MGA SALMO 17
17
Pangamuyo nga Apinan batok sa mga Malupigon
Pangamuyo ni David.
1Pamatii ang matarung, O Ginoo; lingga ang akon pagtuaw!
Dungga ang akon pangamuyo nga nagagikan sa mga bibig nga dimalimbongon!
2Maggowa gikan sa imo atubangan ang paghukom sa akon!
Magtolok ang imo mga mata sa pagkatadlong!
3Gintilawan mo ang akon tagiposoon, ginduaw mo ako sa kagab-ihon,
gintilawan mo ako, kag walay bisan anong malaut nga nakita;
nagbuko ako nga ang akon baba indi maglalis.
4Nahanungud sa mga binuhatan sang mga tawo, sa polong sang imo mga bibig
naglikaw ako sa mga dalanon sang malugus.
5Ang akon mga tikang nagpadayon sing malig-on sa imo mga banas,
ang akon mga tiil wala makadanlog.
6Nagpanawag ako sa imo, kay ikaw magasabat sa akon, O Dios;
ilingig sa akon ang imo idulungug, pamatii ang akon hambal.
7Ipahayag sing makatilingala ang imong malig-on nga paghigugma,
O ikaw nga nagaluwas paagi sang imo too nga kamut sang mga nagadangup sa imo
gikan sa mga nagasumpung sa ila.
8Bantayi ako subong sang tawotawo sang mata;
tagoa ako sa landong sang imo mga pakpak,
9gikan sa malauton nga nagapigus sa akon,
ang akon mga kaaway makamamatay nga nagalikup sa akon.
10Naputus sila sa ila tambok;
sa ila mga baba nagapamolong sila sing binugalon.
11Ginalibutan nila kami karon sa tanan namon nga tikang;
ginatolok nila kami sa pagpukan sa amon sa duta.
12Kaangay sia sang leon nga dalok sang iya tinukub,
subong sang totoy nga leon nga nagapalipud sa tago nga mga duug.
13Tindug, O Ginoo! atubanga sila, pukana sila!
Luwasa ang akon kalag sa malauton paagi sa imo espada,
14gikan sa mga tawo paagi sa imo kamut, O Ginoo,
gikan sa mga tawo nga kalibutanon nga ang ila bahin diri sining kabuhi.
Kabay nga ang ila mga tiyan mapuno sang imo bahandi;
kabay mabusug ang ila mga anak;
kabay magabilin sila sang pagkabutang sa ila kabataan.
15Nahanungud sa akon, magatan-aw ako sang imo nawung sa pagkamatarung;
maayawan ako, kon magmata ako, sa pagtan-aw sang imo dagway.
Currently Selected:
MGA SALMO 17: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
