JOB 36
36
Si Elihu Nagapakataas sang Pagkadaku sang Dios
1Si Elihu nagapadayon, kag nagsiling:
2“Pabayai ako sing diotay, kag pahayagan ko ikaw,
kay may isiling pa ako nahanungud sa Dios.
3Magakuha ako sang akon ihibalo gikan sa malayo,
kag ipahanungud ko ang pagkamatarung sa akon Magbubuhat.
4Kay sa pagkamatuud ang akon mga polong indi binutig;
ang isa nga himpit sa ihibalo nagaupud sa imo.
5“Yari karon, ang Dios gamhanan, kag wala nagahikay bisan sa kay sin-o;
gamhanan sia sa kusug sang paghangup.
6Sia wala nagatipig sang kabuhi sang malauton,
kondi nagahatag sa napiotan sang ila matarung.
7Wala niya ginapabulag ang iya mga mata sa matarung,
kondi sa mga hari sa trono
ginapalingkod niya sila sa gihapon, kag ginabayaw sila.
8Kag kon magapus sila sa mga grilyos
kag masiod sa mga lubid sang kapipit-an,
9niyan ginapakitaan niya sila sang ila binuhatan
kag sang ila mga paglalis, nga nagbugalon sila.
10Ginabuksan man niya ang ila mga idulungug sa pagtudlo,
kag nagasogo nga magtalikod sila sa kalautan.
11Kon magpamati sila kag mag-alagad sa iya,
hinguyangon nila ang ila mga adlaw sa kauswagan,
kag ang ila mga tuig sa mga kalipayan.
12Apang kon indi sila magpamati, mawala sila tungud sa hinganiban,
kag mapatay nga wala sing ihibalo.
13“Apang ang mga wala sing Dios sa tagiposoon nagahuput sing kaakig;
wala sila nagasinggit sing pagtabang kon gapuson niya sila.
14Nagakamatay sila sa pagkapamatan-on,
kag ang ila kabuhi nagakawala sa tunga sang mga dimatinlo.
15Ginaluwas niya ang napiotan tungud sang ila kapipit-an,
kag nagabukas sang ila idulungug sa pagpigus.
16Ginhaylo ka niya pagowa sa kasisit-an
pakadto sa masangkad nga duug nga wala sing kakitid,
kag ang ginabutang sa imo latok manginpuno sang katambok.
17“Apang ikaw puno sang paghukom sang malauton;
ang paghukom kag ang katarungan nagadakup sa imo.
18Kay ang kasingkal indi magpainit sa imo batok sa mga pagsilot;
kag ang kadakuon sang gawad indi magpalipas sa imo.
19Mangintuman na bala ang imo pagtuaw agud nga indi ka pagsakiton,
ukon ang tanan nga ikasarang sang imo kusug?
20Dili paghanduma ang kagab-ihon,
san-o nagakadula ang mga katawohan sa ila duug.
21Andam ka, indi pagsapaka ang kalautan:
kay ini ginapili mo sang sa kapipit-an.
22Yari karon, ang Dios nagapahayag nga mataas sa iya gahum;
sin-o bala ang manunudlo kaangay sa iya?
23Sin-o bala ang nagtudlo sa iya sang iya dalanon,
ukon sin-o bala ang makasiling, ‘Naghimo ka sing pagkadimatarung’?
24“Dumduma nga padakuon mo ang iya binuhatan,
nga gin-amba sang mga tawo.
25Ang tanan nga tawo nagtolok sini;
ang tawo nagalantaw sini sa malayo.
26Yai karon, ang Dios daku, kag wala kita makakilala sa iya;
ang kadamuon sang iya mga tinuig dimatungkad.
27Kay ginabatak niya ang mga tinolo sang tubig,
nga nagatolo sa ulan gikan sa iya alisngaw
28nga ginaula sang kahawaan,
kag ginapatupa sing bugana sa tawo.
29May bisan sin-o bala nga makahangup sang paghumlad sang mga gal-um,
sang mga dinaguub sang iya layanglayang?
30Yari karon, ginapalapta niya ang iya kapawa sa palibut niya,
kag ginatabonan niya ang kadadalman sang dagat.
31Kay tungud sini ginahukman niya ang mga katawohan;
nagahatag sia sing kalan-on nga bugana.
32Ginaputus niya ang iya mga kamut sang kilat,
kag ginatugnan ini nga tup-an niya ang iligoon.
33Ang iya gahud nagasugid nahanungud sa iya,
ang kahayupan man nahanungud sang unus nga nagaabut.
Currently Selected:
JOB 36: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
