LEVITICO 16
16
Ang Adlaw sang Katumbasan
1Ang Ginoo nagpamolong kay Moises, sa tapus sang pagkapatay sang duha ka anak ni Aaron, sang nagpalapit sila sa atubangan sang Ginoo kag napatay; 2kag ang Ginoo nagsiling kay Moises, “Ipamolong kay Aaron nga imo utud nga dili sia sa tanan nga tion magsulud sa balaan nga duug sa sulud sang kumbung,#Heb. 6:19. sa atubangan sang pakilooyan nga yara sa ibabaw sang kaban, agud nga indi sia mapatay; kay ako magapahayag sa panganud sa ibabaw sang pakilooyan. 3Apang sa amo magsulud si Aaron sa balaan nga duug: nga may tinday nga baka nga sa halad-tungud-sa-sala kag carnero nga lalaki sa halad-nga-sinonog.#Heb. 9:7. 4Magsuklub sia sang balaan nga bayo nga lino, kag magsuklub sia sa iya lawas sang poroy nga lino, kag magwagkus sang wagkus nga lino, kag magtakbong sia sang turbante nga lino; ini sila mga panapton nga balaan. Magpaligos sia sang iya lawas sa tubig, kag magsuklub sa ila. 5Kag magkuha sia gikan sa katilingban sang katawohan sang Israel sing duha ka kanding nga lalaki nga sa halad-tungud-sa-sala, kag isa ka carnero nga lalaki sa halad-nga-sinonog.
6“Kag magdolot si Aaron sang tinday nga baka nga lalaki nga halad-tungud-sa-sala nga tungud sa iya kaugalingon, kag maghimo sing katumbasan tungud sa iya kaugalingon kag tungud sa iya panimalay. 7Niyan kuhaon niya ang duha ka kanding, kag ipahamtang sila sa atubangan sang Ginoo sa ganhaan sang layanglayang nga tiliponan; 8kag papalaran ni Aaron ang duha ka kanding, ang isa ka kapalaran tungud sa Ginoo kag ang isa ka kapalaran tungud kay Azazel. 9Kag idolot ni Aaron ang kanding nga nahologan sang kapalaran sa Ginoo, kag idolot sia nga halad-tungud-sa-sala; 10apang ang kanding nga nahologan sang kapalaran kay Azazel ipahamtang nga buhi sa atubangan sang Ginoo sa paghimo sing katumbasan tungud sa iya, sa pagtabog sini tungud kay Azazel sa kamingawan.
11“Si Aaron magdolot sang tinday nga baka sang halad-tungud-sa-sala nga tungud sa iya kaugalingon, kag maghimo sing katumbasan tungud sa iya kaugalingon, kag tungud sa iya panimalay; mag-ihaw sia sang tinday nga baka nga halad-tungud-sa-sala tungud sa iya kaugalingon. 12Kag magkuha sia sing incensario nga puno sang mga baga gikan sa halaran sa atubangan sang Ginoo, kag ang iya mga kamut puno sang incienso nga mahumut nga nabukbuk; kag dalhon ini sa sulud sang kumbung 13kag ibutang niya ang incienso sa kalayo sa atubangan sang Ginoo, agud nga ang panganud sang incienso magtabon sang pakilooyan nga yara sa ibabaw sang pagpamatuud, agud nga indi sia mapatay; 14kag magkuha sia sa dugo sang tinday nga baka, kag iwisik ini sang iya tudlo sa ibabaw sang pakilooyan nayon sa sidlangan, kag sa atubangan sang pakilooyan iwisik niya sing makapito sang iya tudlo ang dugo.
15“Niyan ihawon niya ang kanding sang halad-tungud-sa-sala nga tungud sa katawohan, kag dalhon ang iya dugo sa sulud sang kumbung,#Heb. 9:12. kag himoon sa iya dugo subong sang ginhimo niya sa dugo sang tinday nga baka, kag iwisik ini sa ibabaw sang pakilooyan kag sa atubangan sang pakilooyan; 16Sa amo maghimo sia sing katumbasan tungud sa balaan nga duug, bangud sang mga pagkadimatinlo sang katawohan sang Israel, kag bangud sang ila mga paglapas, bisan ang tanan nila nga mga sala; kag amo ini ang himoon niya sa layanglayang nga tiliponan, nga nagapuyo upud sa ila sa tunga sang ila mga pagkadimatinlo. 17Manginwala sing tawo sa layanglayang nga tiliponan kon magsulud sia sa paghimo sing katumbasan sa sulud sang balaan nga duug tubtub nga maggowa sia kag nakahimo sing katumbasan tungud sa iya kaugalingon kag tungud sa iya panimalay kag tungud sa bug-os nga katilingban sang Israel. 18Niyan maggowa sia pakadto sa halaran nga yara sa atubangan sang Ginoo kag maghimo sing katumbasan tungud sini, kag magkuha sia sa dugo sang tinday nga baka kag sa dugo sang kanding, kag ipalhit ini sa mga sungay sang halaran palibut. 19Kag wisikan niya ini sang dugo sa iya tudlo sing makapito, kag tinloan ini kag pakabalaanon ini gikan sa mga pagkadimatinlo sang katawohan sang Israel.
20“Kag sang nakatapus sia sa paghimo sing katumbasan tungud sa balaan nga duug kag sa layanglayang nga tiliponan kag sa halaran, idolot niya ang kanding nga buhi; 21kag ibutang ni Aaron ang duha niya ka kamut sa olo sang kanding nga buhi, kag itu-ad sa iya ang tanan nga kalautan sang katawohan sang Israel, kag ang tanan nila nga paglapas, bisan ang tanan nila nga sala; kag itungtung niya sila sa olo sang kanding, kag ipadala sia sa kamingawan sa kamut sang isa ka tawo nga nahanda. 22Ang kanding magadala sa iya sang tanan nga kalautan nila sa duta nga mamingaw; kag buhian niya ang kanding sa kamingawan.
23“Niyan si Aaron magsulud sa layanglayang nga tiliponan, kag mag-uba sang mga panapton nga lino nga ginsuklub niya sang pagsulud niya sa balaan nga duug, kag ibilin sila didto;#Ezeq. 44:19. 24kag magdigos sia sang iya lawas sa tubig sa duug nga balaan, kag magsuklub sang iya mga panapton, kag maggowa, kag magdolot sang iya halad-nga-sinonog kag sang halad-nga-sinonog sang katawohan, kag maghimo sing katumbasan tungud sa iya kaugalingon kag tungud sa katawohan. 25Kag sonogon niya sa ibabaw sang halaran ang sapay sang halad-tungud-sa-sala. 26Kag ang nagbuhi sang kanding tungud kay Azazel magbunak sang iya mga panapton kag magdigos sang iya lawas sa tubig, kag ugaling magsulud sia sa dologan. 27Kag ang tinday nga baka nga lalaki sang halad-tungud-sa-sala kag ang kanding sang halad-tungud-sa-sala, nga ang ila dugo gindala sa sulud sang balaan nga duug sa paghimo sing katumbasan, dalhon sa gowa sang dologan;#Heb. 13:11. kag sonogon sa kalayo ang ila mga panit kag ang ila unud kag ang ila ipot. 28Kag ang nagasonog sa ila magbunak sang iya mga panapton kag magdigos sang iya lawas sa tubig, kag ugaling makasulud sia sa dologan.
29“Kag ini manginpalatukuran ninyo nga dayon nga sa bulan nga ikapito, sa ikapulo nga adlaw sang bulan, pit-an ninyo ang inyo mga kalag, kag indi maghimo sang bisan ano nga bagay sang buluhaton, ang tumandok ukon ang dumuloong nga nagapanlugayaw sa tunga ninyo;#Lev. 23:26-32; Num. 29:7-11. 30kay sa sining adlaw himoon ang katumbasan tungud sa inyo, sa pagtinlo sa inyo; gikan sa tanan ninyo nga sala tinloan kamo sa atubangan sang Ginoo. 31Ini inugpahuway sang maligdong nga pahuway sa inyo, kag pit-an ninyo ang inyo mga kalag; ini palatukuran nga dayon. 32Kag ang sacerdote nga haplason kag ihalad subong nga sacerdote nga tal-us sang iya amay maghimo sang katumbasan, kag magsuklub sang balaan nga mga panapton nga lino; 33maghimo sia sing katumbasan tungud sa santuario, kag maghimo sia sing katumbasan tungud sa layanglayang nga tiliponan kag tungud sa halaran, kag maghimo sia sing katumbasan tungud sa mga sacerdote kag tungud sa bug-os nga katawohan sang pagtilipon. 34Kag ini manginpalatukuran ninyo nga dayon, sa paghimo sing katumbasan sing makaisa sa tuig tungud sa katawohan sang Israel bangud sang tanan nila nga sala.” Kag ginhimo ni Moises sono sa ginsogo sang Ginoo sa iya.
Currently Selected:
LEVITICO 16: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
