MGA SALMO 144
144
Pangamuyo nga Luwason kag Pabuganaon
Salmo ni David.
1Pakamaayohon ang Ginoo, nga akon igang,
nga nagatudlo sang akon mga kamut sa pagpakig-away,
kag sang akon mga tudlo sa pag-away;
2ang akon malig-on nga paghigugma kag akon kuta,
ang akon mataas nga torre kag akon manluluwas,
ang akon taming diin nagadangup ako,
nga nagapasakup sang akon katawohan sa idalum nakon.
3O Ginoo, ano bala ang tawo nga ginakilala mo sia,
ukon ang anak sang tawo nga ginadumdum mo sia?#Job 7:17-18; Sal. 8:4.
4Ang tawo kaangay sa kadayawan,
ang iya mga adlaw subong sang landong nga nagataliwan.
5Pabuyuka ang imo kalangitan, O Ginoo, kag panaug ka!
Tanduga ang kabukiran kag magaaso sila!
6Maghaboy sing kilat kag palaptaha sila,
ipana ang imo mga baslay kag dauga sila!
7Untaya ang imo mga kamut kutub sa ibabaw,
sagupa ako kag luwasa ako sa dalagkung mga tubig,
gikan sa kamut sang mga dumuloong,
8nga ang ila baba nagapamolong sing limbong,
kag ang ila too nga kamut amo ang too nga kamut sang pagkadimatuud.
9Magaamba ako sing bag-ong ambahanon sa imo, O Dios;
sa salterio nga may napulo ka cuerdas magaamba ako sing mga pagdayaw sa imo,
10ikaw amo ang nagahatag sing kaluwasan sa mga hari,
nga nagasagup kay David nga imo alagad.
11Sagupa ako sa mahaliton nga espada,
kag luwasa ako sa kamut sang mga dumuloong,
nga ang ila baba nagapamolong sing limbong,
kag ang ila toong kamut amo ang toong kamut sang pagkadimatuud.
12Ang amon mga anak nga lalaki sa ila pagkapamatan-on
manginsubong sang malambu nga mga tanum,
ang amon mga anak nga babayi manginsubong sang mga bato nga pamag-ang
nga nabasbasan sono sa dagway sang palacio;
13ang amon mga damisag puno,
nga nagaaman sang tanan nga bagay sang nasuput;
ang amon mga carnero nagabata sing linibo
kag linaksa sa amon mga latagon;
14ang amon kabakahan ginalulanan sing maayo,
wala sing pagguhab kag wala sing pagginowa;
walay pagsinggit sa amon mga dalan!
15Bulahan ang katawohan nga yara sa among kahimtangan!
Bulahan ang katawohan nga ang ila Dios amo ang Ginoo!
Currently Selected:
MGA SALMO 144: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
