ROMA 11
11
Ang Nabilin sang Israel
1Niyan nagapamangkot ako, ginsikway bala sang Dios ang iya katawohan? Malayo ina! Ako akon Israelnon, kaliwat ni Abraham, sa kabikahan ni Benjamin.#Filip. 3:5. 2Ang Dios wala magsikway sang iya katawohan nga iya nakilala nga daan. Wala bala ninyo mahibal-i ang ginasiling sang kasulatan nahanungud kay Elias, kon paano nga nagapanumbung sia sa Dios batok sa Israel? 3“Ginoo, ginpatay nila ang imo mga manalagna, ginwagwag nila ang imo mga halaran, kag nabilin ako nga isa lamang, kag ginatinguha nila ang akon kabuhi.”#1 Hari 19:10, 14. 4Apang ano bala ang sabat sang Dios sa iya? “May ginbilin ako nga sa akon nga pito ka libo ka tawo nga wala magpilo sang tuhud kay Baal.”#1 Hari 19:18. 5Gani man sa karon nga tion may nabilin sono sa pagpili sang bugay. 6Apang kon paagi sa bugay, indi na sa mga buhat; sa iban nga bagay ini indi na bugay.
7Niyan ano bala? Ang ginapangita sang Israel wala niya maagum. Ang pinili nakaagum sini, apang ang nabilin ginpatig-a, 8sono sa nasulat na,
“Ang Dios naghatag sa ila sing espiritu sang pagkadimabinatyagon,
mga mata nga indi makakita kag mga dulunggan nga indi makabati,
tubtub sini gid nga adlaw.”#Deut. 29:4; Isa. 29:10.
9Kag si David nagasiling,
“Pabaya-i ang ila piesta nga manginsiod kag tiglapak,
kasandaran kag tumbas sa ila;
10pabaya-i nga magdulum ang ila mga mata agud nga indi sila makakita,
kag magsioktot sa gihapon ang ila mga likod.”#Sal. 69:22-23.
Ang Kaluwasan sang mga Gentil
11Gani nagapamangkot ako, nasandad bala sila agud nga mapukan? Malayo ina! Apang paagi sa ila pagkapukan nag-abut ang kaluwasan sa mga Gentil, sa pagpaimon sang Israel. 12Karon kon ang ila pagkapukan amo ang kamanggaran sang kalibutan, kag kon ang kadulaan nila kamanggaran sang mga Gentil, daw ano pa gid ang bug-os nila nga pagpasakup!
13Karon nagahambal ako sa inyo nga mga Gentil. Niyan sanglit ako pinadala sa mga Gentil, ginapakadaku ko ang akon pagpangabudlay 14agud nga mapaimon ko ang mga masigka-Judio ko, kag sa amo maluwas ang iban sa ila. 15Kay kon ang pagsikway sa ila amo ang pagpasag-uli sang kalibutan, mangin-ano bala ang pagbaton sa ila kondi kabuhi gikan sa mga patay? 16Kon ang nahaunang bahin sang linamas balaan, amo man ang kabilogan; kag kon ang gamut balaan, amo man ang mga sanga.
17Apang kon ang iban sang mga sanga ginbanggi, kag ikaw, talonon nga olivo, ginsumpay sa tal-us nila sa pag-ambit sang kabuganaan sang olivo, 18dili ka magpabugal sa mga sanga. Kon magpabugal ka, dumduma nga indi ikaw ang nagasakdag sang gamut, kondi ang gamut nagasakdag sa imo. 19Magasiling ka, “Ang mga sanga ginbanggi agud nga ako masumpay.” 20Matuud ina. Bangud sang ila pagkadimatinoohon ginbanggi sila, apang ikaw nagatindug sing malig-on paagi lamang sa imo pagtoo. Gani dili ka magmatinaastaason, kondi magmahinadlukon. 21Kay kon ang Dios wala magpaiway sa mga sanga nga unay, indi man sia magpaiway sa imo. 22Niyan tan-awa ang pagkaayo kag ang pagkaid-id sang Dios: pagkaid-id sa mga nagkapukan, apang sa imo, ang pagkaayo sang Dios, kon magpadayon ka sa iya pagkaayo; kay kon indi ikaw man tapson. 23Kag bisan ang iban, kon indi sila magpadayon sa ila pagkadimatinoohon, isumpay, kay ang Dios may gahum sa pagsumpay liwat sa ila. 24Kay kon ikaw gin-utud nga sa kinaugali gikan sa olivo nga talonon, kag ginsumpay, batok sa kinaugali, sa maayong olivo, daw ano pa gid ini sila nga kinaugali nga mga sanga nga isumpay sa ila kaugalingon nga olivo.
Ang Pagpahauli sang Israel
25Buut ko, mga kauturan, nga inyo mahibaloan ining tinago, basi kon magpakaalam kamo sa inyo kaugalingon nga hunahuna: ang pagpatig-a nag-abut sa bahin sang Israel, tubtub ang kabug-osan sang mga Gentil makasulud, 26kag gani ang bug-os nga Israel maluwas; subong sang nasulat na,
“Magagikan sa Sion ang Manluluwas,
sia magapahilayo kay Jacob sang pagkadidiosnon”;#Isa. 59:20.
27“kag ini amo ang akon katipan sa ila
kon kuhaon ko ang ila mga sala.”#Jer. 31:33-34.
28Nahanungud sa maayong balita mga kaaway sila sang Dios, tungud sa inyo; apang nahanungud sa pagpili mga hinigugma sila tungud sa ila mga ginikanan. 29Kay ang mga dolot kag pagtawag sang Dios indi maliwat. 30Kay subong nga kamo sa tion nga nagligad mga dimatinumanon sa Dios apang karon naka-agum sing kalooy bangud sa pagkadimatinumanon nila, 31amo man ini sila karon mga dimatinumanon agud nga paagi sa kalooy nga ginpakita sa inyo sila man makaagum [karon] sing kalooy. 32Kay ginpabayaan sang Dios ang tanan nga tawo sa pagkadimatinumanon, agud nga malooy sia sa tanan.
33O pagkadalum sang kamanggaran kag kaalam kag ihibalo sang Dios! Pagkadimatungkad sang iya mga paghukom kag pagkadimausoy sang iya mga dalanon!
34“Kay si sin-o bala ang nakahibalo sang hunahuna sang Ginoo,
ukon sin-o bala ang nanginmanuglaygay niya?”#Isa. 40:13.
35“Ukon sin-o bala ang nakahatag sa iya sing dolot
agud nga mabayaran sia?”#Job 41:11.
36Kay gikan sa iya kag paagi sa iya kag tungud sa iya ang tanan nga butang. Sa iya ang himaya sa gihapon. Kabay pa.
Currently Selected:
ROMA 11: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
