LEVITICO 24
24
Ang Pagtatap sang Suga
(Ex. 27:20-21)
1Ang Ginoo nagsiling kay Moises, 2“Sogoa ang katawohan sang Israel nga dalhan ka nila sing lunsay nga lana sang oliva nga binati nga sa kapawa, sa pagpadabdab sing dalayon sang suga. 3Sa gowa sang kumbung sang pagpamatuud, sa layanglayang nga tiliponan, tatapon ini ni Aaron kutub sa kahaponon tubtub sa kaagahon sa atubangan sang Ginoo sing dalayon; ini palatukuran nga dayon sa bug-os ninyong mga kaliwatan. 4Sa ibabaw sang candelero nga bus-og nga bulawan tatapon niya sing dalayon ang mga suga sa atubangan sang Ginoo.
Ang Tinapay nga Pahayag
5“Kag magkuha ka sing harina nga mapino, kag magbibingka sini sing napulog duha ka bilog nga kalan-onon; duha ka ikapulo sang isa ka efa ang tagsa ka bilog nga kalan-onon. 6Kag ipahamtang mo sila sa duha ka kubay, anum sa tagsa ka kubay, sa ibabaw sang latok nga bus-og nga bulawan sa atubangan sang Ginoo.#Ex. 25:30. 7Kag butangan mo sa ibabaw sang tagsa ka kubay sing incienso nga lunsay, agud nga ini manginhandumanan nga sa tinapay, halad tungud sa kalayo sa Ginoo. 8Sa tagsa ka adlaw nga inugpahuway kubayon ni Aaron ini sa atubangan sang Ginoo sing dalayon subong nga katipan nga dayon tungud sa katawohan sang Israel. 9Kag ini ipatungud kay Aaron kag sa iya mga anak,#Mat. 12:4; Mar. 2:26; Luc. 6:4. kag kaonon nila ini sa duug nga balaan, kay ini labi gid kabalaan sa iya gikan sa mga halad tungud sa kalayo sa Ginoo, sa palatukuran nga dayon.”
Ang Silot sa Pagpasipala
10Karon ang lalaking anak sang babaying Israelnon, nga ang iya amay Egiptohanon, naggowa sa tunga sang katawohan sang Israel; kag ang anak sang Israelnon nga babayi kag ang isa ka lalaki sang Israel nag-away sa dologan, 11kag ang anak sang Israelnon nga babayi nagpasipala sang Ngalan, kag nagpanghimalaut. Kag gindala nila sia kay Moises. Ang ngalan sang iya iloy si Selomit, ang anak ni Dibri, sa kabikahan ni Dan. 12Kag ginbutang nila sia sa bilanggoan, tubtub nga mapahayagan sila sang kabubut-on sang Ginoo.
13Kag ang Ginoo nagsiling kay Moises, 14“Dalha ninyo sa gowa sang dologan ang nagpanghimalaut; kag ang tanan nga nakabati sa iya magbutang sang ila mga kamut sa ibabaw sang iya olo, kag ipabato sia sa bug-os nga katilingban. 15Kag isiling mo sa katawohan sang Israel, ‘Ang bisan sin-o nga nagapakamalaut sang iya Dios magaantus sang iya sala. 16Ang nagapasipala sang ngalan sang Ginoo, patyon sia; batohon sia sang bug-os nga katilingban; ang manlulugayaw subong sang tumandok, kon nagapasipala sia sang Ngalan, patyon. 17Ang nagapatay sing tawo patyon.#Ex. 21:12. 18Ang nagapatay sing sapat magabayad sini, kabuhi sa kabuhi. 19Kon ang isa ka tawo makasamad sa iya isigkatawo, sono sa ginhimo niya amo ang himoon sa iya, 20balbag sa balbag, mata sa mata, ngipon sa ngipon;#Ex. 21:22-25; Deut. 19:21; Mat. 5:38. subong nga nanginkabangdanan sia sang kasawayan sa isa ka tawo, amo ang himoon sa iya. 21Ang nagapatay sing sapat magbayad sini; kag ang nagapatay sing tawo patyon. 22Maghuput kamo sing isa ka kasogoan sa manlulugayaw kag sa tumandok;#Num. 15:16. kay Ako amo ang Ginoo nga inyo Dios.” 23Gani si Moises nagpamolong sa katawohan sang Israel; kag gindala nila sa gowa sang dologan ang nagpanghimalaut, kag ginbato sia sing mga bato. Sa amo ginhimo sang katawohan sang Israel sono sa ginsogo sang Ginoo kay Moises.
Currently Selected:
LEVITICO 24: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
