JOB 22
22
Si Elifaz Nagasumbong sang Dakung Pagkamalaut ni Job
1Niyan si Elifaz nga Temanhon nagsabat:
2“Manginmapuslanon bala ang tawo sa Dios?
Sa pagkamatuud ang maalam mapuslanon sa iya kaugalingon.
3Kalahamut-an bala sa Makaako nga ikaw matarung,
ukon daug bala ini sa iya nga ginahimpit mo ang imo mga dalanon?#Job 35:6-8.
4Tungud bala sang imo kahadluk sa iya nga ginasabdong ka niya,
nga nagaupud sia sa imo sa hukmanan?
5Indi bala daku ang imo pagkamalaut?
Wala sing katapusan ang imo mga kalautan.
6Kay ikaw nakakuha sing mga inugpalig-on sa imo utud sa walay ano,
kag ginhublasan ang mga hubo sang ila mga panapton.
7Wala ka makahatag sa mga lapyo sing tubig nga ilimnon,
kag ginpunggan mo ang kalan-on gikan sa gutum.
8Apang nahanungud sa tawo nga gamhanan iya ang duta,
kag ang tawo nga dungganon nagpuyo sia sa sini.
9Ginpalakat mo nga walay dala ang balo nga mga babayi,
kag ang mga butkon sang mga ilo ginbali.
10Busa ang mga siod yara sa palibut mo,
kag ang hinali nga kahadluk nagatublag sa imo;
11ukon ang kadudulman, agud nga indi ka makakita,
kag ang bugana nga mga tubig nagatabon sa imo.
12“Wala bala ang Dios sa kahitaasan sang langit?
Toloka ang kataason sang mga bitoon, daw ano kataas sa ila!
13Busa ikaw nagasiling, ‘Ano bala ang nahibaloan sang Dios?
Makahukom bala sia lapus sa pitipit nga kadudulman?
14Ang madamul nga mga gal-um lipon sa iya, sa bagay nga indi sia makakita,
kag nagalakat sia sa arco sang langit.’
15Bantayan mo bala ang dumaan nga dalan
nga ginlaktan sang malaut nga mga tawo?
16Ginsabnit sila sa wala pa ang ila tion;
ang ila sadsaran gin-ula subong sang ilig.
17Nagsiling sila sa Dios, ‘Halin ka sa amon,’
kag ‘Ano bala ang mahimo sang Makaako sa amon?’
18Apang ginpuno niya ang ila mga balay sang mga maayong butang—
apang ang laygay sang malauton malayo sa akon.
19Ang matarung makakita sini kag nagakalipay;
ang walay sala nagakadlaw sa ila,
20nga nagasiling, ‘Sa pagkamatuud ang mga nagatindug batok sa aton ginalaglag,
kag ang nabilin sa ila napapas sang kalayo.’
21“Pangilala ka karon sa Dios, kag maglinong;
sa sini magaabut sa imo ang kaayohan.
22Batona ang kasogoan gikan sa iya baba,
kag hupti ang iya mga polong sa imo tagiposoon.
23Kon magbalik ka sa Makaako patindugon ka,
kon ipahilayo mo ang pagkadimatarung gikan sa imo mga layanglayang,
24kon ibutang ang imo bahandi sa yab-ok,
kag ang bulawan sang Ofir sa tunga sang mga bato sang mga sapa,
25kag kon ang Makaako mangin-imo bahandi,
kag bilidhon nga pilak sa imo;
26niyan magakalipay ka sa Makaako,
kag magabayaw sang imo nawung sa Dios.
27Magapangamuyo ka sa iya, kag sia magapamati sa imo;
kag ikaw magabayad sang imo mga saad.
28Magamando ka man sing butang, kag lig-onon sa imo,
kag ang kapawa magabanaag sa imo mga dalanon.
29Kay paubson sang Dios ang bugalon,
apang ang mapainubuson ginaluwas niya.
30Luwason niya ang tawong putli;
maluwas ka paagi sa pagkatinlo sang imo mga kamut.”
Currently Selected:
JOB 22: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
