JOB 29
29
Si Job Nagapanumdum sang Iya Nahaunang Kalipay
1Kag liwat si Job naggamit sang iya paanggid, kag nagsiling:
2“O, kabay pa kuntani nga subong ako sang sa mga bulan nga nagligad,
subong sang sa mga adlaw nga ang Dios nagbantay sa akon;
3sang nagabanaag ang iya suga sa akon olo,
kag tungud sa iya kapawa nag-agi ako sa kadudulman;
4subong sa mga adlaw sang akon pagkagulang,
sang yara sa akon layanglayang ang pagpakig-abyan sang Dios;
5sang nag-upud pa sa akon ang Makaako,
kag ang akon mga anak yara sa palibut nakon;
6sang gindigus ang akon mga tikang sing latab,
kag ang igang nag-ula sa akon sing mga ilig nga lana!
7Sang naggowa ako sa gawang pakadto sa banwa,
sang nag-aman ako sang akon lingkoran sa dalan,
8ang mga pamatan-on nga lalaki nakakita sa akon kag nagpanago sila,
kag ang mga tigulang nagtindug kag nagtadlong;
9ang mga principe nag-untat sa pagpamolong,
kag nagtabon sang ila kamut sa ila baba;
10ang tingug sang mga dungganon naghipus,
kag ang ila dila nagtapik sa ila ngalagngag.
11Sang nakabati sa akon ang mga idulungug, niyan nagpakamaayo ini sa akon,
kag sang nakakita sa akon ang mga mata, nagsaksi ini sa akon;
12bangud nga ginluwas ko ang imol nga nagsinggit,
ang ilo man nga wala sing nagbulig sa iya.
13Ang pagpakamaayo sang buut na mawala nag-abut sa akon,
kag ginpaamba ko sa kalipay ang tagiposoon sang balo nga babayi.
14Nagsuklub ako sing pagkamatarung, kag ginpanaptan ako sini;
ang akon katarung subong sang kunup kag sang turbante.
15Ako nga mata sa bulag,
kag mga tiil ako sa piang.
16Amay ako sa mga nawad-an,
kag gin-usisa ko ang kasuayon sang wala ko makilala.
17Ginboong ko ang mga bangkil sang dimatarung,
kag gin-agaw ko ang tinukub sa iya mga ngipon.
18Niyan nagsiling ako, ‘Mapatay ako sa akon pugad,
kag pabuaron ko ang akon mga adlaw subong sang balas,
19ang akon gamut nagapangalapkap sa mga tubig,
kag ang ton-og nagaholon sa bug-os nga gab-i sa akon mga sanga,
20ang akon himaya lab-as sa akon,
kag ang akon pana ginabag-o sa akon kamut.’
21“Ginpamatian ako sang mga tawo, kag ginhulat,
kag naghipus tungud sa akon laygay.
22Sa tapus sang akon mga polong wala na sila maghambal,
kag ang akon hambal nagtolo sa ila.
23Ginhulat nila ako subong sa ulan;
kag ginnganga nila ang ila baba subong nga sa naolihi nga ulan.
24Nagyuhum ako sa ila, kon wala sila sing pagsalig;
kag ang kasilak sang akon nawung wala nila mapasubo.
25Ginpili ko ang dalanon nila, kag naglingkod subong nga puno,
kag nagpuyo subong nga hari sa hangaway,
subong sang isa nga nagalipay sang mga nagalalaw.
Currently Selected:
JOB 29: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
