JOB 14
14
Si Job Nagapamalandong sa Kalip-uton sang Kabuhi
1“Ang tawo nga natawo sa babayi
malip-ot sing mga adlaw, kag puno sang kagamo.
2Nagagowa sia kaangay sang bulak, kag ginakutul;
nagapalagyo man sia subong sang landong, kag wala nagapadayon.
3Kag ginamuklat mo bala ang imo mga mata sa isa nga subong
kag ginadala mo bala ako sa hukmanan upud sa imo?
4Sin-o bala ang makakuha sing matinlo nga butang gikan sa dimatinlo?
Walay isa.
5Sa ginatan-aw nga ang iya mga adlaw natapat na,
ang kadamuon sang iya mga binulan yara sa imo,
nga ikaw nagpat-ud sa iya sang mga dulunan nga indi sia makalakbang,
6dili sia pagtoloka, agud nga makapahuway sia,
tubtub nga, subong sang mamumugon, matapus niya ang iya inadlaw.
7“Kay sa kahoy may paglaum,
kon pudlon ini, nga magapanalingsing sia,
kag nga ang iya lumbay indi mag-untat.
8Bisan ang iya gamut maggulang sa duta,
kag ang iya puno mapatay sa duta,
9apang tungud sa alisbong sang tubig magapanalingsing sia
kag magapananga subong sang tanum.
10Apang ang tawo nagakapatay, kag ginahamyang;
ang tawo nagakabugto ang ginhawa, kag diin na bala sia?
11Subong sang mga tubig nga nagakahubas gikan sa dagat,
kag nagahubas ang suba kag nagamala,
12Sa amo ang tawo nagahigda kag wala na nagabangon;
tubtub nga wala na ang mga langit indi sila magmata,
ukon mapukaw sa ila katologon.
13O kabay pa kuntani nga tagoon mo ako sa Sheol,
nga matago mo ako kuntani tubtub nga magtaliwan ang imo kasingkal,
nga tangdoan mo ako kuntani sing pinat-ud nga tion, kag madumduman ako!
14Kon ang tawo mapatay, mabuhi pa bala sia?
Sa tanan nga mga adlaw sang akon pagpakig-away magahulat ako,
tubtub nga mabuhian ako.
15Magapanawag ka, kag ako magasabat sa imo;
magahandum ka sa binuhatan sang imo mga kamut.
16Apang karon ginaisip mo ang akon mga tikang,
wala ka nagabantay sang akon sala;
17napat-inan sa sulud sang puyo ang akon pagkamalalison,
ginabugkosan mo ang akon kalautan.
18“Apang ang bukid nga nagakapukan nagakawala,
kag ang igang ginakuha sa iya duug;
19ang mga tubig nagatais sang mga bato;
ang iya mga paglambas nagaanud sang yab-ok sang duta;
sa amo ginalaglag mo ang paglaum sang tawo.
20Ginalandas mo sia sa gihapon, kag sia nagataliwan;
ginabaylohan mo ang iya nawung, kag ginatabog sia.
21Ang iya mga anak nga lalaki nagadungganon, kag sia wala makahibalo sini;
ginapaubus sila, apang wala sia makahantup nahanungud sa ila.
22Apang ang iya unud sa iya may kasakit,
kag ang iya kalag sa sulud niya nagakalisud.”
Currently Selected:
JOB 14: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
