MGA SALMO 10
10
Pangamuyo nga Daugon ang Malauton
1Ngaa bala nga malayo ka, O Ginoo?
Ngaa bala nga nagapanago ka sa mga tion sang kagamo?
2Sa bugal sang malauton ang imol ginalagas sing mainit;
ipadakup sila sa mga padugi nga ila ginbuko.
3Kay ang malauton nagapabugal sang handum sang iya tagiposoon,
kag ang mahamkonon nagasikway kag nagatamay sa Ginoo.
4Ang malauton sa bugal sang iya nawung wala nagapangita sa iya;
ang tanan niya nga hunahuna amo, “Wala sing Dios.”
5Ang iya mga dalanon malig-on sa tanan nga tion;
ang imo paghukom mataas sa iya itololok;
nahanungud sa iya mga kasumpung, nagapusnga sia sa ila.
6Nagasiling sia sa iya tagiposoon, “Indi ako mationg;
sa tanan nga kaliwatan indi ako pagpiotan.”
7Puno ang iya baba sang pagpakamalaut kag paglimbong#Roma 3:14. kag pagpigus;
sa idalum sang iya dila yara ang katistis kag kalautan.
8Nagalingkod sia sa mga pulut-an nga duug sang mga minoro;
sa lipud nga mga duug ginapatay niya ang wala sing sala.
Ang iya mga mata nagapanilag sa likum sang maluya,
9nagapalipud sia sa tago subong sang leon sa iya palanagoan;
nagapuut sia sa pagdakup sang mga imol,
ginadakup niya ang imol kon mabuyok niya sia sa iya siod.
10Nagakuub sia, nagahapa sia,
kag ang maluya nagakapukan tungud sa iya mga makusug.
11Nagasiling sia sa iya tagiposoon, “Nalimot ang Dios,
ginapalipdan niya ang iya nawung, indi gid sia makakita sini.”
12Tindug ka, O Ginoo; O Dios, bayawa ang imo kamut;
dili pagkalimti ang mga imol.
13Ngaa bala ginatamay sang malauton ang Dios,
kag nagasiling sa iya tagiposoon, “Dili ka magkinahanglan sini”?
14Nakakita ka sini; kay ikaw nagatan-aw sang pagtistis kag panimalus,
sa pagtimalus sini tungud sa imo kamut;
nagapanugyan sa imo ang maluya;
ikaw nanginmanugtabang sang mga ilo.
15Balia ang butkon sang malauton;
nahanungud sang tawo nga malaut usisaa ang iya pagkamalaut tubtub nga wala ka na sing makita.
16Ang Ginoo hari sa gihapon kag sa gihapon;
ang mga pungsud nagakawala gikan sa iya duta.
17O Ginoo, nabatian mo ang handum sang mga mapainubuson;
ikaw nagaaman sang ila tagiposoon, pabation mo ang imo idulungug
18sa paghukom sang mga ilo kag sang mga pinigus,
agud nga ang tawo sang duta indi na manginkakugmatan.
Currently Selected:
MGA SALMO 10: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
