MGA HULUBATON 29
29
1Sia nga ginasabdong sing masunsun,
apang nagapatig-a sang iya tingkoy
laglagon sa hinali kag indi matabangan.
2Kon magdugang ang matarung, nagakalipay ang katawohan;
apang kon maggahum ang malaut nga tawo, ang katawohan nagapanghayhay.
3Ang bisan sin-o nga nagahigugma sang kaalam nagalipay sang iya amay,
apang ang nagaupud sa mga babaying makihilawason nagausik sang iya pagkabutang.
4Ang hari paagi sa katarungan nagapalig-on sang duta,
apang ang nagasukot sing mga dolot nagalaglag sini.
5Ang tawo nga nagaologolog sa iya isigkatawo
nagaladlad sing pukot sa iya mga tikang.
6Sa paglalis sang tawo nga malaut may siod,
apang ang matarung nagaamba kag nagakalipay.
7Ang matarung nakahibalo sang kahimtangan sang imol;
ang malauton wala sing paghangup sa paghibalo sini.
8Ang mga mayubiton nagasonog sang banwa,
apang ang mga maalam nga tawo nagapalugpay sang kasingkal.
9Kon ang tawong maalam may kasuayon sa tawong buangbuang,
bisan sia magpangakig ukon magkadlaw, walay kapahuwayan.
10Ang makidugoon nagadumut sang himpit,
kag ginatinguha nila ang kabuhi sang matadlong.
11Ang buangbuang nagamitlang sang iya bug-os nga kaakig,
apang ang tawo nga maalam nagapugung sini kag nagapalinong sini.
12Kon ang manugdumala nagapamati sa kabutigan,
ang tanan niyang alagad malaut.
13Ang imol nga tawo kag ang manugpigus nagakitaay sing tingub;
ang Ginoo nagapasanag sang mga mata nilang duha.
14Ang hari nga nagahukom sing matutum sa imol
ang iya trono lig-onon sa gihapon.
15Ang bilogon kag ang pagbadlong nagahatag sing kaalam,
apang ang bata nga ginapabayaan sa iya kaugalingon nagapakahuya sa iya iloy.
16Kon ang malauton magdugang, ang paglalis nagadugang;
apang ang matarung magatolok sa ila pagkapukan.
17Tadlonga ang imo anak, kag magahatag sia sa imo sing pahuway;
magahatag sia sing kalipay sa imo kalag.
18Sa walay sing palanan-awon ang katawohan nagasikway sang pagpugung,
apang ang nagabantay sang kasogoan bulahan sia.
19Ang alagad indi mapatadlong paagi sa mga polong,
kay bisan nakahangup sia, indi sia magsapak.
20Nakakita ka bala sing tawo nga madalas sa iya mga polong?
May labi pa nga paglaum sa buangbuang sang sa iya.
21Ang nagabatiti sing maayo sang iya alagad kutub sa iya pagkabata,
mangin-iya sia anak sa olihi.
22Ang tawo nga naakig nagapainit sing kaawayon,
kag ang tawo nga masingkal nagabugana sa paglalis.
23Ang bugal sang tawo magapanubo sa iya,
apang ang mapainubuson sing espiritu makaagum sing dungug.
24Ang bisan sin-o nga katimbang sang makawat nagadumut sang iya kaugalingon nga kalag;
nagapamati sia sang panumpa, kag nagahipus lamang.
25Ang kahadluk sa tawo nagadala sing siod,
apang ang bisan sin-o nga nagasalig sa Ginoo manginmalig-on.
26Madamu ang nagatinguha sang kahamuut sang manugdumala,
apang ang paghukom sang tawo nagagikan sa Ginoo.
27Ang dimatarung nga tawo kangil-aran sa matarung,
kag ang matadlong sa dalanon kalangil-aran sa malauton.
Currently Selected:
MGA HULUBATON 29: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
