JOB 20
20
Si Zofar Nagasaysay sang Kalalat-an sang Malauton
1Niyan si Zofar nga Naamanhon nagsabat:
2“Busa ang akon mga hunahuna nagasabat sa akon,
bangud sang akon pagdali nga yari sa sulud nakon.
3Nabatian ko ang sabdong nga nagapakahuya sa akon,
kag ang espiritu sang akon paghangup nagasabat sa akon.
4Wala ka bala makahibalo sini gikan sa dumaan nga tion,
kutub sang ginbutang ang tawo sa duta,
5nga ang pagdaug sang malauton malip-ot,
kag ang kalipay sang walay Dios sa malip-ot lamang nga tion?
6Bisan ang iya kataas maglambut tubtub sa mga langit,
kag ang iya olo maglambut tubtub sa mga panganud,
7apang mawala sia sing dayon kaangay sang iya kaugalingon nga higko;
sila nga nakakita sa iya magasiling, ‘Diin bala sia?’
8Magalupad sia subong sang damgo, kag indi na makita;
hoo, lagson sia subong sang palanan-awon sang kagab-ihon.
9Ang mata nga nakakita sa iya indi na gid makakita sa iya,
kag ang iya duug indi na makakita sa iya.
10Ang iya mga anak magapangita sang kahamuut sang imol,
kag ang iya mga kamut magauli sang iya manggad.
11Ang iya mga tul-an puno sang iya pagkapamatan-on,
apang ini magahigda upud sa iya sa yab-ok.
12“Bisan ang pagkamalaut matam-is sa iya baba,
bisan tagoon niya ini sa idalum sang iya dila,
13bisan pasaylohon niya ini kag indi pagbuhian,
kondi huptan ini sa iya baba,
14apang ang iya pagkaon sa iya kasudlan nabalhin;
apdo ini sang mga man-ug nga dalitan sa sulud niya.
15Ginhalunhon niya ang manggad kag isuka liwat sila;
ang Dios magapagowa sa ila gikan sa iya tiyan.
16Supsupon niya ang dalit sang mga man-ug nga dalitan;
magapatay sa iya ang dila sang man-ug.
17Indi sia magtolok sa mga suba,
sa mga ilig sang dugus kag latab.
18Iuli niya ang iya pinangabudlayan,
kag indi maghalunhon sini;
sono sa pagkabutang nga iya naagum
indi sia magkalipay.
19Kay ginpigus kag ginbayaan niya ang imol,
ginkuha niya sing palugus ang balay nga indi sia magpatindug sini.
20“Bangud nga wala sia sing kalinong sa sulud niya,
indi sia makahawid sing bisan ano sang iya ginakalipayan.
21Wala gid sing nabilin nga wala niya paglamona;
busa ang iya kauswagan indi magpadayon.
22Sa kabug-osan sang iya kadagaya manginsa kapiotan sia;
ang kamut sang tagsatagsa ka makalolooy magaabut sa iya.
23Sang buut na sia magpuno sang iya tiyan
ang Dios magapatupa sang kapintas sang iya kasingkal sa iya,
kag paulanon ini sa iya samtang nagakaon sia.
24Magapalagyo sia sa hinganiban nga salsalon;
ang pana nga saway magalapus sa iya.
25Ginagabut niya ini kag nagagowa ini sa iya lawas,
hoo, ang nagaidlap nga taliwis nagagowa gikan sa iya apdo;
ang mga kakugmat yara sa iya.
26Ang bug-os nga kadudulman natigana nga iya mga bahandi;
kalayo nga wala paghuypa sang tawo magalamon sa iya;
magapapas ini sang mabilin sa iya layanglayang.
27Ang mga langit magapahayag sang iya kalautan,
kag ang duta magatindug batok sa iya.
28Ang patubas sang iya balay magataliwan,
ang iya mga pagkabutang anuron sa adlaw sang kasingkal sang Dios.
29Amo ini ang bahin sang malaut nga tawo gikan sa Dios,
ang panublion nga gintangdo sa iya sang Dios.”
Currently Selected:
JOB 20: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
