JOB 21
21
Si Job Nagapahayag sang Kabuganaan sang Malauton
1Niyan si Job nagsabat:
2“Pamatii sing makugihon ang akon hambal,
kag ini mangin-inyo mga paglipay.
3Batasa ako, kag ako man magapamolong,
kag sa tapus nga ako nakapamolong, padayon kamo sa pag-uligyat.
4Nahanungud sa akon, ang akon yamo sa tawo bala?
Ngaa bala nga indi ako maugut?
5Toloka ako, kag magkatingala,
kag itabon ang inyo kamut sa baba ninyo.
6Kon makadumdum ako nalibogan ako,
kag ang kakugmat nagadakup sang akon unud.
7Ngaa bala nagakabuhi ang malauton,
nagatigulang, hoo, nagabakud sa gahum?
8Ang ila kaliwat nagalig-on upud sa ila sa ila itololok,
kag ang ila inanak sa atubangan sang ila mga mata.
9Ang ila mga balay hilway sa kahadluk,
kag ang bilogon sang Dios wala sa ila.
10Ang ila baka nga lalaki nagabuad kag wala nagauntat;
ang ila mga baka nagabata, kag wala ginahar-asi.
11Ginapadala nila ang ila mga magamay kaangay sang panong,
kag ang ila mga anak nagasinaut.
12Nagaamba sila sa pandareta kag sa arpa,
kag nagasinadya sa tonog sang lantoy.
13Ginahinguyang nila ang ila mga adlaw sa kauswagan,
kag sa malip-ot nga tion nagapanaug sila sa Sheol.
14Kag nagasiling sila sa Dios, ‘Halin ka sa amon!
Wala kami nagahandum sang kaalam sang imo mga dalanon.
15Ano bala ang Makaako, nga mag-alagad kami sa iya?
Kag ano bala ang mapulus namon kon magpangamuyo kami sa iya?’
16Yari karon, wala bala ang ila kauswagan sa kamut nila?
Ang laygay sang malauton malayo sa akon.
17“Daw ano bala kasunsun nga ang suga sang malauton ginapalong?
Nga ang ila kalalat-an nagaabut sa ila?
Nga ang Dios nagapanagtag sing mga kasubo sa iya kaakig?
18Nga sila subong sang ginalaban sa tampad sang hangin,
kag subong sang labhang nga ginapalid sang unus?
19Nagasiling kamo, ‘Ang Dios nagatigana sang ila kalautan tungud sa ila mga anak.’
Ibalus niya ini sa ila kaugalingon, agud nga makakilala sila sini.
20Patan-awa ang ila kaugalingon nga mga mata sang ila kalaglagan,
kag paimna sila sang kasingkal sang Makaako.
21Kay ano bala ang kabalaka nila tungud sa ila mga balay sa olihi nila,
kon utdon ang kadamuon sang ila mga binulan?
22May magatudlo bala sa Dios sing ihibalo,
sa ginatan-aw nga nagahukom sia sa mga mataas?
23Ang isa mapatay sa iya bug-os nga kusug,
nga matawhay kag malinong sing bug-os,
24ang iya mga suludlan puno sang gatas
kag ang utok sang iya mga tul-an homog.
25Ang isa mapatay sa kapaitan sang kalag,
nga wala gid makatilaw sang kaayohan.
26Nagahigda sila sing alangay sa yab-ok,
kag ang ulud nagaputus sa ila.
27“Yari karon, nahibaloan ko ang inyo mga hunahuna,
kag ang mga pahito ninyo nga inugpakalain ninyo sa akon.
28Kay nagasiling kamo, ‘Diin bala ang balay sang principe?
Diin bala ang layanglayang nga ginpuy-an sang malauton?’
29Wala bala kamo magpamangkot sa mga tawo nga nagaagi sa dalanon,
kag wala bala kamo makahibalo sang ila mga pagpamatuud
30nga ang malaut ginatigana sa adlaw sang kalalat-an,
nga ginadol-ong sila sa adlaw sang kasingkal?
31Sin-o bala ang magapahayag sang iya dalanon sa iya nawung,
kag sin-o bala ang magabayad sa iya sang iya nahimo?
32Apang dalhon sia sa lulubngan,
kag ang mga tawo magabantay sa nalubngan.
33Ang mga puga sang nalupyakan manginmatam-is sa iya;
ang tanan nga tawo magasonod sa iya,
subong nga may mga dimaisip nga una sa iya.
34Paano bala niyan nga ginalipay ninyo ako sa walay pulus?
Sa ginatan-aw sa inyo mga sabat nabilin lamang ang kabutigan.”
Currently Selected:
JOB 21: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
