JOB 37
37
1“Sa sini nagakurug ang akon tagiposoon,
kag nagahalin gikan sa iya duug.
2Pamatii ang gahud sang iya tingug
kag ang tonog nga nagagowa sa iya baba.
3Ginapagowa niya ini sa idalum sang bug-os nga langit,
kag ang iya kilat tubtub sa mga ukbung sang duta.
4Sa olihi sini nagangurub ang iya tingug;
nagadaguub sia sa tingug sang iya pagkahalangdon
kag kon mabatian ang iya tingug wala niya ginapunggi ang mga kilat.
5Sa iya tingug nagadaguub ang Dios sing makatilingala;
sia nagahimo sing dalagku nga mga butang nga indi naton mahangpan.
6Kay sa nieve nagasiling sia, ‘Tupa ka sa duta’;
subong man sa talithi kag sa ulan, ‘Magmabaskug.’
7Ginapunggan niya ang kamut sang tagsa ka tawo,
agud nga ang tanan nga tawo nga iya ginhimo makakilala sini.
8Niyan ang mga sapat magasulud sa ila mga palanagoan,
kag magapabilin sa ila mga hukmongan.
9Gikan sa hulut sang bagatnan nagagowa ang unus,
kag ang tugnaw gikan sa aminhan.
10Tungud sa ginhawa sang Dios ginahatag ang hielo,
kag ang kasangkad sang mga tubig nagahuman.
11Ginalulanan niya ang madamul nga gal-um sing kahun-og;
ginapalapnag niya ang gal-um sang iya kilat.
12Nagalibut ini tungud sa iya pagtuytuy,
agud nga maghimo sila sang bisan ano nga ginasogo niya sa ila
sa kadaygan sang mapuy-an nga kalibutan.
13Kon ini tungud sa pagbadlong, ukon tungud sa iya duta,
ukon sa gugma, ginapaabut niya ini.
14“Pamatii ini, O Job;
pahimonong ka kag patugsilingi ang makatilingala nga mga binuhatan sang Dios.
15Nakahibalo ka bala kon paano ang pagtatap sang Dios sa ila,
kag ang pagpasilak sang kilat sang iya gal-um?
16Nakahibalo ka bala sang pagpanimbang sang mga gal-um,
ang makatilingala nga mga binuhatan niya nga himpit sa ihibalo,
17kon paano bala nga ang imo panapton mainit
kon ang duta matinong bangud sang habagat?
18Makahumlad ka bala, kaangay sa iya, sang kahawaan,
nga mabakud subong sang salaming nga tinunaw?
19Tudloi kami sang isiling namon sa iya;
kay indi kami makapaagisud sang amon hambal bangud sang kadudulman.
20Isugid bala sa iya nga magpamolong ako?
Ukon maghandum bala ang tawo nga linamon sia?
21“Kag karon ang mga tawo indi makakita sang kapawa
kon masanag sa kahawaan,
kon ang hangin nagaagi kag nagapanas sa ila.
22Gikan sa aminhan nagagowa ang bulawanon nga banaag;
ang Dios may iya sang makakulugmat nga pagkaharianon.
23Ang Makaako—indi kita makatungkad sa iya;
lakas gid sia sa gahum kag sa katarungan,
kag sa bugana nga pagkamatarung indi sia magsakit.
24Busa nagakahadluk sa iya ang mga tawo;
wala sia nagapasulabi sa bisan kay sin-o nga maalam sa tagiposoon.”
Currently Selected:
JOB 37: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
