LEVITICO 20
20
Ang Silot sa Pagkamakihilawason
1Ang Ginoo nagsiling kay Moises, 2“Isiling sa katawohan sang Israel, Ang bisan sin-o sang katawohan sang Israel, ukon sang mga dumuloong nga nagapanlugayaw sa Israel, nga nagahatag sang iya mga anak kay Moloc patyon sia sa pagkamatuud; ang katawohan sang duta magbato sa iya. 3Igabatok ko man ang akon nawung sa sinang tawo, kag utdon ko sia gikan sa tunga sang iya katawohan, bangud nga nahatag niya ang iban sang iya mga anak kay Moloc, sa pagdagta sang akon santuario kag sa pagpasipala sang akon balaan nga ngalan. 4Kag kon ang katawohan sang duta nagatabon nga mas-a sang ila mga mata sa sinang tawo, kon sia nagahatag sang iban sang iya mga anak kay Moloc, kag wala nagapatay sa iya, 5niyan igabatok ko ang akon nawung sa sinang tawo kag sa iya panimalay, kag utdon sila gikan sa tunga sang ila katawohan, sia kag ang tanan nga nagasonod sa iya sa pagkamakihilawason upud kay Moloc.
6“Kon ang tawo nagaliso sa mga manugpagowa sang mga espiritu kag sa mga manugpakot, sa pagkamakihilawason sa pagsonod sa ila, ibatok ko gid ang akon nawung sa sinang tawo, kag utdon sia gikan sa tunga sang iya katawohan. 7Busa magpahain kamo, kag magpakabalaan kamo; kay Ako amo ang Ginoo nga inyo Dios. 8Bantayan ninyo ang akon mga palatukuran, kag himoon sila; Ako amo ang Ginoo nga nagapakabalaan sa inyo. 9Kay ang tagsatagsa nga nagapakamalaut sa iya amay ukon sa iya iloy patyon sa pagkamatuud;#Ex. 21:17; Mat. 15:4; Mar. 7:10. napakamalaut niya ang iya amay ukon ang iya iloy, ang iya dugo manginsa iya.
10“Kon ang tawo nagapanglahi sa asawa sang iya isigkatawo, ang makilahion nga lalaki kag ang makilahion nga babayi patyon sa pagkamatuud.#Ex. 20:14; Lev. 18:20; Deut. 5:18. 11Ang tawo nga nagahulid sa asawa sang iya amay nagabukas sia sang kahubo sang iya amay; patyon sila nga duha sa pagkamatuud, ang ila dugo manginsa ila.#Lev. 18:8; Deut. 22:30; 27:20. 12Kon ang isa ka tawo maghulid sa iya umagad nga babayi, sila nga duha patyon sa pagkamatuud; nagsinapat sila, ang ila dugo manginsa ila.#Lev. 18:15. 13Kon ang isa ka lalaki maghulid sa lalaki subong sang sa babayi, sila nga duha nagbuhat sing kangil-aran; patyon sila sa pagkamatuud, ang ila dugo manginsa ila.#Lev. 18:22. 14Kon ang isa ka lalaki magpangasawa sa isa ka babayi kag sa iloy niya, pagkamalaut ini; sonogon sila nga duha sa kalayo, sia kag sila, agud nga wala sing pagkamalaut sa tunga ninyo.#Lev. 18:17; Deut. 27:23. 15Kon ang isa ka lalaki maghulid sa isa ka sapat, patyon sia sa pagkamatuud; kag patyon ninyo ang sapat. 16Kon ang isa ka babayi magpalapit sa bisan anong sapat, kag magpakighilawas sa iya, patyon mo ang babayi kag ang sapat; patyon sila sa pagkamatuud, ang ila dugo manginsa ila.#Ex. 22:19.
17“Kon ang isa ka tawo magpakighilawas sa iya utud nga babayi, babayi nga anak sang iya amay ukon anak nga babayi sang iya iloy, kag makakita sang kahubo sang babayi, kag ang babayi makakita sang kahubo sang lalaki, butang ini nga makahuluya, kag utdon sila sa itololok sang mga anak sang ila katawohan; ang kahubo sang iya utud nga babayi ginbuksan niya, magaantus sia sang iya kalautan.#Lev. 18:9; Deut. 27:22. 18Kon ang isa ka lalaki maghulid sa babayi nga nagapamulanon, kag magbukas sang iya kahubo, nabuksan niya ang tuburan niya, kag sia nagbukas sang tuburan sang iya dugo; sila nga duha utdon gikan sa tunga sang ila katawohan.#Lev. 18:19. 19Dili mo pagbuksan ang kahubo sang utud nga babayi sang imo iloy ukon sang babayi nga utud sang imo amay, kay ginbuksan niya ang iya himata nga malapit; sila magaantus sang ila kalautan. 20Kon ang isa ka lalaki maghulid sa asawa sang iya tiyo, ginbuksan niya ang kahubo sang iya tiyo; sila magaantus sang ila sala, mapatay sila nga walay anak.#Lev. 18:12-14. 21Kon ang isa ka lalaki magpakighilawas sa asawa sang iya utud, kahigkoan ini; ginbuksan niya ang kahubo sang iya utud, manginwalay anak sila.#Lev. 18:16.
22“Busa bantayi ninyo ang tanan nakon nga palatukuran kag ang tanan nakon nga pagsolondan, kag himoon sila; agud nga indi kamo pag-isuka sang duta diin ginadala ko kamo sa pagpuyo. 23Kag dili kamo maglakat sa mga batasan sang pungsud nga ginasobol ko gikan sa atubangan ninyo; kay ini tanan nga butang ginhimo nila, kag busa ginkangil-aran ko sila. 24Apang nasiling ko sa inyo, ‘Magapanubli kamo sang duta nila, kag ihatag ko ini sa inyo sa pagtag-iya, sini, dutang nagailig sing gatas kag dugus.’ Ako amo ang Ginoo nga inyo Dios, nga nagpain sa inyo gikan sa mga katawohan. 25Busa magbutang kamo sing katuhayan sa sapat nga matinlo kag sa dimatinlo, kag sa pispis nga dimatinlo kag sa matinlo; kag indi ninyo paghimoon nga kangil-aran ang inyo mga kalag paagi sa sapat ukon paagi sa pispis ukon paagi sa bisan anong butang nga nagadagaya sa duta, nga ginpain ko nga dimatinlo gikan sa inyo. 26Magpakabalaan kamo sa akon; kay ako nga Ginoo balaan, kag ginpain ko kamo gikan sa mga katawohan, agud nga mangin-akon kamo.
27“Ang lalaki man ukon babayi nga manugpagowa sang espiritu ukon manugpakot patyon sa pagkamatuud; batohon sila, ang ila dugo manginsa ila.”
Currently Selected:
LEVITICO 20: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
