LEVITICO 19
19
Mga Kasogoan nahanungud sa Pagkabalaan kag sa Katarungan
1Kag ang Ginoo nagpamolong kay Moises, 2“Ipamolong sa bug-os nga katilingban sang katawohan sang Israel, Magpakabalaan kamo; kay Ako ang Ginoo nga inyo Dios balaan.#Lev. 11:44-45; 1 Ped. 1:16. 3Ang tagsa ka tawo sa inyo magkahadluk sa iya iloy kag sa iya amay,#Ex. 20:12; Deut. 5:16. kag magbantay kamo sang akon mga inugpahuway:#Ex. 20:8; Deut. 5:12. Ako amo ang Ginoo nga inyo Dios. 4Dili kamo magliso sa mga larawan#Lev. 26:1. ukon maghimo nga sa inyo sing mga dios nga tinunaw:#Ex. 20:4; 34:17; Deut. 5:8; 27:15. Ako amo ang Ginoo nga inyo Dios.
5“Kon magdolot kamo sing halad sang mga halad-sa-paghidait sa Ginoo, idolot ninyo ini agud nga mahamut-an kamo. 6Kaonon ini sa amo nga adlaw nga idolot ninyo ini, ukon sa madason nga adlaw; kag kon may mabilin tubtub sa adlaw nga ikatlo sonogon ini sa kalayo. 7Kon kaonon ini nga mas-a sa adlaw nga ikatlo, kangil-aran ini; indi ini manginkalahamut-an, 8kag ang tagsatagsa nga nagakaon sini magaantus sang iya kalautan, bangud nga napasipalahan niya ang balaan nga butang sang Ginoo; kag ina nga tawo utdon gikan sa iya katawohan.
9“Kon mag-ani kamo sang alanyon sang inyo duta, dili mo pag-oroton sing ani ang mga higad sang imo uma, kag dili mo pagtiponon ang salaghawon sang imo alanyon. 10Dili mo pagsaghawan ang imo ulubasan, kag dili mo pagpoloton ang naholog nga bunga sang imo ulubasan; ibilin mo sila sa imol kag sa manlulugayaw: Ako amo ang Ginoo nga inyo Dios.#Lev. 23:22; Deut. 24:19-22.
11“Dili kamo magpangawat,#Ex. 20:15; Deut. 5:19. ukon maglimbonganay,#Ex. 20:16; Deut. 5:20. ukon magbinutigay. 12Kag dili ka magsumpa sing dimatuud tungud sa akon ngalan,#Ex. 20:7; Deut. 5:11; Mat. 5:33. kag magpasipala sang ngalan imo Dios: Ako amo ang Ginoo.
13“Dili mo pagpiguson ang imo isigkatawo ukon pagkawatan sia. Ang mga sohol sang mamumugon dili mabilin sa imo sa bug-os nga gab-i tubtub sa aga.#Deut. 24:14-15. 14Dili mo pagpakamalauton ang bungul ukon pagbutangan sing kasandaran sa atubangan sang bulag,#Deut. 27:18. kondi magkahadluk ka sa imo Dios: Ako amo ang Ginoo.
15“Dili ka maghimo sing pagkadimatarung sa paghukom; dili ka magpasulabi sang imol, ukon magpadungug sang gamhanan, kondi sa pagkamatarung hukman mo ang imo isigkatawo.#Ex. 23:6-8; Deut. 16:19. 16Dili ka magpakadto-pakari subong nga manuglibak sa tunga sang imo katawohan, kag dili ka magpuhon batok sa dugo sang imo isigkatawo: Ako amo ang Ginoo.
17“Dili mo pagdumtan ang imo utud sa imo tagiposoon, sa pagkamatuud sabdongon mo ang imo isigkatawo kag dili magdala sing sala bangud sa iya. 18Dili ka magtimalus ukon magtago sing bisan anong dumut batok sa mga anak sang imo katawohan, kondi higugmaon mo ang imo isigkatawo subong sang imo kaugalingon:#Mat. 5:43; 19:19; 22:39; Mar. 12:31; Luc. 10:27; Roma 13:9; Gal. 5:14; Sant. 2:8. Ako amo ang Ginoo.
19“Bantayan ninyo ang akon mga palatukuran. Dili mo pagpaliwatan ang imo kahayupan sa tuhay nga sari; dili mo pagsab-ugan ang imo latagon sing duha ka sari nga binhi; kag dili ka magsuklub sang panapton nga duha ka sari sang halablon nga nalakut.#Deut. 22:9-11.
20“Ang bisan sin-o nga nagapakighilawas sa isa ka babayi nga ulipon, nga kalasalon sa isa ka tawo kag wala pa magawad ukon mahilway sia, silotan sila. Dili sila pagpatyon, bangud nga indi sia hilway; 21apang magdala ang lalaki sa Ginoo sang iya halad-sa-paglapas, sa ganhaan sang layanglayang nga tiliponan, isa ka carnero nga lalaki nga halad-sa-paglapas. 22Kag ang sacerdote maghimo sing katumbasan tungud sa iya sang carnero nga lalaki sang halad-sa-paglapas sa atubangan sang Ginoo tungud sang sala nga nahimo niya; kag patawaron sia sang sala nga nahimo niya.
23“Kon magsulud kamo sa duta kag nakatanum sang tanan nga bagay sang kakahoyan nga kalan-on, niyan kabigon ninyo ang iya bunga subong nga ginadumilian; sa tatlo ka tuig manginsubong sila nga ginadumilian sa inyo, dili pagkaonon ini. 24Kag sa tuig nga ikap-at ang tanan niyang bunga manginbalaan, sa paghatag sing pagdayaw sa Ginoo. 25Apang sa tuig nga ikalima magkaon kamo sang iya bunga, agud nga magpatubas sia sa inyo sang iya bunga: Ako amo ang Ginoo nga inyo Dios.
26“Dili kamo magkaon sang bisan anong butang nga may dugo.#Gen. 9:4; Lev. 7:26-27; 17:10-14; Deut. 12:16, 23; 15:23. Dili kamo maggamit sing mga babaylan ukon maghimo sing pagpanglagpat.#Deut. 18:10. 27Dili ninyo pagguluban ang buhok sang inyo agtang ukon pagsamaron ang mga kilid sang inyo bungut. 28Dili ninyo pagpilasan ang inyo unud bangud sa patay ukon magbutang sing bisan ano nga pika sa inyo:#Lev. 21:5; Deut. 14:1. Ako amo ang Ginoo.
29“Dili mo pagpakahuy-an ang imo anak nga babayi sa paghimo sa iya nga makihilawason#Deut. 23:17. basi nga ang duta magmakihilawason kagmapuno ang duta sang pagkamalaut. 30Bantayan ninyo ang akon mga inugpahuway kag tahoron ang akon santuario: Ako amo ang Ginoo.#Lev. 26:2.
31“Dili kamo magliso sa manugpagowa sang mga espiritu ukon sa mga manugpakot;#Deut. 18:11. dili kamo magpangita sa ila, sa pagpadagta paagi sa ila: Ako amo ang Ginoo nga inyo Dios.
32“Magtindug ka sa atubangan sang olo nga ubanon, kag tahora ang nawung sang tigulang nga tawo, kag magkahadluk ka sa imo Dios: Ako amo ang Ginoo.
33“Kon magpanlugayaw ang isa ka dumuloong upud sa inyo sa duta ninyo, dili ninyo sia paghimoan sing kalainan. 34Ang dumuloong nga nagapanlugayaw upud sa inyo manginsubong sia sang tumandok sa tunga ninyo, kag higugmaon mo sia subong sang imo kaugalingon; kay nangindumuloong kamo sa duta sang Egipto:#Ex. 22:21; Deut. 24:17-18; 27:19. Ako amo ang Ginoo nga inyo Dios.
35“Dili kamo maghimo sing pagkadimatarung sa paghukom, sa mga talaksan sang kalabaon, ukon sang kabug-aton ukon sang kadamuon. 36Huput kamo sing matarung nga mga timbangan, matarung nga mga itilimbang, matarung nga efa, kag matarung nga hin:#Deut. 25:13-16. Ako amo ang Ginoo nga inyo Dios, nga nagpagowa sa inyo gikan sa duta sang Egipto. 37Kag bantayan ninyo ang tanan kong palatukuran kag ang tanan kong pagsolondan, kag himoon sila: Ako amo ang Ginoo.”
Currently Selected:
LEVITICO 19: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
