JOB 19
19
Si Job Nagatoo nga ang Dios Nagapakamatarung sa Iya
1Niyan si Job nagsabat:
2“Tubtub bala san-o ang pagsakit ninyo sang akon kalag,
kag pagdugmuk sa akon sa mga polong?
3Ginpakahuy-an ninyo ako sini nga makapulo;
wala bala kamo magakahuya nga ginpakalain ninyo ako?
4Kag bisan matuud nakasayup ako,
ang akon sayup magapabilin sa akon.
5Kon sa pagkamatuud magapakadaku kamo batok sa akon,
kag isumbung batok sa akon ang akon kahuluy-an,
6kilalaha karon nga ang Dios nagpabaliskad sa akon,
kag naglikup sa akon sang iya pukot.
7Yari karon, nagasinggit ako ‘Panglugus?’ apang wala ako pagpamatii!
nagasinggit ako sing tabang, apang wala sing katarungan.
8Gindingdingan niya ang akon dalan, agud nga indi ako makaagi,
kag ginbutangan niya sing kadudulman sa akon mga banas.
9Ginhublasan niya ako sang akon himaya,
kag ginkuha ang purungpurung sa akon olo.
10Ginlaglag niya ako sa tagsa ka luyo, kag wala na ako,
kag ang akon paglaum gingabut niya subong sang kahoy.
11Ginpadabdab man niya ang iya kasingkal batok sa akon,
kag ginaisip niya ako sa iya subong nga isa sang iya mga kasumpung.
12Ang iya mga hangaway nag-abut sing tingub;
naghimo sila sing palalipdan batok sa akon,
kag nagapahamtang sing dologan sa palibut sang akon layanglayang.
13“Ginpapalayo niya sa akon ang akon mga utud,
kag ang akon mga kilala nahamulag sa akon sing bug-os.
14Ang akon mga kahimataan kag ang akon mahirup nga mga abyan nagbiya sa akon;
15ang mga nagapuyo sa akon balay nalimot sa akon;
ang akon mga sologoon nga babayi, nagakabig sa akon nga dumuloong;
ako tagaluwas sa ila itololok.
16Ginatawag ko ang akon alagad, kag wala sia nagasabat sa akon;
nagapakilooy ako sa iya sa akon baba.
17Ang akon gininhawa mangil-ad sa akon asawa,
ang akon pangabay sa mga lalaking anak sang akon lawas.
18Bisan ang kabataan nagayubit sa akon;
kon magtindug ako nagapamolong sila batok sa akon.
19Ang tanan ko nga mahirup nga abyan nangil-ad sa akon,
kag sila nga ginhigugma ko nagabatok sa akon.
20Ang akon mga tul-an nagatapik sa akon panit kag sa akon unud,
kag nakapalagyo ako sa panit sang akon mga ngipon.
21Kaawai ako, kaawai ako, O kamo nga akon mga abyan,
kay ang kamut sang Dios nagtandug sa akon!
22Ngaa bala ginahingabut ninyo ako subong sang Dios?
Ngaa bala wala mabusug kamo sa akon unud?
23“O kabay kuntani nga ang akon mga polong nasulat karon!
O kabay kuntani nga napagkit sila sa tolon-an!
24Nga sa inugsulat nga salsalon kag sa tingga
ginsinsil sila sa igang sing dayon!
25Apang nahanungud sa akon nakahibalo ako nga ang akon Manunubus nagakabuhi,
kag sa katapusan magatindug sia sa duta;
26kag sa tapus nga ang akon panit bisan ining lawas malaglag,
niyan sa wala ang akon unud makita ko ang Dios,
27nga ako, ako gid, makakita sa akon kaugalingon,
kag ang akon kaugalingon nga mga mata magatan-aw, kag indi subong nga dumuloong.
Ang akon tagiposoon nagakapunaw sa sulud nakon!
28Kon magsiling kamo, ‘Paano nga paghingabut naton sa iya!’
kag, ‘Ang gamut sang butang yara sa sulud nakon’;
29magkahadluk kamo sang espada,
kay ang kasingkal nagadala sang mga pagsilot sang espada,
agud nga makakilala kamo nga may paghukom.”
Currently Selected:
JOB 19: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
