JOB 13
13
Si Job Nagaapin sang Iya Kadungganan
1“Yari karon, ang akon mata nakakita sini tanan,
ang akon idulungug nakabati kag nakahangup sini.
2Ang inyo nahibaloan, akon nahibaloan man;
indi ako kubus sa inyo.
3Sa pagkamatuud buut ako magpakighambal sa Makaako,
kag nagahandum ako sa pagpakigbais sa Dios.
4Apang kamo nga manugpahito sang kabutigan;
tanan kamo mga manugbolong nga walay pulus.
5O kabay pa kuntani nga maghipus kamo sing bug-os,
kag ini manginkaalam ninyo!
6Pamati karon sa akon katarungan,
kag magpamati sa mga pagpakilooy sang akon mga bibig.
7Magapamolong bala kamo sing di-matarung sa Dios,
magahambal sing malimbongon tungud sa iya?
8Magapakita bala kamo sing pagpasulabi sa iya,
magapakigsuay bala kamo tungud sa Dios?
9Maayo bala nga usisaon niya kamo?
Ukon subong sang isa nga nagalimbong sa tawo, magalimbong bala kamo sa iya?
10Sa pagkamatuud magasabdong sia sa inyo
kon sa tago nagapakita kamo sing pagpasulabi.
11Dili bala magpahadluk sa inyo ang iya pagkahalangdon,
kag ang iya kakugmat mag-abut sa inyo?
12Ang inyo halandumon nga mga pinamolong mga hulubaton nga abo,
ang inyo mga pamakud mga pamakud nga lunang.
13“Hipus kamo, pabay-i ako agud nga makapamolong ako,
kag paabuta sa akon ang maabut.
14Ngaa bala nga kuhaon ko ang akon unud sa akon mga ngipon,
kag ibutang ang akon kabuhi sa akon kamut?
15Yari karon, patyon niya ako; ako walay paglaum;
walay sapayan apinan ko ang akon mga dalanon sa atubangan niya.
16Ini man mangin-akon kaluwasan,
nga ang tawo nga walay Dios dili makaatubang sa iya.
17Pamatii sing hanuut ang akon hambal,
kag ibutang sa inyo mga idulungug ang akon panaysayon.
18Yari karon, ginpahamtang ko sing pasonod ang akon kasuayon;
nakahibalo ako nga pakatarungon ako.
19Sin-o bala ang magapakigsuay sa akon?
Kay niyan magahipus ako kag mapatay.
20Lamang dili paghimoa ang duha ka butang sa akon,
niyan indi ako magpanago gikan sa imo nawung:
21ipahilayo sa akon ang imo kamut,
kag indi ako pagpahadluka sang imo kakugmat.
22Niyan panawag ka, kag ako magasabat;
ukon pahambala ako, kag sabton mo ako.
23Kapid-an bala ang akon mga kalautan kag mga sala?
Pakilalaha ako sang akon paglalis kag sang akon sala.
24“Ngaa bala ginatago mo ang imo nawung,
kag ginaisip mo ako nga imo kaaway?
25Pahogon mo bala ang dahon nga ginpalid
kag lagson mo bala ang mamala nga ginalaban?
26Kay nagasulat ka sing mga kapaitan batok sa akon,
kag ginapapanubli mo ako sang mga kalautan sang akon pagkapamatan-on.
27Ginabutang mo man sa mga pandug ang akon mga tiil,
kag ginatandaan ang tanan ko nga banas;
ginakuturan mo ang mga dapadapa sang akon mga tiil.
28Bisan ako kaangay sang gabok nga butang nga nagakamudmud,
kaangay sang panapton nga inut-ut sang sipit.
Currently Selected:
JOB 13: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
