JOB 27
27
Si Job Nagasaysay sang Bahin sang Malauton
1Kag liwat si Job naggamit sang iya paanggid, kag nagsiling:
2“Sa nagakabuhi ang Dios, nga nagkuha sang akon kinamatarung,
kag ang Makaako, nga nagpapait sang akon kalag;
3tubtub ang akon kabuhi bug-os pa sa akon,
kag ang espiritu sang Dios yari sa akon mga ilong;
4Ang akon mga bibig indi magpamolong sing dimatarung,
kag ang akon dila indi magbungat sing limbong.
5Malayo sa akon nga magpakamatarung ako sa inyo;
tubtub nga mapatay ako indi ko pag-isikway gikan sa akon ang akon pagkatadlong.
6Ang akon pagkamatarung kaptan ko sing malig-on, kag indi ko ini pagbuhian;
ang akon tagiposoon indi magpakahuya sa akon tubtub nagakabuhi ako.
7“Manginsubong sang malauton ang akon kaaway,
kag subong sang dimatarung ang nagasumpung sa akon.
8Kay ano bala ang paglaum sang wala sing Dios bisan nga makadaug sia,
kon kuhaon sang Dios ang iya kalag?
9Magapamati bala ang Dios sang iya pagtu-aw,
kon ang kagamo mag-abut sa iya?
10Magakalipay bala sia sa Makaako?
Magapanawag bala sia sa Dios sa tanan nga panag-on?
11Ako magatudlo sa inyo nahanungud sang kamut sang Dios;
indi ko pag-ilikum ang yara sa Makaako.
12Yari karon, kamo gid tanan nakakita sini;
ngaa bala niyan nga nanginwala kamo sing pulus nga mas-a?
13“Ini amo ang bahin sa Dios sang tawo nga malaut,
kag ang panublion sang mga manugpigus nga ginabaton nila sa Makaako:
14Kon ang iya mga anak magbuad, ini tungud sa espada;
kag ang iya inanak indi mabusug sang kalan-on.
15Ang mga mabilin gikan sa iya ilubung sa kamatayon,
kag ang iya mga balo nga babayi indi magpanalabiton.
16Bisan magtipon sia sing pilak subong sang yab-ok,
kag mag-aman sing panapton subong sang lunang;
17maaman niya ini, apang isuklub ini sang matarung,
kag ang mga wala sing sala magabahinbahin sang pilak.
18Ang iya balay ginapatindug niya subong sang sipit,
kag subong sang payagpayag nga ginahimo sang manugbantay.
19Nagahigda sia nga manggaran, apang indi na maghimo sing subong;
ginamuklat niya ang iya mga mata, kag wala na ang iya manggad.
20Ang mga kakugmat nagalambut sa iya kaangay sang mga tubig;
ang unus nagakawat sa iya sa kagab-ihon.
21Ginapalid sia sang timug kag nagataliwan sia;
nagasilhig ini sa iya gikan sa iya duug.
22Kay ang Dios magatugpo sa iya kag indi magpasaylo;
buut sia kuntani magpalagyo gikan sa iya kamut.
23Ang mga tawo magapamalakpak sang ila mga kamut sa iya,
kag pahishisan sia pagowa sa iya duug.
Currently Selected:
JOB 27: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
