JOB 38
38
Ang Ginoo Nagapatalupangud kay Job sang Iya Pagkapakok
1Niyan ang Ginoo nagsabat kay Job gikan sa buhawi:
2“Sin-o bala ini nga nagapadulum sang laygay
sa mga polong nga wala sing ihibalo?
3Wagkusi ang imo hawak kaangay sang lalaki,
kay ako magakinahanglan sa imo, kag pahayagan mo ako.
4“Diin ka bala sang ako nagpasad sang mga sadsaran sang duta?
Ipahayag, kon may paghangup ka.
5Sin-o bala ang nagpat-ud sang iya mga takus—sa pagkamatuud nakahibalo ka!
Ukon sin-o bala ang nag-untay sa ibabaw niya sang latid?
6Sa ibabaw sang ano bala matakud ang iya mga sadsaran,
ukon sin-o bala ang nagpasad sang iya bato nga pamag-ang,
7sang nag-ambahan sing tingub ang kabitoonan sang kaagahon,
kag naghinugyaw sa kalipay ang tanan nga anak sang Dios?
8“Ukon sin-o bala ang nagtakup sang dagat sing mga ganhaan,
sang nagsagawak ini subong nga daw naggowa sa taguangkan;
9sang paghimo ko sang mga panganud nga panapton niya,
kag sang pitipit nga kadudulman nga iya putus,
10kag gintandaan ko nga sa iya ang akon dulunan,
kag ginbutangan sia sing mga pintal kag mga ganhaan,
11kag nagsiling, ‘Tubtub diri magalambut ka, apang indi na maglakbang,
kag diri magadolog ang bugalon mong mga balud’?#Jer. 5:22.
12“Nagsogo ka bala sang kaagahon kutub sang pagsugud sang imo mga adlaw,
kag ginpakilala mo ang pamanagbanag sang iya duug,
13agud nga maghugakum ini sang kaukbungan sang duta,
kag ang mga malauton matuk-ap gikan sini?
14Nagabalhin ini subong sang lunang sa idalum sang inugpat-in,
kag nagapahayag ang tanan nga butang subong sang panapton.
15Sa mga malauton ginadumili ang ila kapawa,
kag ang butkon nga mataas ginabali.
16“Nakasulud ka bala sa mga tuburan sang dagat,
ukon nakalakat ka bala sa sulud sang kadadalman?
17Napahayag bala sa imo ang mga gawang sang kamatayon,
ukon nakakita ka bala sang mga gawang sang landong sang kamatayon?
18Nakahantup ka bala sang mga kasangkaron sang duta?
Ipahayag, kon nakahibalo ka sini tanan.
19“Diin bala ang dalan pakadto sa puluy-an sang kapawa,
kag nahanungud sang kadudulman diin bala ang iya duug,
20agud nga madul-ong mo ini sa iya dulunan
kag nga mahantupan mo ang mga banas pakadto sa iya balay?
21Nakahibalo ka, kay natawo ka na sadto,
kag daku ang kadamuon sang imo mga adlaw!
22“Nakasulud ka bala sa mga bahandian sang nieve,
ukon nakakita ka bala sang mga bahandian sang ulan nga hielo,
23nga gintigana ko batok sa tion sang kagamo,
batok sa adlaw sang pag-away kag inaway?
24Diin bala ang dalan pakadto sa duug nga ginapihakan sang kapawa,
ukon ang paglapnag sang salatan sa ibabaw sang duta?
25“Sin-o bala ang naggigi sing iligan sang baha,
ukon sing alagyan nga sa mga kilat sang daguub,
26sa pagpaulan sa duta nga walay tawo,
sa kamingawan nga walay tawo;
27sa pagbusug sang duug nga nahapay kag mamingaw,
kag sa pagpatubo sang gutuk nga hilamon?
28“May amay bala ang ulan,
ukon sin-o bala ang nag-anak sang mga tinolo sang ton-og?
29Gikan kay sin-o bala nga tiyan naggowa ang hielo,
kag ang yab-ok nga hielo sang langit sin-o bala ang nag-anak sini?
30Ang mga tubig nagpanago kag nagbagtik kaangay sang bato,
kag ang nawung sang kadadalman nagahuman.
31“Makabugkos ka bala sang pinungpung sang Pleyades,
ukon makahubad sang mga higot sang Orion?#Job 9:9; Amos 5:8.
32Makapagowa ka bala sang Mazarot sa ila panag-on,
ukon makatuytuy ka bala sang Oso pati sang iya mga anak?
33Nahibaloan mo bala ang mga pagsolondan sang mga langit?
Sarang mo bala matukud ang ila pagbulut-an sa duta?
34“Makabayaw ka bala sang imo tingug sa mga panganud,
agud nga ang buganang tubig magtabon sa imo?
35Makapadala ka bala sing mga kilat, agud nga magkadto sila
kag magsiling sa imo, ‘Yari kami’?
36Sin-o bala ang nagbutang sing kaalam sa nasulud nga mga bahin,
ukon sin-o bala ang naghatag sing ihibalo sa painoino?
37Sin-o bala ang makaisip sang mga panganud sa kaalam?
Ukon sin-o bala ang makaula sang mga suludlan sang langit,
38kon ang yab-ok magdalagan sa pagbilog
kag ang mga puga magtapikay?
39“Makapangayam ka bala sang tulukbon nga sa leon nga babayi,
ukon makabusug ka bala sang kaila sang totoy nga mga leon,
40kon magluko sila sa ila mga lungib,
ukon magpabilin sila sa ila mga palanagoan sa pagpuut?
41Sin-o bala ang nagaaman sa uwak sang iya dalagiton,
kon ang iya mga piso nagtuaw sa Dios,
kag magdalangdalang tungud sa pagkakulang sing kalan-on?
Currently Selected:
JOB 38: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
