ROMA 10

1Mga kauturan, ang handum sang akon tagiposoon kag ang akon pangamuyo sa Dios tungud sa ila amo nga maluwas sila. 2Nagasaksi ako sa ila nga may pagkakugi sila tungud sa Dios, apang indi sono sa ihibalo. 3Kay, sa wala nila mahibaloi ang pagkamatarung gikan sa Dios, kag sa nagatinguha sa pagtukud sang ila kaugalingon, wala sila magpasakup sa pagkamatarung sang Dios. 4Kay si Cristo amo ang katapusan sang kasogoan, agud nga mapakamatarung ang tagsatagsa nga may pagtoo.

5Si Moises nagasulat nga ang tawo nga nagahimo sang pagkamatarung nga sono sa kasogoan magakabuhi paagi sini.#Lev. 18:5. 6Apang ang pagkamatarung nga sono sa pagtoo nagasiling, Dili ka magsiling sa imo tagiposoon, “Sin-o bala ang magasaka sa langit?” (kon sayoron, sa pagpapanaug kay Cristo) 7ukon “Sin-o bala ang magapanaug sa kadadalman?” (kon sayoron, sa pagpasaka kay Cristo gikan sa mga patay). 8Apang ano bala ang ginasiling sini? Malapit sa imo ang polong, sa imo baba kag sa imo tagiposoon#Deut. 30:12-14. (kon sayoron, ang polong sang pagtoo nga aton ginawali); 9bangud nga, kon itu-ad mo sang imo baba nga si Jesus Ginoo kag magtoo sa imo tagiposoon nga ang Dios nagbanhaw sa iya, maluwas ka. 10Kay sa tagiposoon ang tawo nagatoo nga sa pagkamatarung, kag sa baba ang pagtu-ad ginahimo nga sa kaluwasan. 11Ang kasulatan nagasiling, “Ang bisan sin-o nga nagatoo sa iya indi pagpakahuy-an.”#Isa. 28:16. 12Kay walay ginkalainan sa Judio kag Griego; kay ang amo nga Ginoo man Ginoo sang tanan kag nagahatag sang iya mga manggad sa tanan nga nagapanawag sa iya. 13Kay, “ang bisan sin-o nga magtawag sa ngalan sang Ginoo maluwas.”#Joel 2:32.

14Apang paano bala ang pagpanawag nila sa iya nga wala nila matoohi? Kag paano bala ang pagtoo nila sa iya nga wala nila mabatii? Kag paano bala ang pagkabati nila kon walay manugwali? 15Kag paano bala ang pagwali nila kon indi sila pag-ipadala? Subong sang nasulat na, “Daw ano katahum sang mga tiil sang mga nagabantala sang maayong balita!”#Isa. 52:7. 16Apang indi ang tanan sa ila nagtuman sang maayong balita; kay si Isaias nagasiling, “Ginoo, sin-o bala ang nagtoo sang amon ginbalita?”#Isa. 53:1. 17Gani ang pagtoo nagaabut gikan sa ginapamatian, kag ang ginapamatian paagi sa polong ni Cristo. 18Apang nagapamangkot ako, wala bala sila makabati? Hoo sa pagkamatuud; kay

“Ang ila tingug naglapnag sa bug-os nga duta,

kag ang ila mga polong tubtub sa mga ukbong sang kalibutan.”#Sal. 19:4.

19Sa liwat nagapamangkot ako, wala bala makahangup ang Israel? Sa nahauna si Moises nagasiling,

“Papaimonon ko kamo sa sinang indi pungsud;

sa pungsud nga nawad-an sing paino-ino paakigon ko kamo.”#Deut. 32:21.

20Niyan si Isaias masidla gid sa pagsiling,

“Nakita ako sang mga wala magpangita sa akon;

nangindayag ako sa mga wala magpamangkot nahanungud sa akon.”#Isa. 65:1.

21Apang nahanungud sa Israel nagasiling sia, “Sa bug-os nga adlaw gin-untay ko ang akon mga kamut sa katawohan nga dimatinumanon kag malalison.”#Isa. 65:2.

Currently Selected:

ROMA 10: ABHIL82

Highlight

Copy