MGA SALMO 18
18
Pagpasalamat Bangud sa Pagluwas
(2 Sam. 22:1-51)
Sa pangolong manuglanton. Salmo ni David nga alagad sang GINOO, nga nagpamolong sa GINOO sang mga polong sining ambahanon sang adlaw nga linuwas sia sang GINOO sa kamut sang tanan niyang kaaway, kag sa kamut ni Saul. Nagasiling sia:
1Ako nagahigugma sa imo, O Ginoo, kusug nakon.
2Ang Ginoo amo ang akon igang, kag akon kuta, kag akon mamamawi,
Dios ko, igang ko, nga sa iya magadangup ko,
taming ko, kag sungay sang akon kaluwasan, mataas kong torre.
3Magapanawag ako sa Ginoo, nga takus dayawon,
sa amo maluwas ako sa akon mga kaaway.
4Ang mga lubid sang kamatayon naglibut sa akon,
ang mga baha sang pagkadidiosnon nagpahadluk sa akon;
5ang mga lubid sang Sheol naglibut sa akon,
ang mga siod sang kamatayon nag-abut sa akon.
6Sa akon kalisdanan nagpanawag ako sa Ginoo;
nagtuaw ako sa akon Dios.
Ginpamatian niya ang akon tingug kutub sa iya templo,
kag ang akon pagtuaw sa atubangan niya naglambut sa iya idulungug.
7Niyan ang duta nag-uyug kag nagkurug;
ang mga sadsaran man sang mga bukid nagtay-ug
kag gin-uyug, bangud nga nagsingkal sia.
8May nagtub-ok nga aso gikan sa iya ilong,
kag ang kalayo gikan sa iya baba naglamon;
ang mga uling ginpadabdab sini.
9Ginpabawud niya ang mga langit man, kag nanaug;
ang pitipit nga kadudulman yara sa idalum sang iya mga tiil.
10Nagsakay sia sa querubin, kag naglupad;
nagtimbook sia sa mga pakpak sang hangin.
11Ginhimo niya ang kadudulman nga iya palanagoan, ang iya layanglayang sa palibut niya,
ang kadudulman sang mga tubig mga gal-um nga madamul sang mga kahawaan.
12Sa kasilaw sa atubangan niya
nag-agi ang iya mga gal-um nga madamul
ang mga ulan nga bilogbilog nga hielo kag mga baga.
13Ang Ginoo man nagdaguub sa mga langit,
kag ang Labing Mataas nagmitlang sang iya tingug,
sing mga ulan nga bilogbilog nga hielo kag mga baga.
14Kag ginpana niya ang iya mga baslay, kag ginpaaplaag sila;
madamu nga kilat, kag gindaug sila.
15Niyan nagpahayag ang mga iligan sang mga tubig,
kag ang mga sadsaran sang kalibutan nabuksan,
sa imo pagsabdong, O Ginoo,
sa pusnga sang ginhawa sang imo ilong.
16Nagpadala sia gikan sa hitaas, ginpakuha niya ako,
ginhaw-as niya ako gikan sa madamung tubig.
17Ginluwas niya ako gikan sa akon kaaway nga makusug,
kag gikan sa mga nagdumut sa akon;
kay sila labi pa kagamhanan sa akon.
18Nag-abut sila sa akon sa adlaw sang akon kalalat-an;
apang ang Ginoo amo ang akon kapag-onan.
19Ginpasulud man niya ako sa masangkad nga duug;
ginluwas niya ako, bangud nga nalipay sia sa akon.
20Ang Ginoo nagbalus sa akon sono sa akon pagkamatarung;
sono sa pagkatinlo sang akon mga kamut gintumbasan niya ako.
21Kay nabantayan ko ang mga dalanon sang Ginoo,
kag wala magbiya sing malauton sa akon Dios.
22Kay ang tanan niyang pagsolondan yari sa atubangan ko,
kag wala ko ginasikway ang iya mga palatukuran.
23Ako man himpit sa iya,
kag nagpalayo ako sa akon kalautan.
24Busa ang Ginoo nagtumbas sa akon sono sa akon pagkamatarung,
sono sa pagkatinlo sang akon mga kamut sa iya panolok.
25Sa maloloy-on magpakita ka nga maloloy-on;
sa himpit nga tawo magpakita ka nga himpit;
26Sa putli magpakita ka nga putli;
kag sa balingag magpakita ka nga balingag.
27Kay luwason mo ang mga tawo nga napiotan;
apang imo papaubson ang mga palabilabihon.
28Kay sindihan mo ang akon suga;
ang Ginoo nga akon Dios magpasanag sang akon kadudulman.
29Kay paagi sa imo ginasalakay ko ang kabon;
kag paagi sa akon Dios ginalumpat ko ang kuta.
30Nahanungud sa Dios—ang iya dalanon himpit;
ang polong sang Ginoo natilawan;
sia taming sa tanan nga nagadangup sa iya.
31Kay sin-o bala ang Dios, luwas sa Ginoo?
Kag sin-o bala ang igang, luwas sang aton Dios?—
32Ang Dios nga nagawagkus sa akon sing kusug,
kag nagahimpit sang akon dalanon.
33Ginahimo niya ang akon mga tiil kaangay sang mga tiil sang usa nga babayi,#Hab. 3:19.
kag ginapahamtang niya ako sa akon mataas nga mga duug.
34Sia magatudlo sang akon mga kamut sa pag-away,
sa bagay nga ang akon mga butkon nagabingat sang pana nga saway.
35Nahatagan mo man ako sang taming sang imo kaluwasan,
kag ang imo too nga kamut nagapatindug sa akon,
kag ang imo pagkalolo nagpadaku sa akon.
36Ginpasangkad mo ang akon mga tikang sa idalum nakon,
kag ang akon mga tiil wala makadalin-as.
37Lagson ko ang akon mga kaaway kag lambuton sila;
kag indi ako magbalik tubtub nga mapapas sila.
38Palapsan ko sila, agud nga indi na sila makatindug;
magakapukan sila sa idalum sang akon mga tiil.
39Kay ginwagkusan mo ako sing kusug nga sa inaway;
ginpasakup mo sa akon ang mga nagtindug batok sa akon.
40Ginpatalikod mo man sa akon ang mga kaaway ko,
agud nga mapapas ko ang mga nagadumut sa akon.
41Nagtuaw sila, apang wala sing bisan sin-o nga magaluwas,
bisan sa Ginoo, apang sia wala magsabat sa ila.
42Niyan ginbokbok ko sila subong sang yab-ok sa tampad sang hangin;
ginpilak ko sila subong sang lunang sa mga dalan.
43Ginluwas mo ako sa mga pagsumpunganay sang katawohan;
ginhimo mo ako nga pangolo sang mga pungsud;
katawohan nga wala ko makilala magaalagad sa akon.
44Sa gilayon nga mabatian nila ako magatuman sila sa akon;
ang mga dumuloong magapasakup sa akon.
45Ang mga dumuloong magakadula,
kag magaabut nga nagakurug gikan sa ila masiput nga mga duug.
46Nagakabuhi ang Ginoo; kag pakamaayohon ang akon igang,
kag pakataason ang Dios sang akon kaluwasan,
47ang Dios nga nagatimalus tungud sa akon
kag nagapasakup sang mga katawohan sa idalum nakon;
48ginasagup niya ako sa akon mga kaaway;
hoo, ginabayaw mo ako sa ibabaw sang mga nagasumpung sa akon;
ginaluwas mo ako sa tawo nga malugus.
49Busa magapasalamat ako sa imo, O Ginoo, sa tunga sang mga pungsud,
kag magaamba sing mga pagdayaw sa imo ngalan.#Roma 15:9.
50Magahatag sia sing dakung kaluwasan sa iya hari,
kag nagapakita sing malig-on nga paghigugma sa iya hinaplas,
kay David kag sa iya kaliwatan sa gihapon.
Currently Selected:
MGA SALMO 18: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
