MGA SALMO 9
9
Pagpasalamat bangud sa Pagkatarung sang Dios
Sa pangolong manuglanton: sono sa Mut-laben. Salmo ni David.
1Magapasalamat ako sa Ginoo sa bug-os ko nga tagiposoon;
ipakita ko ang tanan mo nga makatilingala nga binuhatan.
2Magakasadya ako kag magahugyaw sa imo,
magaamba ako sing pagdayaw sa imo ngalan, O ikaw nga Labing Mataas.
3Kon magtalikod ang akon mga kaaway,
sila nagakasandad kag nagakawala sa atubangan mo.
4Kay naapinan mo ang akon kinamatarung kag ang akon kasuayon;
nagalingkod ka sa trono nga nagahukom sing matarung.
5Ginsabdong mo ang mga pungsud, ginlaglag mo ang malauton;
ginpanas mo ang ila ngalan sa gihapon kag sa gihapon.
6Natapus ang mga kaaway sa dayon nga kalaglagan;
ang ila kabanwaanan ginlaglag mo;
bisan ang ila handumanan nawala.
7Apang ang Ginoo nagalingkod subong nga hari sa gihapon,
naaman niya ang iya trono sa paghukom;
8kag sia nagahukom sang kalibutan sa pagkamatarung,
nagahikut sia sing paghukom sa katawohan sa katadlongan.
9Ang Ginoo manginmataas nga torre tungud sa mga pinigus,
mataas nga torre sa mga tion sang kagamo.
10Kag ang mga nakakilala sang imo ngalan magasalig sa imo,
kag ikaw, O Ginoo, wala magbiya sa mga nagapangita sa imo.
11Amba kamo sing mga pagdayaw sa Ginoo, nga nagapuyo sa Sion!
Ipahayag sa mga katawohan ang iya mga hinimoan!
12Kay sia nga nagausisa tungud sa dugo nagadumdum sa ila;
wala sia nagakalimot sang pagtuaw sang mga imol.
13Kalooyi ako, O Ginoo!
Toloka ang akon kapipit-an nga ginaantus ko sa mga nagadumut sa akon,
ikaw nga nagabayaw sa akon gikan sa mga gawang sang kamatayon,
14agud nga mapakita ko ang bug-os mo nga pagdayaw,
sa mga gawang sang babayi nga anak sang Sion
magakalipay ako sa imo kaluwasan.
15Ang mga pungsud naholog sa boho nga ila ginhimo;
sa siod nga ila gintago nasiod ang ila tiil.
16Ang Ginoo nagpakilala sang iya kaugalingon, sia naghimo sing paghukom;
ang malauton ginasiod sa binuhatan sang iya kaugalingon nga mga kamut. Higgaion. Sela
17Ang malauton pataliwanon pa Sheol,
ang tanan nga pungsud nga nagakalimot sa Dios.
18Kay ang may kinawad-on indi malimtan sing dalayon,
ukon ang ginapaabut nga paglaum sang imol mawala sa gihapon.
19Tindug ka, O Ginoo! Indi pagpalandasa ang tawo;
paghukman ang mga pungsud sa imo itololok!
20Pahadluka sila, O Ginoo!
Pakilalaha ang mga pungsud nga sila mga tawo lamang! Sela
Currently Selected:
MGA SALMO 9: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
