-alagad; ang nagapanudlo, sa iya pagpanudlo; 8ang nagapanglaygay, sa iya pagpanglaygay; ang nagahatag, sa pagka-alwan; ang nagabulig, magmaukud; ang nagakalooy, magmalipayon.

Mga Katungdanan sa Iban

9Magdisalimpapaw ang gugma; kangil-ari ang malaut, magkapyot sing malig-on sa maayo; 10sa gugma sang paghiliutud magmalolo kamo ang isa sa isa; sa kadungganan pasulabihon ang iban. 11Magmakugihon, magmainit sa Espiritu, alagda ang Ginoo. 12Magkalipay sa inyo paglaum, magpailub sa inyo kangitngitan, magpadayon sing malig-on sa pangamuyo. 13Magbulig sa mga kinahanglanon sang mga balaan, magmaabiabihon.

14Pakamaayoha ang mga nagahingabut sa inyo;#Luc. 6:28. magpakamaayo kag dili magpakalaut sa ila. 15Magkalipay kaupud sang mga nagakalipay, maghibi kaupud sang mga nagahibi. 16Mag-isa sing hunahuna; dili magmatinaastaason, kondi magbuylog sa mga kubus; dili magpakamaalam sa inyo kaugalingon nga hunahuna.#Hulu. 3:7. 17Dili magbayad sa bisan kay sin-o sing malaut sang malaut, apang maghimulat sang butang nga dungganon sa atubangan sang tanan nga tawo. 18Kon mahimo, sa masarangan ninyo, magpakighidait sa tanan nga tawo. 19Dili kamo magtimalus, mga hinigugma, kondi pabayai ini sa kasingkal sang Dios; kay nasulat na, “Akon ang pagtimalus, ako ang magatumbas, nagasiling ang Ginoo.”#Deut. 32:35. 20Dili, “kon ang imo kaaway ginagutum, pakaona sia; kon ginauhaw sia, paimna sia; kay sa paghimo mo sini magatumpi ka sing mga baga sa iya olo.”#Hulu. 25:21-22. 21Dili magpadaug sa malaut, kondi dag-a ang malaut paagi sa maayo.

Currently Selected:

ROMA 12: ABHIL82

Highlight

Copy