LEVITICO 17
17
Isa ka Duug sang Paghalad
1Kag ang Ginoo nagpamolong kay Moises, 2“Ipamolong kay Aaron kag sa iya mga anak, kag sa tanan nga katawohan sang Israel, Ini amo ang butang nga ginsogo sang Ginoo. 3Kon ang bisan sin-o nga tawo sa panimalay sang Israel nga nagaihaw sang baka nga lalaki ukon cordero ukon kanding sa dologan, ukon nagaihaw sini sa gowa sang dologan, 4kag wala magdala sini sa ganhaan sang layanglayang nga tiliponan, sa pagdolot sining halad sa Ginoo sa atubangan sang kayangkayang sang Ginoo, ang dugo ipabangud sa sinang tawo; naka-ula sia sing dugo; kag inang tawo utdon gikan sa iya katawohan. 5Ini sa katuyoan nga ang katawohan sang Israel magdala sang ila mga halad nga ginahalad nila sa wayang, agud nga dalhon gid nila sila sa Ginoo, sa sacerdote sa ganhaan sang layanglayang nga tiliponan, kag ihalad sila nga halad sang mga halad-sa-paghidait sa Ginoo; 6kag ang sacerdote magwisik sang dugo sa ibabaw sang halaran sang Ginoo sa ganhaan sang layanglayang nga tiliponan, kag magsonog sang sapay nga sa kaamyon sa Ginoo. 7Gani dili na sila maghalad sang ila mga halad sa mga kanding nga lalaki, nga nagamakihilawason sila sa pagsonod sa ila. Ini manginpalatukuran nga dayon sa ila sa bug-os nila nga mga kaliwatan.
8“Kag magsiling ka sa ila, Ang bisan sin-o nga tawo sa panimalay sang Israel, ukon sang mga dumuloong nga nagapanlugayaw sa tunga nila, nga nagadolot sing halad-nga-sinonog ukon halad, 9kag wala nagadala sini sa ganhaan sang layanglayang nga tiliponan, sa paghalad sini sa Ginoo; inang tawo utdon gikan sa iya katawohan.
Ang Pagkaon sang Dugo Ginadumilian
10“Ang bisan sin-o nga tawo sa panimalay sang Israel ukon sa mga dumuloong nga nagapanlugayaw sa tunga nila nga nagakaon sang bisan ano nga bagay sang dugo, ipahamtang ko ang akon nawung batok sinang tawo nga nagakaon sing dugo, kag utdon sia gikan sa iya katawohan.#Gen. 9:4; Lev. 7:26-27; 19:26; Deut. 12:16, 23; 15:23. 11Kay ang kabuhi sang unud yara sa dugo; kag ginhatag ko ini sa inyo sa ibabaw sang halaran sa paghimo sing katumbasan tungud sa inyo mga kalag; kay ang dugo amo ang nagahimo sing katumbasan,#Heb. 9:22. bangud sang kabuhi. 12Busa nagsiling ako sa katawohan sang Israel, Wala sing tawo sa inyo nga magkaon sing dugo, ukon wala sing bisan sin-o nga dumuloong nga nagapanlugayaw sa tunga ninyo nga magkaon sing dugo. 13Ang bisan sin-o nga tawo sa katawohan sang Israel, ukon sa mga dumuloong nga nagapanlugayaw sa tunga nila, nga nagakuha sa pangayam sing bisan ano nga sapat ukon pispis nga makaon iula niya ang iya dugo kag tabonan ini sing yab-ok.
14“Kay nahanungud sa kabuhi sang tanan nga unud ang iya dugo iya kabuhi; busa nagsiling ako sa katawohan sang Israel, Dili kamo magkaon sang dugo sang bisan ano nga bagay sang unud, kay ang kabuhi sang tanan nga unud amo ang iya dugo; ang bisan sin-o nga nagakaon sini utdon. 15Kag ang tagsa ka tawo nga nagakaon sang napatay sa iya kaugalingon ukon sang kinusnit sang mga sapat, bisan sia tumandok ukon manlulugayaw, magbunak sia sang iya mga panapton, kag magpaligos sia sa tubig, kag magadimatinlo sia tubtub sa kahaponon; niyan magamatinlo sia. 16Apang kon indi niya pagbunakan sila, ukon pagdigoson ang iya lawas, niyan magaantus sia sang iya kalautan.”
Currently Selected:
LEVITICO 17: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
