MGA HULUBATON 11
11
1Ang malimbongon nga timbangan kangil-aran sa Ginoo,
apang ang matarung nga itilimbang kalipayan niya.
2Kon ang bugal nagaabut, niyan nagaabut ang kahuluy-an;
apang upud sa mapainubuson yara ang kaalam.
3Ang pagkadungganon sang matadlong magatuytuy sa ila,
apang ang pagkabalingag sang maluib magalaglag sa ila.
4Ang manggad walay kapuslanan sa adlaw sang kasingkal,
apang ang pagkamatarung nagaluwas sa kamatayon.
5Ang pagkamatarung sang himpit magatudlo sang iya dalanon,
apang ang malauton mapukan sa iya kaugalingon nga pagkamalaut.
6Ang pagkamatarung sang matadlong magaluwas sa ila,
apang ang mga maluib madakup sa ila kaugalingon nga kalautan.
7Kon ang malaut nga tawo mapatay, ang iya ginapaabut mawala,
kag ang paglaum sang kalautan nagakawala.
8Ang matarung ginaluwas sa kalisdanan,
kag ang malauton nagatal-us sa iya.
9Sa iya baba ang tawo nga walay Dios naglaglag sang iya isigkatawo,
apang paagi sa ihibalo ang matarung luwason.
10Kon may kaayohan sa matarung, ang banwa nagakalipay;
kag kon ang malauton mawala may hinugyaw.
11Sa pagpakamaayo sang matadlong ang banwa ginapakataas,
apang ini ginadaug paagi sa baba sang malauton.
12Ang nagatamay sa iya isigkatawo nawad-an sing kaalam,
apang ang tawo nga mahangponon nagahipus.
13Ang nagalibudlibud subong nga malibakon nagapahayag sang mga tinago,
apang ang matutum sing espiritu nagatago sang butang.
14Diin walay maalam nga pagtuytuy, ang katawohan nagakapukan:
apang sa kadam-an sang manuglaygay may kalig-onan.
15Ang manugpalig-on sa dumuloong magaantus tungud sini,
apang ang nagadumut sang pagkamanugpalig-on malig-on.
16Ang mainayohon nga babayi nagaagum sing dungug,
kag ang mga tawong malugus nagaagum sing manggad.
17Ang tawo nga maloloy-on nagahimo sing maayo sa iya kaugalingon nga kalag,
apang ang mapintas nagagamo sang iya kaugalingon nga unud.
18Ang malauton nagabaton sing malimbongon nga bayad,
apang ang nagasab-ug sing katarungan may malig-on nga balus.
19Ang malig-on sa pagkamatarung mabuhi,
apang ang nagasonod sang malaut mapatay.
20Ang mga balingag sa tagiposoon kangil-aran sa Ginoo,
apang ang mga himpit sa ila dalanon kalipayan niya.
21Bisan magkapyotay sa kamut, ang malaut nga tawo indi makaluwas sa silot,
apang ang kaliwat sang matarung maluwas.
22Subong sang singsing sa hingudhingud sang baboy
amo ang maayoayo nga babayi nga walay pagbinagbinag.
23Ang handum sang matarung amo ang maayo lamang;
apang ang ginapaabut sang malauton kasingkal.
24May yara nga nagasabwag, kag nagadugang pa;
may yara nga nagapugung sing labi pa sa nagakaigo, apang ini nagapadolong lamang sa kinawad-on.
25Ang kalag nga maalwan magatambok,
kag ang nagabunyag bunyagan man sia.
26Ang nagapugung sang uyas pakamalauton sang katawohan,
apang ang pagpakamaayo yara sa olo sang nagabaligya sini.
27Ang nagapangita sing makugihon sang maayo nagapangita sing pagpahamuut,
apang ang nagatinguha sang malaut, ini magaabut sa iya.
28Ang nagasalig sa iya manggad mapukan,
apang ang matarung magalambo subong sang dahon nga hilaw.
29Ang nagatublag sang iya kaugalingon nga balay magapanubli sang hangin,
kag ang buangbuang mangin-alagad sa maalam sing tagiposoon.
30Ang bunga sang matarung amo ang kahoy sang kabuhi,
kag ang maalam nagadaug sing mga kalag.
31Yari karon, ang matarung tumbasan sa duta,
daw ano pa gid ang malauton kag ang makasasala!#1 Ped. 4:18.
Currently Selected:
MGA HULUBATON 11: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
