JOB 18
18
Si Bildad Nagasaysay sang Kapalaran sang Malauton
1Niyan si Bildad nga Suhanon nagsabat:
2“Tubtub bala san-o magapangita ka sing mga polong?
Patugsilingi, kag ugaling magahambalanay kita.
3Ngaa bala nga ginakabig kami subong sang mga sapat?
Ngaa bala nga nangindimatinlo kami sa imo itololok?
4Ikaw nga nagagisi sang imo kaugalingon sa imo kaakig,
bayaan bala ang duta tungud sa imo,
ukon halinon bala gikan sa iya duug ang igang?
5“Hoo, ang kapawa sang malauton palongon,
kag ang igpat sang iya kalayo indi magsidlak.
6Ang kapawa manginmadulum sa iya layanglayang,
kag palongon ang suga sa ibabaw niya.
7Ang mga tikang sang iya kusug pakitiron
kag ang iya kaugalingon nga laygay magaholog sa iya.
8Kay nasihod sia tungud sang iya kaugalingon nga mga tiil,
kag nagalakat sia sa mga matamata.
9Ang tiglapak magadakup sa iya sa tikod,
ang siod magadakup sa iya.
10Ang laang natago tungud sa iya sa duta,
ang tiglapak tungud sa iya sa dalan.
11Ang mga kakugmat magapahadluk sa iya sa tagsa ka luyo,
kag magalagas sa iya sa mga tikod niya.
12Ang iya kusug madula tungud sang gutum,
kag handa sa iya kilid ang kalalat-an.
13Ang mga bahin sang iya lawas lamonon,
ang panganay sang kamatayon magalamon sa iya mga bahin.
14Gabuton sia gikan sa iya layanglayang nga iya ginasaligan,
kag dalhon sia sa hari sang mga kakugmat.
15May magapuyo sa iya layanglayang nga indi tagaiya;
ang azufre laptahon sa iya puluy-an.
16Ang iya mga gamut magamala sa idalum,
kag sa ibabaw ang iya mga sanga utdon.
17Ang iya handumanan mawala gikan sa duta,
kag wala sia sing ngalan sa dalan.
18Tabogon sia gikan sa kapawa pa kadudulman,
kag lagson pagowa sa kalibutan.
19Manginwala sia sing anak ukon apo sa tunga sang iya katawohan,
ukon bisan ano nga mabilin sa iya ginpanglugayawan.
20Sila nga mga nagasonod matingala sa iya adlaw,
subong nga ginhadlukan ang mga nag-una.
21Sa pagkamatuud subong sini ang mga puluy-an sang dimatarung,
kag amo ini ang duug sang wala makakilala sa Dios.”
Currently Selected:
JOB 18: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
