LEVITICO 15
15
Dimatinlo nga mga Panggowa gikan sa Lawas
1Ang Ginoo nagsiling kay Moises kag kay Aaron, 2“Isiling sa katawohan sang Israel, Kon ang bisan sin-o nga lalaki may panggowa gikan sa iya lawas, bangud sa iya panggowa dimatinlo sia. 3Kag amo ini ang iya pagkadimatinlo sa iya panggowa: kon ang iya lawas nagapailig sang iya panggowa, ukon ang iya lawas nagtugon gikan sa iya panggowa, ini iya pagkadimatinlo. 4Ang tagsa ka higdaan nga ginahigdaan sang may panggowa magadimatinlo; kag ang tagsa ka butang nga ginalingkoran niya magadimatinlo. 5Kag ang bisan sin-o nga nagatandug sang iya higdaan magbunak sang iya mga panapton, kag sia magpaligos sa tubig, kag magadimatinlo sia tubtub sa kahaponon. 6Kag ang nagalingkod sa bisan ano nga butang nga nalingkoran sang may panggowa magbunak sang iya mga panapton, kag magpaligos sia sa tubig, kag magadimatinlo tubtub sa kahaponon. 7Kag ang nagatandug sang lawas sang may panggowa magbunak sang iya mga panapton, kag magpaligos sia sa tubig, kag magadimatinlo tubtub sa kahaponon. 8Kag kon ang may panggowa magdupla sa iya nga matinlo, niyan sia magbunak sang iya mga panapton, kag magpaligos sia sa tubig, kag magadimatinlo tubtub sa kahaponon. 9Kag bisan ano nga salakyan nga ginasakyan sang may panggowa magadimatinlo. 10Kag ang bisan sin-o nga nagatandug sang bisan ano nga butang nga yara sa idalum niya magadimatinlo tubtub sa kahaponon; kag ang nagadala sadtong mga butang magabunak sang iya mga panapton, kag magapaligos sa tubig, kag magadimatinlo tubtub sa kahaponon. 11Kag ang bisan sin-o nga matandug sang ginapanggowaan, nga wala sia anay makapanghinawsa tubig sang iya mga kamut sia magbunak sang iya mga panapton, kag magpaligos sa tubig, kag magadimatinlo tubtub sa kahaponon. 12Kag ang suludlan nga daga nga ginatandug sang ginapanggowaan boongon; kag ang tagsa ka gamit nga kahoy hugasan sa tubig.
13“Kag kon ang ginapanggowaan matinloan sang iya panggowa, niyan mag-isip sia sing pito ka adlaw nga sa iya pagpaninlo, kag magbunak sia sang iya mga panapton; magpaligos sang iya lawas sa tubig nga nagailig, kag magamatinlo. 14Kag sa ikawalong adlaw magkuha sia sing duha ka tukmo ukon duha ka kuyabog nga salampati, kag magkadto sa atubangan sang Ginoo sa ganhaan sang layanglayang nga tiliponan, kag ihatag sila sa sacerdote; 15kag ang sacerdote maghalad sa ila, ang isa nga sa halad-tungud-sa-sala kag ang isa nga sa halad-nga-sinonog; kag ang sacerdote maghimo sing katumbasan tungud sa iya sa atubangan sang Ginoo bangud sang panggowa niya.
16“Kag kon ang binhi sang bisan sin-o nga tawo mag-awas gikan sa iya, magpaligos sia sa tubig sang bug-os niya nga lawas, kag magadimatinlo tubtub sa kahaponon. 17Kag ang tagsa ka panapton kag ang tagsa ka panit nga inawasan sang iya binhi hugasan sa tubig, kag magadimatinlo ini tubtub sa kahaponon. 18Ang babayi man nga nahuliran sang lalaki nga inawasan sang binhi, sila nga duha magpaligos sa tubig, kag magadimatinlo tubtub sa kahaponon.
19“Kon ang babayi may panggowa kag ang panggowa sa iya lawas dugo, magpain sia sing pito ka adlaw, kag ang bisan sin-o nga nagatandug sa iya magadimatinlo tubtub sa kahaponon. 20Kag ang tagsa ka butang nga ginahigdaan niya sa iya pagpamulanon magadimatinlo; ang tagsa ka butang man nga ginalingkoran niya magadimatinlo. 21Kag ang bisan sin-o nga nagatandug sang iya higdaan magbunak sang iya mga panapton, kag magpaligos sa tubig, kag magadimatinlo tubtub sa kahaponon. 22Kag ang bisan sin-o nga nagatandug sang bisan ano nga ginalingkoran niya magbunak sang iya mga panapton, kag magpaligos sa tubig, kag magadimatinlo tubtub sa kahaponon; 23kon ini sa higdaan ukon sa bisan ano nga ginalingkoran niya, kon matandug sang lalaki ini magadimatinlo sia tubtub sa kahaponon. 24Kag kon ang bisan sin-o nga lalaki maghulid sa iya, kag ang iya pagkahigko yara sa lalaki, magadimatinlo sia sing pito ka adlaw; kag ang tagsa ka higdaan nga ginahigdaan niya magadimatinlo.
25“Kon ang babayi may panggowa sang iya dugo sa malawig nga mga adlaw, indi sa tion sang iya pamulanon, ukon may panggowa sia labaw sa tion sang iya pamulanon, sa tanan nga adlaw sang panggowa sang iya pagkadimatinlo, manginsubong sia sang sa mga adlaw sang iya pamulanon; dimatinlo sia. 26Ang tagsa ka higdaan nga ginahigdaan niya, sa tanan nga adlaw sang panggowa sa iya, manginsubong sang higdaan sang iya pagpamulanon; kag ang tagsa ka butang nga ginalingkoran niya magadimatinlo, subong sang pagkadimatinlo sang iya pagpamulanon. 27Kag ang bisan sin-o nga nagatandug sadtong mga butang magadimatinlo, kag magbunak sang iya mga panapton, kag magpaligos sa tubig, kag magadimatinlo tubtub sa kahaponon. 28Apang kon sia magtinlo sang panggowa sa iya, mag-isip sia nga sa iya sing pito ka adlaw, kag sa tapus sina magamatinlo sia. 29Kag sa ikawalong adlaw magkuha sia sing duha ka tukmo ukon duha ka kuyabog nga salampati, kag dalhon sila sa sacerdote, sa ganhaan sang layanglayang nga tiliponan. 30Kag ang sacerdote maghalad sang isa nga sa halad-tungud-sa-sala kag ang isa sa halad-nga-sinonog; kag ang sacerdote maghimo sing katumbasan tungud sa iya sa atubangan sang Ginoo tungud sa panggowa sang iya pagkadimatinlo.
31“Subong sini ang pagpain ninyo sang katawohan sang Israel sa ila pagkadimatinlo, agud nga indi sila mapatay sa ila pagkadimatinlo kon dagtaan nila ang akon kayangkayang nga yara sa tunga nila.”
32Ini amo ang kasogoan nahanungud sa lalaki nga may panggowa kag sa lalaki nga ginaawasan sang iya binhi, sa bagay nga dimatinlo sia bangud sini; 33kag nahanungud sa babayi nga nagabalatian sa iya pagkadimatinlo; kag sa lalaki nga may panggowa, sa lalaki ukon sa babayi, kag sa lalaki nga nagahulid sa babayi nga dimatinlo.
Currently Selected:
LEVITICO 15: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
