MGA HULUBATON 30
30
Ang mga Pinanilagan ni Agur
1Ang mga polong ni Agur nga anak ni Jaque nga oraculo.
Ang tawo nagasiling kay Itiel,
kay Itiel kag kay Ucal:
2Sa pagkamatuud ako labi pa ka sapatsapaton sa bisan kay sin-ong tawo.
Wala ako sing paghangup sang tawo.
3Wala ako makatoon sing kaalam,
kag wala sing ihibalo sang Balaan.
4Sin-o bala ang nagkayab sa langit kag nagkunsad?
Sin-o bala ang nagtipon sang mga hangin sa iya mga kinuum?
Sin-o bala ang nagputus sang mga tubig sa iya panapton?
Sin-o bala ang nagtukud sang tanan nga ukbung sang duta?
Sin-o bala ang iya ngalan, kag sin-o bala ang ngalan sang iya anak?
Sa pagkamatuud nakahibalo ka!
5Ang tagsa ka polong sang Dios natilawan;
sia taming sa mga nagadangup sa iya.
6Dili ka magdugang sa iya mga polong,
basi nga badlongon ka niya, kag masapwan ka nga butigon.
7Duha ka butang ang ginpangayo ko sa imo;
dili ako pagdumilii sa ila sa wala pa ako mapatay:
8Ipahilayo sa akon ang pagkadimatuud kag ang kabutigan;
dili ako paghatagi sing kaimolan ukon kamanggaran;
pakan-a ako sang kalan-on nga kinahanglanon ko,
9basi nga mabusug ako, kag magpanghiwala sa imo,
kag magsiling, “Sin-o bala ang Ginoo?”
ukon basi mag-imol ako, kag magpangawat,
kag pasipalahan ang ngalan sang akon Dios.
10Dili pagbutangbutangi ang alagad sa iya agalon,
basi nga pakamalauton ka niya, kag pakasalaon ka.
11May kaliwatan nga nagapakamalaut sa ila amay
kag wala nagapakamaayo sang ila iloy.
12May kaliwatan nga putli sa ila kaugalingon nga mga mata
kag wala nga mas-a mahugasi sa ila kahigkoan.
13May kaliwatan—daw ano kataas sang ila mga mata,
ang ila mga ilalakub nabayaw!
14May kaliwatan nga ang ila mga ngipon subong sang mga espada,
ang ila mga bag-ang subong sang mga sundang,
sa paghalunhon sang imol gikan sa duta,
sang nawadan gikan sa mga tawo.
15Ang linta may duha ka anak nga babayi;
“Hatag, hatag,” nagasinggit sila.
May tatlo ka butang nga wala nagakabusug;
apat nga wala nagasiling, “Tuman na”:
16ang Sheol, ang taguangkan nga baw-as,
ang duta nga wala pagkabusug sang tubig,
kag ang kalayo nga wala nagasiling, “Tuman na.”
17Ang mata nga nagauligyat sa iya amay
kag nagahikay sa pagtuman sa iya iloy
ang mga uwak sang nalupyakan magatuhak sini
kag ang mga piso nga aguila magakaon sini.
18May tatlo ka butang nga tama ka makatilingala sa akon,
apat nga wala ko mahibaloi:
19ang paagi sang aguila sa kahawaan,
ang paagi sang man-ug sa igang,
ang paagi sang sakayan sa tunga sang dagat,
kag ang paagi sang lalaki sa dalaga.
20Amo ini ang paagi sang babayi nga makihilahion:
nagakaon sia, kag nagapamahid sang iya baba,
kag nagasiling, “Wala ako makahimo sing pagkamalaut.”
21Tungud sa tatlo ka butang nagakurug ang duta;
tungud sa apat indi ini makabatas:
22ang alagad kon maghari sia,
kag ang buangbuang kon mabusug sia sang kalan-on;
23ang mangil-ad nga babayi kon makasal sia,
kag ulipon nga babayi nga manunubli sa iya agalon nga babayi.
24May apat ka butang nga magamay sa duta,
apang lakas kaalam sila:
25ang mga subay katawohan nga indi makusug,
apang nagatigana sila sang ila kalan-on sa tingadlaw;
26ang mga coney mapigaw lamang nga katawohan,
apang nagabuhat sila sang ila mga balay sa mga igang;
27ang mga apan wala sing hari,
apang nagagowa sila tanan sa mga kinabon;
28ang tiki nagapangapyot sa iya mga kamut,
apang yara sia sa mga palacio sang mga hari.
29May tatlo ka butang nga halangdon sa ila panikang;
apat nga halangdon sa panglakat:
30ang leon, nga amo ang gamhanan gid sa kasapatan
kag wala nagatalikod sa bisan kay sin-o;
31ang kabayo sa inaway, ang lalaki nga kanding man,
kag ang hari nga batok sa iya wala sing makadaug.
32Kon nakahimo ka sing binuang, sa pagpakataas sang imo kaugalingon,
ukon nakahunahuna ka sing malaut,
itakup ang imo kamut sa imo baba.
33Kay ang paglugay sang gatas nagapagowa sing latab,
ang paglubag sang ilong nagapagowa sing dugo,
gani ang pagpilit sang kasingkal nagapagowa sing kaawayon.
Currently Selected:
MGA HULUBATON 30: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
