JOB 23
23
Si Job Nagahandum sa Pag-apin sang Iya Kasaba sa Atubangan sang Dios
1Niyan si Job nagsabat:
2“Bisan karon nga adlaw ang akon yamo mabinatoon,
ang bunal sa akon mabug-at pa sa akon pag-ugayong.
3O, kabay kuntani nga mahibaloan ko kon diin ko sia makita,
nga makakadto ako kuntani sa iya lingkoran!
4Ipahamtang ko sing paagisud sa atubangan niya ang akon pagkahimtang
kag pun-on ang akon baba sing mga katarungan.
5Mahibaloan ko ang mga polong nga isabat niya sa akon,
kag mahangpan ang isiling niya sa akon.
6Magapakigsuay bala sia sa akon sa pagkadaku sang iya gahum?
Indi; kondi magatamud sia sa akon.
7Didto ang matarung makapakigbais sa iya,
sa amo maluwas ako sing dayon gikan sa akon hukom.
8“Yari karon, nagapaatubang ako, apang wala sia didto;
kag paisol, apang indi mahantupan sia;
9sa wala kon nagapanghikot sia, apang indi ko makita sia,
nagapanago sia sa too, indi ko makita sia.
10Apang nahibaloan niya ang dalanon nga ginaagihan ko;
kon matilawan niya ako, magagowa ako subong sang bulawan.
11Ang akon tiil nagsonod gid sa iya mga tikang;
ginbantayan ko ang iya dalanon kag wala maglipas.
12Wala ako mag-isol sa sogo sang iya mga bibig;
ginpakamahal ko ang mga polong sang iya baba labi pa sa akon kinahanglanon nga kalan-on.
13Apang isa sia sing hunahuna kag sin-o bala ang makapaliso sa iya?
Ang ginahandum sang iya kalag, ina gid ang ginahimo niya.
14Kay ginahimo niya ang natangdo sa akon;
kag madamu sang amo nga butang yara sa iya.
15Busa ginakugmat ako sa iya atubangan;
kon magpatugsiling ako, nahadluk ako sa iya.
16Kay ang Dios nagpapunaw sang akon kasingkasing;
ang Makaako nagpakugmat sa akon;
17kay wala ako mahangawa bangud sang mga kadudulman,
ukon bangud nga gintabonan ang akon nawung sang pitipit nga kadudulman.
Currently Selected:
JOB 23: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
