MGA SALMO 145
145
Pagdayaw bangud sang Kaayo kag Gahum sang Dios
Ambahanon sa Pagdayaw. Salmo ni David.
1Dayawon ko ikaw, Dios nakon, O Hari nakon,
kag pakamaayohon ko ang imo ngalan sa gihapon kag sa gihapon.
2Sa tagsa ka adlaw pakamaayohon ko ikaw,
kag dayawon ko ang imo ngalan sa gihapon kag sa gihapon.
3Daku ang Ginoo, kag dayawon sing daku,
kag ang iya pagkadaku dimatungkad.
4Ang isa ka kaliwatan magadayaw sang imo mga binuhatan sa isa,
kag magapahayag sang imo gamhanan nga mga buhat.
5Sang mahimayaon nga pagkahari sang imo kadungganan,
kag sang imo makatilingala nga mga binuhatan, magapamalandong ako.
6Ang mga tawo magapamolong sang gahum sang imo makakulugmat nga mga binuhatan,
kag ako magapahayag sang imo pagkadaku.
7Ibungat nila ang handumanan sang imo dakung pagkaayo,
kag magaamba sang imo pagkamatarung.
8Ang Ginoo mainayohon kag maloloy-on,
makuli sa pagpangakig kag daku sa malig-on nga paghigugma.
9Ang Ginoo maayo sa tanan,
kag ang iya mahinoklogon nga mga kalooy sa ibabaw sang iya tanan nga binuhatan.
10Ang tanan mong binuhatan magapasalamat sa imo, O Ginoo,
kag ang imo mga balaan magapakamaayo sa imo!
11Magapamolong sila sang himaya sang imo ginharian,
kag magahambal sang imo gahum,
12sa pagpakilala sa mga anak sang mga tawo sang iya gamhanan nga mga buhat,
kag sang himaya sang pagkahari sang iya ginharian.
13Ang imo ginharian dayon nga ginharian,
kag ang imo ginsakpan nagapadayon sa tanan nga kaliwatan.
14Ang Ginoo nagapatindug sang tanan nga nagakapukan,
kag nagapabangon sang tanan nga nagadunguk.
15Ang mga mata sang tanan nagahulat sa imo,
kag ginahatagan mo sila sang ila kalan-on sa nagakaigo nga panag-on.
16Ginahumlad mo ang imo kamut,
ginabusug ang handum sang tagsa ka butang nga buhi.
17Ang Ginoo matarung sa tanan niyang dalanon,
kag mainayohon sa tanan niyang binuhatan.
18Ang Ginoo malapit sa tanan nga nagapanawag sa iya,
sa tanan nga nagapanawag sa iya sa kamatooran.
19Tumanon niya ang handum sang mga nagakahadluk sa iya,
pamatian man niya ang ila pagtuaw, kag luwason sila.
20Ang Ginoo nagatipig sang tanan nga nagahigugma sa iya;
apang ang tanan nga malauton laglagon niya.
21Ang akon baba magapamolong sang pagdayaw sa Ginoo,
kag magpakamaayo ang tanan nga unud sang iya balaan nga ngalan sa gihapon kag sa gihapon.
Currently Selected:
MGA SALMO 145: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
