JOB 28
28
Ang Tawo Nagapangita sang Kaalam
1“Sa pagkamatuud may minahan sang pilak,
kag may duug sa bulawan nga ginaulay nila.
2Ang salsalon ginakutkut gikan sa duta,
kag ang tumbaga ginatunaw gikan sa bato.
3Ginabutangan sang tawo sing katapusan ang kadudulman,
kag ginausisa tubtub sa kalayoan nga ukbung
ang mga bato nga dimakita kag pitipit nga kadudulman.
4Nagakutkut sia sing minahan nga malayo sa ginapuy-an sang mga tawo;
nalimtan sila sang mga tiil;
nagakabit sila malayo sa mga tawo, nagahabog sila.
5Nahanungud sa duta, nagagowa sa iya ang kalan-on;
kag sa idalum sini subong nga daw ginabaliskad sang kalayo.
6Ang iya mga bato duug sang mga safiro,
kag may yab-ok nga bulawan.
7“Ina nga banas wala mahibaloi sang pispis nga mananagit,
kag ang mata sang falcon wala makakita sini.
8Wala ini matapaki sang mga sapat nga mabangis;
ukon maagihan ini sang leon nga mapintas.
9“Sa igang nga santikan ginabutang niya ang iya kamut;
ginabaliskad niya sa gamut ang kabukiran.
10Sa mga igang nagakutkut sia sang mga alagyan,
kag ang iya mata nakakita sang tagsa ka bilidhon nga butang.
11Ginapunggan niya ang mga ilig nga indi sila magtubud,
kag ang mga butang nga natago ginapagowa niya sa kapawa.
12“Apang diin bala makita ang kaalam?
Kag diin bala ang duug sang paghangup?
13Ang iya bili sini wala mahibaloi sang tawo,
kag indi makita sa duta sang mga nagakabuhi.
14Ang kadadalman nagasiling, ‘Wala ini sa akon,’
kag ang dagat nagasiling, ‘Wala ini sa akon.’
15Indi ini maagum tungud sa bulawan,
kag ang iya bili indi matimbangan sing pilak.
16Indi ini mapabilihan sa bulawan sang Ofir,
sa bilidhon nga onice ukon sa safiro.
17Indi makatupong sini ang bulawan kag salaming,
kag indi mabaylo sa mga huluyason nga bulawan nga bus-og.
18Indi masambit ang banawog ukon katya;
ang bili sang kaalam labaw pa sa mga mutya.
19Indi makatupong sini ang topacio sang Etiopia,
kag indi ini mapabilihan sa ulay nga bulawan.
20“Niyan diin bala nagagikan ang kaalam?
Kag diin bala ang duug sang paghangup?
21Sa ginatan-aw nga nalipdan ini sa mga mata sang tanan nga nagakabuhi,
kag natago gikan sa kapispisan sang mga langit.
22Ang Kalaglagan kag Kamatayon nagasiling,
‘Nakabati kami sa amon mga idulungug sing kinunokuno sini.’
23“Ang Dios nakahangup sang dalan sini,
kag nahibaloan niya ang duug sini.
24Kay nagatolok sia sa mga ukbung sang duta,
kag makakita sa idalum sang bug-os nga langit.
25Sang paghatag niya sing kabug-at sa hangin,
kag pagsukub niya sang mga tubig paagi sa talaksan;
26sang paghimo niya sing mando sa ulan,
kag dalan sa kilat sang daguub;
27niyan nakita niya ini kag ginpahayag ini;
ginpalig-on niya ini, kag gin-usisa ini.
28Kag nagsiling sia sa tawo,
‘Yari karon, ang kahadluk sa Ginoo, ina amo ang kaalam;#Sal. 111:10; Hulu. 9:10.
kag ang pagtalikud sa malaut amo ang paghangup.’”
Currently Selected:
JOB 28: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
