JOB 12
12
Si Job Nagapamatuud sang Gahum kag Kaalam sang Dios
1Niyan si Job nagsabat:
2“Sa walay duhaduha kamo gid ang katawohan,
kag ang kaalam mapatay upud sa inyo.
3Apang may paghangup ako subong sa inyo;
indi ako kubus sa inyo.
Hoo, sin-o bala ang wala makahibalo sang subong sini nga mga butang?
4Subong ako sa isa nga kaladlawan sa iya isigkatawo;
ako, nga nagpanawag sa Dios kag sia nagsabat,
ang matarung kag himpit nga tawo, kaladlawan.
5Sa hunahuna sang yara sa katawhayan may kahikay sa pagkawalay palad;
masami ini sa ila nga nagadalin-as ang tiil.
6Ang mga layanglayang sang mga buyong nagauswag,
kag ang mga nagahangkat sa Dios malig-on,
nga sa ila kamut ang Dios nagadala sing bugana.
7“Apang pamangkota karon ang kasapatan, kag sila magatudlo sa imo;
ang kapispisan sang kalangitan, kag magasugid sila sa imo;
8ukon hambala ang duta, kag ini magatudlo sa imo;
kag ang kaisdaan sang dagat magasaysay sa imo.
9Sin-o bala ang wala makahibalo sa sini tanan
nga ang kamut sang Ginoo naghikut sini?
10Sa iya kamut yara ang kalag sang tagsa ka buhi nga butang
kag ang ginhawa sang bug-os nga tawohanon.
11Wala bala ang dulunggan nagatilaw sang mga polong
subong nga ang ngalagngag nagadimdim sang iya kalan-on?
12Sa mga tawo nga tigulang yara ang kaalam,
kag sa kalawigon sang mga adlaw ang paghangup.
13“Sa Dios yara ang kaalam kag gahum;
may laygay sia kag paghangup.
14Kon nagalumpag sia, indi ini mapatindug liwat;
nagabilanggo sia sang tawo, kag wala sing pagbukas.
15Kon ginapunggan niya ang mga tubig, nahubas sila;
kon ginapadala niya sila, ginasalakay nila ang duta.
16Sa iya yara ang kusug kag kaalam;
ang nalimbongan kag ang naglimbong iya.
17Ginapadala niya nga nahublasan ang mga manuglaygay,
kag ang mga hukom ginahimo niya nga mga buangbuang.
18Ginahubad niya ang gapus sang mga hari,
kag ginatampian ang ila mga balikawang.
19Ginapadala niya nga nahublasan ang mga sacerdote,
kag ginapukan ang mga gamhanan.
20Ginakuha niya ang hambal sang masaligan,
kag ginakuha ang paghangup sang mga tigulang.
21Sia nagaula sing paghikay sa mga principe,
kag nagahubad sang wagkus sang mga makusug.
22Ginabuksan niya ang madalum nga mga butang gikan sa kadudulman,
kag ginadala niya sa kapawa ang landong sang kamatayon.
23Ginapadamu niya ang mga pungsud, kag ginalaglag niya sila:
ginapadaku niya ang mga pungsud, kag ginabihag sila.
24Ginakuha niya ang paghangup sang mga puno sang katawohan sang duta,
kag ginapadalangdalang sila sa kamingawan nga walay dalan.
25Nagapangapkap sila sa kadulum sa walay kapawa;
kag ginapadulingduling niya sila kaangay sang hubog nga tawo.
Currently Selected:
JOB 12: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
