NUMEROS 1
1
Ang Israel Gin-isip sa Sinai
1Ang Ginoo nagpamolong kay Moises sa kamingawan sang Sinai, sa layanglayang nga tiliponan, sa nahauna nga adlaw sang ikaduha nga bulan, sa ikaduha nga tuig sang tapus sila makagowa sa duta sang Egipto, nga nagasiling, 2“Isipa ninyo ang kabilogan sang bug-os nga katilingban sang katawohan sang Israel,#Num. 26:1-51. sono sa ila mga panimalay, sono sa ila kabaranggayan, sono sa kadamuon sang mga ngalan, ang tagsa ka lalaki, sa tagsatagsa sa ila; 3kutub sa duha ka pulo ka tuig kag pa ibabaw, ang tanan sa Israel nga sarang makapakig-away, ikaw kag si Aaron magaisip sa ila sono sa ila mga kasoldadosan. 4Kag magaupud sa inyo ang isa ka lalaki sang tagsa ka kabikahan, ang tagsatagsa pangolo sang iya baranggay. 5Kag ini amo ang mga ngalan sang mga lalaki nga magaupud sa inyo. Gikan kay Ruben, si Elisur nga anak si Sedeur; 6gikan kay Simeon, si Selumiel nga anak ni Zurisadai; 7gikan kay Juda, si Naason nga anak ni Aminadab; 8gikan kay Isacar, si Natanael nga anak ni Zuar; 9gikan kay Zabulon, si Eliab nga anak ni Helon; 10gikan sa mga anak ni Jose, gikan kay Efraim, si Elisama nga anak ni Amiud, kag gikan kay Manases, si Gamaliel nga anak ni Pedazur; 11gikan kay Benjamin, si Abidan nga anak ni Gedeoni; 12gikan kay Dan, si Ahiezer nga anak ni Amisadai; 13gikan kay Aser, si Pagiel nga anak ni Ocran; 14gikan kay Gad, si Eliasaf nga anak ni Deuel; 15gikan kay Neftali, si Ahira nga anak ni Enan.” 16Ini sila amo ang gintawag gikan sa katilingban, ang mga principe sang mga kabikahan sang ila mga ginikanan, sila mga pangolo sang mga linibo sang Israel.
17Ginkuha ni Moises kag ni Aaron ini nga mga lalaki nga ginhingadlan sa ngalan, 18kag gintipon nila sing tingub ang bug-os nga katilingban sa nahauna nga adlaw sang bulan nga ikaduha, kag nagpahayag sila sang ila ginikanan, sono sa ila mga panimalay, sa ila mga kabaranggayan, sa kadamuon sang mga ngalan kutub sa duha ka pulo ka tuig kag pa ibabaw, sa tagsatagsa sa ila, 19sono sa ginsogo sang Ginoo kay Moises. Sa amo gin-isip niya sila sa kamingawan sang Sinai.
20Ang katawohan ni Ruben, panganay ni Israel, ang ila mga kaliwatan, sono sa ila mga panimalay, sa ila kabaranggayan, sa kadamuon sang mga ngalan, sa tagsatagsa sa ila, ang tagsa ka lalaki kutub sa duha ka pulo ka tuig kag pa ibabaw, ang tanan nga sarang makapakig-away: 21ang mga naisipan sa ila sa kabikahan ni Ruben kap-atan kag anum ka libo kag lima ka gatus.
22Sa katawohan ni Simeon, ang ila mga kaliwatan, sono sa ila mga panimalay, sa ila mga kabaranggayan, ang mga naisipan sa ila, sono sa kadamuon sang mga ngalan, sa tagsatagsa sa ila, ang tagsa ka lalaki kutub sa duha ka pulo ka tuig kag pa ibabaw, ang tanan nga sarang makapakig-away: 23ang mga naisipan sa ila sa kabikahan ni Simeon kalim-an kag siam ka libo kag tatlo ka gatus.
24Sa katawohan ni Gad, ang ila mga kaliwatan, sono sa ila mga panimalay, sa ila mga kabaranggayan, sono sa kadamuon sang mga ngalan, kutub sa duha ka pulo ka tuig kag pa ibabaw, ang tanan nga sarang makapakig-away: 25ang mga naisipan sa kabikahan ni Gad kap-atan kag lima ka libo kag anum ka gatus kag kalim-an.
26Sa katawohan ni Juda, ang ila mga kaliwatan, sono sa ila mga panimalay, sa ila mga kabaranggayan, sono sa kadamuon sang mga ngalan, kutub sa duha ka pulo ka tuig kag pa ibabaw, ang tanan nga sarang makapakig-away: 27ang mga naisipan sa ila sa kabikahan ni Juda kapitoan kag apat ka libo kag anum ka gatus.
28Sa katawohan ni Isacar, ang ila mga kaliwatan, sono sa ila mga panimalay, sa ila mga kabaranggayan, sono sa kadamuon sang mga ngalan, kutub sa duha ka pulo ka tuig kag pa ibabaw, ang tanan nga sarang makapakig-away: 29ang mga naisipan sa ila sa kabikahan ni Isacar kalim-an kag apat ka libo kag apat ka gatus.
30Sa katawohan ni Zabulon, ang ila mga kaliwatan, sono sa ila mga panimalay, sa ila mga kabaranggayan, sono sa kadamuon sang mga ngalan, kutub sa duha ka pulo ka tuig kag pa ibabaw, ang tanan nga sarang makapagkig-away: 31ang mga naisipan sa ila sa kabikahan ni Zabulon kalim-an kag pito ka libo kag apat ka gatus.
32Sa katawohan ni Jose, kon sayoron, sa katawohan ni Efraim, ang ila mga kaliwatan, sono sa ila mga panimalay, sa ila mga kabaranggayan, sono sa kadamuon sang mga ngalan, kutub sa duha ka pulo ka tuig kag pa ibabaw, ang tanan nga sarang makapakig-away: 33ang mga naisipan sa ila sa kabikahan ni Efraim kap-atan ka libo kag lima ka gatus.
34Sa katawohan ni Manases, ang ila mga kaliwatan, sono sa ila mga panimalay, sa ila mga kabaranggayan, sono sa kadamuon sang mga ngalan, kutub sa duha ka pulo ka tuig kag pa ibabaw, ang tanan nga sarang makapakig-away: 35ang mga naisipan sa ila sa kabikahan ni Manases katloan kag duha ka libo kag duha ka gatus.
36Sa katawohan ni Benjamin, ang ila mga kaliwatan, sono sa ila mga panimalay, sa ila mga kabaranggayan, sono sa kadamuon sang mga ngalan, kutub sa duha ka pulo ka tuig kag pa ibabaw, ang tanan nga sarang makapakig-away: 37ang mga naisipan sa ila sa kabikahan ni Benjamin katloan kag lima ka libo kag apat ka gatus.
38Sa katawohan ni Dan, ang ila mga kaliwatan, sono sa ila mga panimalay, sa ila mga kabaranggayan, sono sa kadamuon sang mga ngalan, kutub sa duha ka pulo ka tuig kag pa ibabaw, ang tanan nga sarang makapakig-away: 39ang mga naisipan sa ila sa kabikahan ni Dan kan-uman kag duha ka libo kag pito ka gatus.
40Sa katawohan ni Aser, ang ila mga kaliwatan, sono sa ila mga panimalay, sa ila mga kabaranggayan, sono sa kadamuon sang mga ngalan, kutub sa duha ka pulo ka tuig kag pa ibabaw, ang tanan nga sarang makapakig-away: 41ang mga naisipan sa ila sa kabikahan ni Aser kap-atan kag isa ka libo kag lima ka gatus.
42Sa katawohan ni Neftali, ang ila mga kaliwatan, sono sa ila mga panimalay, sa ila mga kabaranggayan, sono sa kadamuon sang mga ngalan, kutub sa duha ka pulo ka tuig kag pa ibabaw, ang tanan nga sarang makapakig-away: 43ang mga naisipan sa ila sa kabikahan ni Neftali kalim-an kag tatlo ka libo kag apat ka gatus.
44Ini sila amo ang naisipan, nga gin-isip ni Moises kag ni Aaron kag sang mga principe sang Israel, nga napulo kag duha ka lalaki, ang tagsa sa ila nga sa iya kabaranggayan. 45Gani ang tanan nga naisipan sang katawohan sang Israel, sono sa ila mga kabaranggayan, kutub sa duha ka pulo ka tuig kag pa ibabaw, ang tanan sa Israel nga sarang makapakig-away— 46ang tanan nga naisipan anum ka gatus kag tatlo ka libo kag lima ka gatus kag kalim-an.
Ang Pagtangdo sang mga Levinhon
47Apang ang mga Levinhon sono sa kabikahan sang ila mga ginikanan wala pag-isipa sa ila. 48Kay ang Ginoo nagpamolong kay Moises, 49“Dili mo pag-isipon ang kabikahan lamang ni Levi, kag dili mo paglistahon ang kabilogan nila sa katawohan sang Israel; 50kondi itangdo mo ang mga Levinhon sa kayangkayang sang pagpamatuud, kag sa tanan niya nga gamit, kag sa tanan nga nahanungud sa iya; sila magadala sang kayangkayang kag sang tanan niya nga gamit, kag magaalagad sila sa sini, kag magapahamtang sang ila dologan sa palibut sang kayangkayang. 51Kon magtaliwan ang kayangkayang, bungkagon ini sang mga Levinhon; kag kon ipahamtang ang kayangkayang, patindugon ini sang mga Levinhon. Kag ang dumuloong nga magpalapit, patyon sia. 52Magpahamtang ang katawohan sang Israel sang ila mga layanglayang, ang tagsa ka tawo sa iya kaugalingon nga dologan kag ang tagsa ka tawo malapit sa iya kaugalingon nga hayahay sono sa ila mga kasoldadosan; 53apang ang mga Levinhon magpahamtang sang ila dologan sa palibut sang kayangkayang sang pagpamatuud, agud nga wala sing kasingkal sa katilingban sang katawohan sang Israel; kag ang mga Levinhon magtatap sang kayangkayang sang pagpamatuud.” 54Amo ini ang ginhimo sang katawohan sang Israel; ginhimo nila sono sa tanan nga ginsogo sang Ginoo kay Moises.
Currently Selected:
NUMEROS 1: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
