MGA HULUBATON 10
10
Ginapaanggid ang Matarung kag ang Malauton
1Ang mga hulubaton ni Salomon.
Ang anak nga maalam nagahimo sing amay nga malipayon,
apang ang anak nga buangbuang amo ang kabug-atan sang iya iloy.
2Ang mga bahandi sang pagkamalaut walay kapuslanan,
apang ang pagkamatarung nagaluwas sa kamatayon.
3Ang Ginoo indi magtugut nga gutumon ang kalag sang matarung,
apang ginasikway niya ang handum sang malauton.
4Mangin-imol ang nagapangabudlay sa kamut nga matamad,
apang ang kamut sang makugi nagapamanggad.
5Ang nagatipon sa tingadlaw amo ang anak nga maalam,
apang ang nagatolog sa tig-alani amo ang anak nga nagapakahuya.
6Ang mga pagpakamaayo yara sa olo sang matarung,
apang ang panglugus ginatabonan sang baba sang malauton.
7Ang handumanan sang matarung bulahan,
apang ang ngalan sang malauton madunut.
8Ang maalam sa tagiposoon magabaton sang mga sogo,
apang ang nagangasal nga buangbuang malaglag.
9Ang nagalakat sing matadlong nagalakat sing malig-on,
apang ang nagapatiko sang iya mga dalanon mahibaloan.
10Ang nagapangilay nagapasubo,
apang ang nagangasal nga buangbuang malaglag.
11Tuburan sang kabuhi ang baba sang matarung,
apang ang panglugus ginatabonan sang baba sang malauton.
12Ang dumut nagapasingkal sang mga kasuayon,
apang ang gugma nagatabon sang tanan nga paglapas.#Sant. 5:20; 1 Ped. 4:8.
13Sa mga bibig sang mahinantupon makita ang kaalam,
apang ang bilogon natungud sa likod nga nawad-an sing paghangup.
14Ang mga tawo nga maalam nagatipon sing ihibalo,
apang ang baba sang buangbuang malapit nga kalaglagan.
15Ang pagkabutang sang manggaranon amo ang iya mabakud nga banwa;
ang kalaglagan sang imol amo ang ila kaimolon.
16Ang pagpangabudlay sang matarung nagapadolong sa kabuhi,
ang patubas sang malauton sa sala.
17Yara sa dalanon sang kabuhi ang nagatalupangud sang pagtudlo,
apang ang nagabiya sang sabdong nagasayup.
18Ang nagatago sing dumut may butigon nga mga bibig,
kag ang nagamitlang sing butangbutang buangbuang.
19Sa kadam-an sang mga polong wala ginakulangi sing paglapas,
apang ang nagapugung sang iya mga bibig nagahimo sing maalamon.
20Ang dila sang matarung subong sang pinili nga pilak;
ang tagiposoon sang malauton diotay sing bili.
21Ang mga bibig sang matarung nagapakaon sing madamu,
apang ang buangbuang nagakapatay tungud sa kakulang sing paghangup.
22Ang pagpakamaayo sang Ginoo nagapamanggad,
kag wala sia nagadugang sing kasubo sa sini.
23Subong sang hampang sa buangbuang ang paghimo sing pagkamalaut,
kag subong man ang kaalam sa tawo nga mahangponon.
24Ang kahadlukan sang malauton magaabut sa iya,
apang ang handum sang matarung pagaihatag.
25Kon nagaagi ang buhawi, ang malauton mawala,
apang ang matarung sadsaran nga dayon.
26Subong sang langgaw sa mga ngipon, kag subong sang aso sa mga mata,
amo ang matamad sa mga nagapadala sa iya.
27Ang kahadluk sa Ginoo nagapalawig sang mga adlaw,
apang ang mga tuig sang malauton lip-oton.
28Ang paglaum sang mga matarung kasadyahan,
apang ang paghulat sang malauton mawala.
29Ang dalanon sang Ginoo pamakud sa matadlong,
apang ini kalaglagan sa mga manughikot sang kalautan.
30Ang matarung indi mationg,
apang ang malauton indi magpuyo sa duta.
31Ang baba sang matarung nagapagowa sing kaalam,
apang ang dila nga balingag utdon.
32Ang mga bibig sang matarung nakakilala sang kalahamut-an,
apang ang baba sang malauton nagapamolong sing pagkabalingag.
Currently Selected:
MGA HULUBATON 10: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
